1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 247 248 249 250 251 252 253 254 255 256 257 258 259 260 261 262 263 264 265 266 267 268 269 270 271 272 273 274 275 276 277 278 279 280 281 282 283 284 285 286 287 288 289 290 291 292 293 294 295 296 297 298 299 300 301 302 303 304 305 306 307 308

N T N N N N T N N N N T T N N N N N N N N N N

Hermes was borne in Egipte, and is as moche to seye in Greke as Mercury, and in Ebrew as Ennoch that was the sone of Jareth, the sone of Mathalabel, the sone of Quinart, the sone of Enoy, sone of Seth, sone of Adam; and was befor the grete flood, aftir the which was anothir floode that drowned all the cuntré of Egipte. And the seid Hermes wente in alle the cuntrees eighty and two yeris, with seventy-two persones of divers languages, which alwaies exhorted and stered the people to ob- beye God. And bilded an hundred and eight townes, whiche he replenysshed with sciencis and was the firste that fonde the connynge of sterres. And to the people of every clymat establed the lawe and partede covenably to their oppynyons, to the which Hermes the kingis that were in that tyme obeied and alle her lande also and alle that dwelled in iles, and constreyned hem to kepe the lawe of God, to seye trouth, and dispise the werlde. And commaunded to sey praiers, and praiers for to be made, and to faste every moneth [fol. 3r] upon the Satirday. And distroyed the enem- yes of the feith. And gafe money to the poure people of God, that is to knowe, to feble and impotent peple. And commaunded that men shulde ete flesshe of porke and of geet and suche othir lyke metis, and commaunded hem expressely that thei shulde kepe hem from dronkennesse. And stablisshed many feestis at certeyne tymes. And ordeigned also certeyne sacrifices at the entree of the signes of the sunne, and other sacrefices at the firste sight of the moone, and in the conjunc- tioun of the planetis that entre in theire mansions, and in their exaltaciouns and of the sight of hem; and offred sacreficis of alle thingis, that is to seye: of floures, of rooses, of greynes, of whete, of barly, of fruytes, of grapes, and buverages. And the same Hermes seith that it is not ynough to thanke God oonly for the goodes that He geveth us. And seith: "O man, yf thu knewest God wele, thu shuldest never falle in the weyes that shulde leede thee to evyll." And seith: "Make nat youre clamours to God as ignorauntes full of corupte wille. And loke ye be nat inobe- diente to God, ne trespasours of the lawe. And lete no man do to his felawe othir- wise thanne he wolde that shulde be done to him, but beth of oon accorde, and every man love other, and use fastinge and prayers in pure and clene wille, and constreyn youre wille to do goode werkis, lowely and withoute pride, in such maner that youre werkis maye make goode fruytes. And drawe ye awey fro the companye of evell folkis as theves and such as use fornycacions." And seith: "Bewar that ye be nat forsworne and that alle tymes trouth maye be founden in youre mouth. And beware that ye swere nat but outhir yee or naye. And loke that ye enforce you nat to make hem swere that ye knowe bene accustumed to lye, leste that ye be par- tyners of theire perjurye. Truste ye in God that knoweth alle secretis, and He shal juge you in right at the grete daye of jugemente that shal geve His graces and rewardes to the goode people and shal punysshe the evell people for here evell dedis." And seith: "Be ye in certeyne that to doute oure Lorde is the gretteste wis- dame, and the gretteste dilectacioun that oon shulde have is in Hym from whens alle goodes comen, by the which the gatis of oure undirstandinge and wisdame bene opened. And God that loveth His servauntis hath geven hem discrecioun and hath geven hem prophetis and ministres fulfilled with the Holy Gooste, by the which hath He shewed hem the secretis of the lawe and the trouth of wisdame, to that entent [fol. 3v] that thei shulde eschewe the evell deedis and applie hemself to the goode dedis." And seith: "Use wisdame and sewe the lawe. Be mercifull and arraye you with goode techingis. Thenke weel on youre thingis, and haste you nat to moch in hem, and specially in punysshing of evell doers." And seith: "Yf any of you use any maners longinge to synne, be nat ashamed to withdrawe you and for to res- ceive punysshemente therfore in schewinge good exsample to othir. And yf so be that he be nat punysshed in this worlde, he shal be punysshed at the grete Daye of Doome and shal be turmented with more gretter peyne and withoute pité." And seith: "Correcte youreselfe and sewe the wise men and lerne of hem goode vertues. And lete youre desire be for to gete you good renowne. And employe nat youre undirstandinge in malice and subtilté." And seith: "Kepe you fro hem that governe hemself by malice withoute trouth, and that oonly herken it withoute puttinge in dede." And seith: "Loke ye holde nat the cordes to noye the people and seke nat their hurtis by cautelis, for thei can nat be so hidde but that it shal be knowe in the ende." And seith: "Sette togedir the love of feith with the love of wisdame and constreyne youreself thereto; and yf ye do it, alle your tyme shall be in wyn- nynge, and of this noble vertue shal come to you more profite thanne to assemble golde, sylver, or other tresours that be nat durable, for it shal be to you a tresour in anothir werlde that ever shal endure and never have ende." And seith: "Bethe all oone withinne and withoute; and or that ye speke, loke that ye speke in suche wise that youre language be nat contrary to the wille of your herte." And seith: "Make you lowely and obbeye youre lawes and youre princes, and honoureth your grettest ministrours. Love God and trouth, and geve true counseile to that ende that ye maye more surely with youre goode penitence be in the weye of salvacioun." And seith: "Yelde your thankinges to God in tyme of tribulacioun and of pros- perité, in tyme of poverté, and of riches." And seith: "Ye shal nat eete but of your dedis, and kepe you that ye eete nat unjustely, and that ye be lever to have poverté in doynge goode dedis thanne ricches in synne, for ricchesses losen and goode dedis abiden. And kepe yourself from moche laughing and from mokking of othir." And seithe: "Yf ye perceyve anothir in any tecche of lewednesse, yet mocke him nat dishonestly, but loke that ye thenke that God hath made us alle of oon matier, and he that mocketh is nat sure, but in lyke wise it might befalle to him. Wherfore ye shulde thanke God that He hath kepte you from such mischefis in tyme passed and in tyme presente, and beseche Him of His mercy [fol. 4r] that He wolde kepe you in tyme that is to come." And seith: "Whanne the enemyes of the feithe disputen with you with harde and sharpe wordis, answer ye hem agen with swet- nesse and humilité, and beseche God that He wolde redresse His creatures to good beleve and to everlastinge salvacioun." And seith: "Be nat to besy of language in counseile. And holde your tungis tyed before youre enemyes, as he that sekith the rodde to be betyn." And seith: "Ye maye nat be juste withoute that ye dreede God, by the which ye resceive the Holy Goost that shal open you the gatis of Paradise by the which youre soulles shull joyefully entre in with othir that have deserved the everlastinge lyfe." And seith: "Eschewe the company of evel folke, from enemyes, from dronken men, and ignorauntis. Ande whanne ye thenke on any good deede, dothe it anone leste it be lette or rescowed by any wille of the contrary." And seith: "Loke thu have none envye yf thu see any good thinge come to him that hath an evel hert, for he shal nat be stable and his ende shal be evell." And seith: "Make children to be taught in their childehode or thei knowe any gret evell, and so in hem thu shalt nat synne." And seith: "Honoureth and praieth God with good wille, and adresse alle youre desires to God and thanne He shal areise hem and helpe you where that ever ye be, and shal delyver you from alle perellis and shal make meke alle your enemyes undir youre goode praiers." And seith: "Whanne ye wole faste, make clene youre soullis of alle filth and that youre fastinge come with a pure herte and evell thoughtis to be put oute therof, for God takith hem for foulle and evell. And lyke as ye do abstinence of meetis, in lyke wise shulde ye absteyne you from synnes, for it sufficeth nat to God that a man dothe abstinence of meetis and