1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 247 248 249 250 251 252 253 254 255 256 257 258 259 260 261 262 263 264 265 266 267 268 269 270 271 272 273 274 275 276 277 278 279 280 281 282 283 284 285 286 287 288 289 290 291 292 293 294 295 296 297 298 299 300 301 302 303 304 305 306 307 308 309 310 311 312 313 314 315 316 317 318 319 320 321 322 323 324 325 326 327 328 329 330 331 332 333 334 335 336 337 338 339 340 341 342 343 344 345 346 347 348 349 350 351 352 353 354 355 356 357 358 359 360 361 362 363 364 365 366 367 368 369 370 371 372 373 374 375 376 377 378 379 380 381 382 383 384 385 386 387 388 389 390 391 392 393 394 395 396 397 398 399 400 401 402 403 404 405 406 407 408 409 410 411 412 413 414 415 416 417 418 419 420 421 422 423 424 425 426 427 428 429 430 431 432 433 434 435 436 437 438 439 440 441 442 443 444 445 446 447 448

N N N N, T N N T N N N N N N T N N N N N N N N N N N N N N N N N N, T N N N N N N N N N N N, T T T T T N N T T N N T T N

[fol. 58v] Somme asked of oon whiche was named Protege whi that oon of his neyghbors made dye his heeres blacke. He aunsuerd and seide: "For because that men shulde aske him wysedome." And Plyves seith: "The more goodes that a fool hathe, the more lewedder he is." And somme asked of Araston what tyme was beste a man to lye with his wyfe. He aunsuerd and seide: "At alle tymes that a man wolde empeyre or make feoble his body." And thei asked of Dinicrate wherinne he perceyved his witte beste. "In that," quod he, "that I trowe myne undirstondynge be but litil." And seith: "The wyseman that agenseythe is bettir thanne the foole that agreeth to alle thinge." Thanne oon of his dyssiples aunsuered and seide: "A wyseman wole nat agenseye but litil, but a fool wole agenseye alle." There was a wyseman whiche was called Azee and was a prysonere, whome his maister asked of what lynage he was of. To whome he aunsuerd and seide: "Enquere nat of my lynage, but oonely of my wysedome and of my prudence." And anothir, whiche was named Fyguanee, was a prysoner, an escalve, of whome oon that wolde have boughte him asked wherto he was good. He aunsuerd and seide: "For to be delyverd." And anothir asked of a boonde man yf he wolde be goode and he boughte him. To whome he aunsuerde and seide: "Elles I were nat good, wheder ye or any other boughte me." And seide to anothir: "That man dyspreyseth himself that dyspreyseth alle othir men and preyseth himself." And there was oon that prayed to God that He wolde kepe him from his frende. Thanne it was asked him: "Why prayest [fol. 59r] thu more that God shulde kepe thee more fro thi frende thanne fro thyne enemye?" He aunsuerd and seide: "For I maye wele kepe me fro myne enemye, whiche that I put no truste inne, and nat fro my frende, whiche that I truste." And somme asked of a wyseman: "Whiche bene thes thinges that bene moste noble amonge alle worldly thinges?" He aunsuerd: "Hate foly, love wysedome, and be nat ashamed to lerne." And it was asked of oon Artasan: "Whiche bene the sciences that children shulde lerne?" He aunsuerd and seide: "Thes sciences that shull make hem moste eschewe ig- noraunce in her age." And thei asked of anothir why he sette nat by sylver. He aunsuerd: "For it cometh to people by fortune, and it is kepte by negardship and by covetyse, and comounly it is lewedly spended and folily, in evel usage." And thei asked of Luginon what he hadde wonne in his science. He aunsuerd and seide: "I have wonne so moche that alle the goode dedes that I have done I dede hem with good herte and with good thought and good undirstondinge, and nat as con- streyned by the lawe." And seith: "The love of a fool shal do thee more noye thanne his haate." And anothir seide to a man of Irelonde, by weye of manace: "I wole do peyne for to destroye thee." To whome the tothir aunsuerd: "And I wole do my peyne to appese thyne ire." And there came before the kinge three wyse- men, wherof that oon was a Greeke, the tothir was a Jewe, and the thirde was a Sarazyne, to whome the seide kinge seide that eche oon of hem shulde shewe him somme notable seyenges. Thanne the Greeke seide: "I maye nat correcte nor amende my thought bettir thanne my worde." And the Jewe seide: "I have grete merveile of hem that speken thinges that bene hurtefull, for his holdynge peas were moche bettir." And the Sarazyne seide: "I am maistir of my worde or I speke it; and whanne it is seide, I am his servaunte." And thei asked him who was the beste kinge. He aunsuerd and seide: "That kynge that is nat subjecte to his wille." And Assoras seide to an evel payer, whiche came to the seide Assoras for to borowe moneye, and he seide that he wolde leene him none. "And yet," quod he, "it shal nat be so evel to me for to warne thee, as it shulde be evel for to aske my money agayne whanne I hadde lente it." And seith: "The wyseman speketh at the leste wyse by ymagynacioun, evenly demenynge his thoughte, and