1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36   37 38 39

N N N N T T N

[fol. 9v] Zalon establysshed the lawe in Athenes and compyled many bokis of goode predicaciouns, and was of the same cité of Athenes, whiche was replenysshed of many wyse men in tho dayes, and made certeigne versis by whiche he taught a man that he shulde flee from his owen propre wille. And seith: "Whanne thu wilt do anythinge, sewe nat in alle thinge thyne owen wille, but seche counsell, for by coun- sell thu shalt undirstande the trouth of thingis." Somme asked him a questioun -- whiche was the moste dyffuse thinge to a man? And he aunsuered and seide: "To knowe himself and to kepe him in fredom, and that he speke nat in placis where that he aught nat to speke inne, and to kepe himself from that anger that he maye nat be amended by, and coveyte nat that thinge that he maye nat have." And seith: "The thingis of this werlde, lawes and othir, bene susteyned by two maner of thingis, that is to seye: undir the swerde and under baner." And seith to oon of his disciples: "Kepe thee fro mocking, for mockinge engendreth hate." And seith that the vertues of man bene nat of his owen gefte, but these that bene geve him by his werkis. And somme asked him what thinge shulde be holde liberal, and he aun- suered and seide: "He that usith liberalitee and coveyteth nat othir mennys goodis." And somme asked him what thinge was sharper thanne a spere, and he aunsuered: "the tunge of an evel man." And a riche man asked him what maner goodis were thei that he hadde, and he aunsuered and seide: "My thresour is suche that no man maye have it, but yf it be by my wil; and it is nat the lasse for nothing that I geve awey therof, but thu mayste geve awey none of thi richesse but it wole be the lasse." And seith: "Yf thu wilt have the love of thi frende, be stedfaste and true to him; and yf he erre, suffre hym." And seith: "Oon aught nat to preyse a man of gretter goodnesse than is in him, for himself knoweth wel the trouth whedir he sey soth or nat." Anothir asked him how a man shulde gete him frendis, and he aun- suered: "In seynge worship of men behinde here backis." And seith: "A good soulle sorowith not ne rejoissith nat but whanne she maye see goode thingis and none evell thingis, nor she soroweth nat but whanne she seth alle evell thingis ande noone goode; and the good soulle that seth all the worlde seeth the goode thingis, and the evell thingis so entremedled that she owethe nat gretly to rejoisse nor gretly to make sorowe." And Zalon loste his sone and beganne to wepe, and oon asked him a question -- [fol. 10r] what it dede profite him for to wepe. And he aunsuered and seide: "I wepe that that profiteth." And seith: "A kinge that dothe right and justyce shal regne and governe his people. And ho that dothe wrong and violence sekith anothir kinge for to regne for him." And seith: "It longeth to a lord firste to redresse himself and thanne othir men aftir him, and ellis it were lyke as he wolde redresse his owen schadowe before himself." And thei asked him how were townes and citees wel governed. He aunsuered and seide: "Whanne that princes worken aftir the lawes."