applieth himself to do evell deedis." And seith: "In youre fastinge, visite the hous of oure Lorde and beth in youre praiers withoute grete pompe, but in swetnesse and in lowelynesse. And whanne ye shul be gladde in youre houses and make youre feestis to youre welewillers, have remembraunce upon Goddis people and departe with hem of youre goodis." And seithe: "Comforte the people that bene in an- guysshe and in hevynesse and comforte prisoners, and heele the seeke, clothe the naked, feede hem that have hungir, geve hem drynke that bene thristy, herberowe the pilgrymes, make satisfaccioun to youre creditours, and suffre youre wrongis paciently." And seith: "Loke that ye nat discomforte hem that bene in affliccion, but helpe hem with swete and pleasaunte wordis. And yf it be suche that have done you harme, forgeve it hem lowely and lete it suffice you the peyne that thei suffre." And seith: "Enforce you for to gete you frendis, and firste preveth hem or that ye put to grete truste [fol. 4v] in hem leste ye shal have harme and repente you." And seith: "Ho that God higheth or lifteth up in this worlde shulde take that arisinge for nowt, and nat to take himself therfore more herre thanne oon of his fellawes. For God hath made the poure and the riche alle of oon creacioun, to the regard of the whiche alle bene egall." And seith: "Bewar that in youre hate ther go no lewed worde oute of youre mouthe, for it is thinge that is dishonesté and shal engendre peyne." And seith: "Ho that refreyneth his angre and settith a bridell on his tunge and speketh attemprely and kepith his tunge clene, he surmounteth alle othir." And seith that it is nat conveniente for him that wolde have connynge that he shulde seke it by merites ne for money, but oonly by dilectacioun, for it is more precious thanne alle othir thingis. And seith: "Verry wisdame is gefte of fortune, true jugemente of discipline, and sleynge of alle evellis." And seith: "That kinge is noble and good that, in his realme, leveth the evel lawe for the goode." And seith: "To be liberall in tyme of poverté and necessité is commendable, paciente to forgeve whanne a man maye avenge his wrongis." And seith: "Ho that honour- eth wise men and loveth trouthe and doth goode dedis and enforceth himself to lerne connynge and goode maners shal fynde that maye please him in this worlde and in the othir." And seith: "He is unhappy in this worlde and in the other that hath nothre wisdame ne doctrine." And seith: "Ho that will nat teche that he know- ith in connynge and maners, he shal be partener in ignoraunce with the evell peo- ple. And ho that denyeth to teche connynge to him that it is covenable to, he ought to be depryved of his benefetis in this worlde; and of the seyenge naye to, he is wors thanne the ignoraunt which is of evel wille." And seith that liberalité is more worthe in connynge thanne in ricches, for the renowne of the wise abideth and the ricches loseth. And seith: "Man shulde nat offende ne hate him that hath done him any offence, but shulde do him good for evel, for the werkis of the wiseman bene knowen in thre maners. That is to seye: to make of his enemye his frende, and he that knoweth nat to make him knowe, and of the evell to make him good." And seith: "He maye be taken for good whanne othir men resceyven of his goodnesse, and he that loveth as moche the weele of othir as of himself." And seith that grete connynge maye litil availle in a covetouse man, but smal connynge profiteth in him that withdrawith his corage from covetise." And seithe that deth is lyke the strooke of an arrowe, and the lyfe is lyke as the arrowe is sette for to come." And seith that pitee is more grete to have mercy upon foolis thanne uppon wisemen. And seith: "Ho that holdeth hym [fol. 5r] nat suffised with that that he hath, deserveth to have no more." Ande seith that a reportour othir a contrever of talis, outhir he menys evel to him that he tellith the tale, or ellis he is fals to him of whome he reporteth. And seithe that derisioun and mockerye putten awey feere, lyke as the fyre brenneth and distroieth the woode. And seith that the envious man is frende to a man in his presence and enemye in his absence, and is a frende in worde and