1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 |
N N T |
Assaron seith that a kinge in his reame maye be hurte by fyve thinges specially. The firste is by grete droughte, as myghte be no reyne in two yere. The secunde is by outeragious dyspence over the revenues of his reame. The thridde is in to moche usynge of wommen, of wyne, of huntynges, and pleyes. The fourthe is to be evel of maners, to do evell thinges, and also to be to cruel in puttynge his people to over- grete peynes. The fyfte is to have many enemyes and adversaries. And seith: "The most notable maners and moste easefull unto man bene in two thinges, that is to saye: firste, for to be liberall; secunde, for to be true of his language." And seith: "The man that is liberal maye nat leve evel, and he that seith truly maye nat be dyshonoured; the humble man maye nat be hated, the wele attempred man maye nat be seeke; and that persone that diligently attendith to his labours, it is mer- veille and he repente." And seith: "A kinge oughte nat to putte his truste in hym that is called a covetous man, ne in him that is comen from grete povertee to grete ricchesse, ne in him that the kinge hath put aweye from his goodes and his lorde shippes, nor in him that hathe suffred divers hurtes by the ordenaunce roial, nor in him that hathe any freendlyhed to the kinges enemyes; and of all thes [fol. 55r] persones the kinge shulde be wele ware or he gave hem any lordeshippes or governaunces." And seith: "It is impossible for a man to kepe himself oute of defaute that is sod- eynely plucked up in grete magnificence with a kinge withoute that he hadde gretly deserved it." And seithe: "Whanne that a kinge knoweth that any of his men ordeyneth any debate agenste him, he shulde hastily and withoute abidynge knowe the trouthe of the dede, and the quantité therof, and whedir it be done by verrey wille or by ignoraunce, or wheder he be accustumed for to do so, or whedir it be lykly that he wolde falle agen in the same; and upon any of alle thes poyntes he shulde make remedye hastily." And seith: "The servauntes of a kinge shulde shewe in servynge him their vertue, their feythe, and the noblesse of here lynage, to that ende that the kinge myght knowe hem the bettir and to do to every man lyke his deservynge." And seith: "Yf a king have in as grete love the evell and untrue men as he hathe the goode, men oughte nat to take him for a kinge, and he shal nat longe tyme regne." And seithe: "Yf the kinges counselloure, his phesycian, and his confessoure medell hem of othir thinges thanne suche as longeth unto here offices, the kinge shal be alleweys hurte, and he shal be evermore seeke in body and soule, and at the laste have an evel endynge." And seith: "Ho that hydeth the trouthe from his maister and aske counsell of his frende and nat shewe him the sothe of his matier, he destroyeth his owen self." And seith: "A kinge shulde nat commytte to othir men suche thinges as he shulde do himself." And seithe: "The moste secrete counsell of a kinge is consentynge, and his goode werkes bene his grettest thresoure, and amonge men the truest is beste, and the beste rycchesses bene thees that bene wele and truly goten." And seithe: "A kinge oughte to com- mytte his besynesses to him that he hathe preved in feithe and trouth and in good governaunce; and yf he can fynde none suche, thanne take him that hathe bene alwey conversaunte amonge wyse men." And seithe: "A wyse kinge and of good undirstonding amendeth meche, and maketh good his counsellours." And seith: "Whanne a kinge that is of good discrecioun hathe two hasty thinges for to done, he oughte to begynne at the moste noble of hem; and yf it happen that thei be lyke of oon gretenesse, yet [fol. 55v] begynne at that that maye leest recover agene in tyme commynge." And seithe: "Yf a kinge be merciful, his thinges shulle speede wel, and his wysedame shal availle in tyme; and yf he be true, his people wole gretely joye in him; and yf he be juste, his regne shal longe endure." And seithe: "Kinges shulde gete hem goode name, and good renowne softly and by good mesure, for by outerage it shal nat longe endure." And seithe: "It longeth to a kinge that is a conqueroure to see that good justice be sette in the reames that he hathe goten; and though so be that it is an harde thing for to gete hem, yet it is more harder and more peyne for to keepe hem." And seith: "The moste fulfilled of witte is he that can knowe himself and departe nat from Goddes obeysaunce for any occasyon that maye come to him, and ho that contynuelly yeldeth graces to God of the goodes that He hathe sente him." And seith: "The evel lawe is the love of evell folkes, and it maye no lenger endure thanne the shadowe of a clowde." And seith: "The wyse man enforceth himself to flee fro harme, and the fool dothe grete peyne for to fynde it." And seithe: "Whanne a wyse man that is an officer of the kinges heere the kinge seye anythinge that maye hurte him, or his reame, or his people, he shulde shewe the kinge exsamples of storyes of his predecessours, or other storyes to the same purpos, that the kinge maye undirstonde that it is seide for himself." |