the fool speketh by ymagynacioun withoute thoughte." And Theophrastes seide: "That man is wele con- dycioned that can wele reporte the [fol. 59v] goodnesse of folkes and hyde here malyces." And it was asked of Dystomes how a man myght do that he hadde no neede to othir men. He aunsuerd and seide: "Yf he be a riche man, lete him leve menely; and yf he be a poure man, lete him put himself in excercyse of laboure." And Nychomake seithe that there is no bettir doctour thanne dyscrecioun, nor so good prechour as is tyme. "And he is right diligente and besy that correcteth himself by othir and that geveth bettir exsample to othir men thanne to himself." And Cyne- cus seithe: "Medle thee nat to teche nor to governe the werkes of fooles, for though so be that thei feele the charge and the peys of here thinges greete, yet wote nat thei what thei be worthe no more thanne horses or other beestes that bene charged with golde or othir ricchesses, and at the ende thei wole conne thee no more thanke thanne the beestes done hem that leyne the grete burdeyne on here backes." And it was asked of Aunselyne why men were punysshed by here dedes and nat by here thoughtes. He aunsuerd and seide: "At the leest weye there be thre thinges that a prynce oughte for to eschewe. That is to seye: for to drynke wyne to moche; secondly, he shulde nat haunte to moche mynstralsye ne musycienes; the thridde he shulde nat haunte the foolysshe love of wommen. For these thre thinges shull empeche alle his othir thoughtes." And anothir seithe: "Thynges that bene done, to forgete hem is the medecyne, for it maye be noon other." And Pillothecus made an oxe of myre and donge, and made his sacrefyce therof to the ydoles, seyenge in this wyse: "I wol nat offre a quycke thinge that hathe soulle to that thynge that is deed and hathe no soulle." And seithe: "Trouthe is good to be seide wheere that it is profytable to every man." And seith: "Yf thu mayste nat atteyne to come to the connynge of olde wysemen, yet studye and see here bokes, lyke as the blynde men make for to sette lyght before hem whanne thei go to here soper, though so be that it do hem but litil profyte." And Quirarus seithe: "I merveille gretly of hem that blamen alle evell thinges that thei see on othir men, and thei seeme that same faire upon hemself." And Dymocrates seith: "Pacience is a castell nat prynable, and grete haste bryngeth grete repentaunce aftir him, and hon- ourynge is fruyte of trouthe." And somme asked of Dyochomaces why the riche men were prouder thanne the wysemen. He aunsuerd and seide: "For because that the wysemen knewe oure Lorde before, wherfore thei durste never be proude, and the riche men take [fol. 60r] but litil knoweleche." And thei asked him wheder were bettir for to gete wysedome or ricchesse. He aunsuerd and seide: "There be no ricchesses goode but yf thei be profitable in this worlde and in the tother, but wysedome is good overall." And men seide to Arystotle that thei herde a man seye right wele of him, and he aunsuerd hem and seide that he wolde deserve it unto him. And thei asked him in what maner. "In lyke wyse," quod he, "as the trouthe that he seithe." And Octyphon seithe: "The herte of the people maye nat comprehende over the possibilité of here undirstondinge, but thei maye conne lasse, lyke wyse as a man maye put lasse lycoure in a vessell thanne it holdethe, but he maye put no more inne thanne it holdeth." And Orycas seithe: "A man of good understondynge maye overcome wel grete quantité of adversytees of this worlde, lyke wyse as the good maryner knoweth by experyence whanne he shulde put himself to the see." And Samaron seithe: "I have loste alle that I have, wherfore I am no more aferde." And Gesius seithe: "In alle thyne enterpryses, loke thu have more truste in thi connynge thanne in thi streyngthe." And Gregory seithe: "The peyntours maye wele peynte thynges that bene full lyke to that thinge that he peynteth it aftir outward, but of the thinges innewarde can no man make hem saulf nature." And the Kinge Cro- mesis called his brederne to him and seide: "Yf ye wole take me oonely but for youre brother, I wole shewe you that I am youre kinge. But and ye take me for youre kinge, I wole shewe you that ye be my brethren." And Tales Millesius seithe: "I merveille moche of hem that for getynge of good wole put hemself in perille of dethe every daye in the weye of marchaundyse or other weyes, as wel by lande as by watir, and wote never to whome her good shal be departed aftir here dethe nor how - and myght lightly gete connynge and with lasse peyne, by the whiche their good name myght gretely be commended aftir her deth." Wherfore oon seith in a proverbe: "He is nat deed as longe as his good name dureth." And Pyctagoras seithe: "Science hathe none enemyes but ignorauntes." And anothir seithe: "The tales of a fool bene as dyspleasaunte as the stynkynge of a careyne is to hem that smellen