enemye in dede. And seith that an envyous man is nat good but to dispreisinge of othir men. And seith: "He is right sure that is withoute blame, and he is ful evell ensured that is in grete blame." And seith: "Beth ware how ye obbey to covetise, for covetise wole nat obbeye to you." And seith: "Ho that asketh counsel of othir begynneth to profite himself." And somme asked him a question -- what it was that moste troubleth and hurteth a man. He aunswered and seid: "Envye and wrath." And thanne was asked him a question -- whi the wisemen helde hem more at the gatis of riche men thanne the riche men helde hem at the gatis of the wisemen, and he aunswered and seide that the wisemen sewen the prouffite of connynge. And seith: "Ho that hath witte and discrecion and shewith it nat in dede, he is as a tree withoute fruyte." And seith: "Ho that is wise knoweth ignoraunce, and he that is ignoraunte knowith it nat, and he that knoweth nat himself, with moche peyne he shulde knowe othir." And seithe that there be two maner of people: that oon is that sechith and can nat fynde, and that othir that fyndeth and profiteth nat. And seithe that wisdame is as the peerle that is founde in the bottom of the see, which a man maye nat have but by hem that can dyve downe to the bottom of the see and fynde it. And seith: "He maye nat be of parfite connynge but he be chaste in himself." And seithe that dissiplyne is the ornament of witte, by the which discrecioun shulde be aourned as moche as a man might." And seith: "It is nat honest to chastice oon man in presence of anothir, and chastice the tother aparte." And seith: "Whanne a man excuseth himself of his blame ofte, it makith him recorde errour." And seith: "The ignoraunt is but litel natwithstandinge that he be olde, and the wise is grete though so be that he be yonge." And seith: "The worlde dispreiseth every daye him that he was wonte for to worship, and the erthe etith him, the whiche he was wonte for to geve mete to." And seith: "Men maye knowe the foole by his wordis and the wiseman by his dedis." And seith that fewe folke have envye to a man whanne he is deed, but he seith that many folke wole lye upon him. Ande [fol. 5v] seith: "Beth gladde and mery, and that sufficeth to angre the envious man." And thei asked him whi he wolde nat be maryed, and he answered: "Ho wole swymme in the see and maye nat, how wolde he swymme and bere oon in his necke?" And seith: "Kepe thee fro the company of a jangeller that ressemblith suche a thinge that shyneth whanne a man is ferre from it and whanne it is nygh it is right nowt." And seith: "Ho that taketh upon him for to do evel to anothir for thee, in lyke wise wol he do for anothir agenste thee." And seith: "Ho that preisith thee in any vertue that is nat founde in thee, he maye wel noye thee and make that thu shalt nat undirstande the vice that is in thee." And seith: "Wrath troubleth resoun as moche as it troubleth a man to do goode werkis, and the evell dedis at leyser." And seith: "Ho that laboureth in that that maye nat profite, he leveth for that the labour that shulde profite him." And seith: "The shame that men suffre for the condicions of evel folke troubleth and empechith the concupiscence of them." And seith: "Whanne thi frende hath erred agenste thee, yet departe thee nat from his love as longe as thu mayste fynde any maner that it myght be redressed." And seith: "Good and true is he that forgetith lightly that thinge whiche that his frend hath trespassed inne." And seithe: "It is bettir thu chastice thiself thanne be chasticed by othir." And seith: "The goodis that bene of ignorauntis bene lyke the herbes that growen upon dongehilles." And seith that evell fellashippes bene lyke as a tree sette on fyre, where oon bough settith afyre anothir. And seith: "The aunswere of somme thingis is a man for to holde his peas." And seith: "The noblest thinge in this worlde is man, and the moste noble thinge that is in man is reason, by the whiche he undir- stondeth justice and departeth himself fro synne." And seith: "The foole knowith nat himself lightly." And seith: "An ignoraunt troveth lightly that oon thinge is anothir, and he that is doutefol makith many doutes or he maye undirstande it." And seith that it is right comendable bothe in heven and in erthe to have a true tunge. And seith: "It apperteigneth nat to kinges ne princes to geve lordship and might but to people that bene petevous, and for that thei shulde love him as the fadir loveth the children." And seith that the endeof a resonable soulle is for to knowe trouthe, and the ende of sensualité is lyf, and the ende of corupte lyfe is peas. And seith: "It ought suffise to be venged of his annoye whanne the adversary partie askith forgevenesse." And somme asked him what was fraunchise, and he aunswered: "Delyveringe of silver." And seide: "Geve to hem that bene unknowen for the love of hem that bene [fol. 6r] knowen; and forgeve to hem that have bene agenste thee, for hem that have holpen thee." And seith that the lyffe of this worlde is so shorte that no man ought conceive in his herte any enemyté to anothir. And seith: "Stablisshe thine angre with thi pacience and thyne ignoraunce with thi providence and wisdame." And seith that it is a good token in a childe to be good whanne that he is shamefaste, for he shewith himself that he shal have good tyme. And seith: "It is good to do wel whanne thu arte in good prosperité, for peraventure thu shalt have no power whanne thu arte in adversité." And seith: "Ho that dwellith in a provynce that hath a vengeable lorde, no rightwis justice, ne good leeche, nor plentevous market, ne no rennyng rever, he putteth in grete aventure him and his goodis." And the seid Hermes charged Kinge Amon, seyeng: "The first thinge that I commaund thee is to drede God and obbeye him." And seith that alle men that have lordship over the people shulde have thre thingis in her mynde: firste, of the people that bene his subjectis; the secunde, though so be that thei be undir his lordship yet shulde he to his power kepe hem in fredame and nat in bondage; the thridde is that lordship maye nat longe endure. And seide: "O Amon, it behoveth thee to kepe thi soulle in pure trouth by wille and worde. And thou shuldest nat be sloughthfull to distroie the evell belevers and to constreyne hem to obbeye God. And coveite nat to treete with hem that bene of mysbeleve for no good by the which thu maiste make hem to disobbeye God. And loke thu gadre no ricchesses but yf thei be truly goten. And knowe it wel that the people wolde alweies obbeye to good rule; and the realme maye nat fare wel but yf the people encres, for whanne the people bene loste and gone, the prince shal regne oonly over himself. And therfore considre oonly to thi soulle; and make the store of that, that may be helpinge therto in anothir worlde. And yf it fortune so to the that thu shalt go to the werr in thyne owen persone, loke thu bewar that thyne enemyes take thee nat dis- pourveied. And whanne thu shalt shewe thee to bataille, loke firste that thi people bene wele enfourmed and comforted and alle thi fighting men that thei be wele araied and at alle tymes redy. And beware that thyn enemyes overcome thee not sodeinly, but encrece thi wacche and thyne espies, to that entente that thu shalt knowe the governaunce of thyn enemyes. And loke ye bewar that youre enemyes deceyve you not. And yf so be that thu commaunde thi people to do anythinge, loke thu serche secretly whedir thei do it lyke as thu haste commaunded hem. And yf thu so do, thei wole drede thee more. And yf thu commaunde thi secretaire to make a lettre, loke thu seale it nat unto the tyme that thu haste [fol. 6v] sene it, for many oon have been deceyved therby. And bewar that thu be nat to familier with alle that thu knowest and shewe nat alle the governaunce of thi people, but to them oonly that thu haste wel preved, and that thu knowest and undirstandeth hem for true men. And loke thu governe thee so wisely that thi knightis and thi people mowe be rejoissed of thi companye, and that thei maye have a joie and allowe thee in thi good governaunce, and that thei maye joie and delite in thi good rule. And loke thi sleep be suche as maye be sufficient to thyne hert, and entremetethee not but of true thingis, and alle thingis that thu doste maye be founded upon trouth withoute skornyng. And loke thu tary nat longe upon suche execusioun that thu muste nedis do. And loke thu be debonair and gracious to forgeve. Susteyne and love hem also that laboure in the grete alquemie. That is to seye: the labourers of the erth, suche as sowen the seedis and planten fruytes and alle other labourers by the whiche is proufite unto the people and knighthode multiplied, and the houses full of ricchesses, and the realmes susteyned by the whiche alle suche thingis is necessarie to be wel saved and kepte. And it is a commowne wele to worship every man aftir his discrecioun, condicioun, and science, to that entente that the people maye knowe the goode and to do good to hem that sechen connynge, for this cause that thei shulde have greettir wille to lerne, and that thei wil entende to their studie, and that alle the provynce that thei be inne maye be the bettir for hem. And also that ye make diligence to punnysshe the evell doers as soone as ye goodly maye. And ho that wol do myscheve in thi realme or in thi lordship, anone make smyte of his hede openly afore the people, to that entente that the people maye take example: to the theef, kutte of his hande; the robbours of highweyes, lete hem be hanged to that entente that the weyes maye be more sure; the sodomytes, lete hem be brente; and the men that bene taken in fornycacioun, lete hem be punysshed aftir the state of ther personys, and the wyfes that bene founden in like wise aftir the same fourme. Also, kepe thee fro the talis of lyers, but punysshe hem openly; and lete thyne herte reste in excercise of trouthe. Also visite the prisoners oones in a moneth and delyver hem that owt to be deliverd, and do hem good. And tary nat longe for to punysshe suche as have deserved punycioun; and make kepe wele the tothir unto the tyme that thu knowe the trouth of her werkis. And kepe thee wele that thu use nat to moche for to do aftir thyn owen counsell oonly, but be counselled by men of good discrecioun and age, whiche bene experte in many thingis. And whanne [fol. 7r] thu fyndest a treue man and a rightwos, take thi counsel of him; and othirwise reporte thee to the moste holsom counsel, and God wil helpe thee." And seith: "He is a noble man that useth goode dedis, and thes dedis bene justice, chastité, and to geve frely withoute askinge." And seith: "It longeth to every man for to seche connynge, and to fortifie it in himself withoute doutinge of aven- tures that bene for to come, and kepe himself that he be nat lifte up in pride, nothir by ricchesse, nor by lordship. And loke his will, his seyengis, and his dedis maye be founde true, and thanne shal God love him and his successours." And seith that no man maye escape at the Daie of Doome, but by thre maner thingis, that is to seye: for his discrecion, for his chastité, or for his goode dedis. And seith that alle thingis perisshen saulf goode dedis, and all thingis maye be hidde but nature. And seith that alle thingis maye be better redressed thanne evell maners, and alle thingis maye bene acheved but the commaundemente of God. And seith: "It is no merveille though he be good that loveth no covetyse, but it were grete merveille to see a covetouse man good." And seith: "Putte nat an evel doer to execucioun to hastily, but that he have some leyser to repente him." And seith that the erringe of wisemen is like the bothum of a shippe that is nat drouned himself, and maketh othir for to be drouned." And seith that fyaunce is a maner of bondage, and diffi- aunce is libertee. Ande seith: "Whanne that a kinge maye nat refreyne his volun- tary wille and his coveytises, howe maye he reprove his servauntis? And whanne he maye nat repreve his owen servauntis, how maye he redresse his owen people, and namely them that bene ferre fro him? Thanne it is conveniente to a kinge firste to be maistir over himself and aftirwarde in due ordre over alle othir." And seith that a kinge ought nat to be fulle of suspessioun, for suspessioun makith the people to withdrawe hem fro him, and also he shulde nat have no suspessious man in his housholde, and specially suche as bene accusours, contryvers, and reportours of talis behinde a man. For yf the kinge suffre suche paciently in his hous, with grete peyne shal he have any sufficient servaunt or true counsellour."