it. And the fooles knowe no more the lewednesse of here wordes thanne the careyne may smelle his owen stynke." And thei asked of anothir how thei myght kepe hemself from drynkinge of to moche wyne. He aunsuerd and seide: "Loke ye take heed of the grete inconvenyentes that fallen by [fol. 60v] men that bene dronken, and loke ye kepe you from drynkynge to meche." And Eugene seithe: "I see men that asken for torches, candelles, and othir lightes for to see the meete that thei eten, but thei seche no lyghtes for suche thinges as bene necessarye to the soulle. That is to seye: by good doctryne, by wysedome, by reasoun, and undir- stondynge." And Estrycon seithe: "The deth dyspleaseth every man saulf wyse men, and there is nothinge that putteth aweye the grete thought of deth so moche as dothe wysedome." And Adryan seith: "Yf I hadde wysedome for nothinge elles but oonely for to dyspreise the deth, yet oughte I for to love it wele." And Hermes seith: "The grettest profyte that I have founde in wysedome is that I have com- posed alle my thoughtes in oon." And Quirianus seith: "Syn a man maye nat be withoute thoughtes, he shulde thenke on these thinges that ben perpetuell." And Quirius seith: "Somme seyne it were good that every man were of oon condycioun, but me thenketh it shulde nat be good, for every man wolde comaunde and no man wolde obbeye; and therfore me semyth that it is covenable in this worlde that oon commaunde and anothir obbeye." And Dimicrates seith: "Whanne thu comest in straunge places, herken lightly othir men speke and consydre wele here sey- enges. And yf thu see that thu mayste speke as wysely or wyselyer thanne thei, thanne speke and teche hem surely. And yf thu canste nat speke so wele as thei, loke thu herken and lerne of hem." And seithe: "Peyne thee to lerne and to knowe before or grete thinges falle unto thee, as wyffe and children, labourages or other suche thinges falle upon thee." And Phelip the dyssiple of Pictagoras seith: "He ought nat to be holden for worthy that renneth upon anothir man that maye nat defende himself." And Silique seith: "Of alle the thinges of the worlde, meene is the beste, and the beste levynge in the worlde is to mesure his dispenses, for the wastynge of goodes is the keye of povertee, and also it is impossible for him to have the grace of alle folkes." And seith: "Loke thu bewar that thu be nat wrothe with him that seith trouthe; and have pacience, and it shal be good unto thee." And seith: "The evel lorde resembleth a man that is drunken, that in his drunkennesse fleeth from alle goode and faire vertues and loveth alle vyces and other lewed- nesses, and whanne his drunkennesse is passed, he dare nat for shame be aknowen of the lewednesse that he hathe done." And seith: "A kinge of good dyscrecioun ought nat to be deceyved, [fol. 61r] though that many men offre hem to him in his pros- perité; nor he shulde never the rather leve the worshippinge of his knyghtes and geve hem here wages, though so be he weene that he have but fewe enemyes, for in every place where he is, he shal have evermore adoo." And Moleyus seith: "He is nat riche that his ricchesses dure nat but litil, nor that maye litely be taken from him, ne suche also as duren longe, but the verrey true ricchesses bene thei that duren everlastyngely." And Bratalyque seith: "The covetouse men have never reste, nor the negarde ne the suspecious man maye nat have good lyffe." [fol. 66r] And Phelyp, kinge of Macedoyne, seide unto hem that counselled him that he shulde brenne the citee of Athenes whanne he had wonne it: "It shulde seeme thanne," quod he, "that we were conquered, and we bene conquerours." And Archide seithe: "Thi tunge maye juge a leesynge withoute consentynge of the herte, and therfore it is a faire thinge that the tunge and the herte be of oon oppynyon." And seith: "Re- quere nat of God that thinge that thu maist fynde, that is to seye, suffysauntee, that every man maye have. But requere that oonely that suche thinge as thu haste maye suffyse thee." And Pictagoras seithe: "He that beleeveth not in the resurreccion of deede bodies is lyke a shadowe or a beeste that is dombe, or elles a tree that falleth lightly for a litil wynde." And seithe: "We shulde sewe oure werkes by deliberacion and by grete provysyon, and not by aventure oonly." And seith: "Yf thu wilte ex- cede thyne enemye, loke thu calle him nat a jangelere, a foole, nor a sclaunderer, ne full of othir vices, for thi blame shal be to him a grete worship." And seithe: "A man that wil be allowed in his werkes shulde have a good frende that wolde reporte him forthe." And seithe: "A man shulde chastyse the peple more by goode and humble wordes and sweete thanne by evell and sharpe wordes." And seithe: "Kepe thi frende above alle thinges, and consydre wele what a losse it is for to leese him, for though thyne hous falle, thu leesest no more but the walles, but in the losse of thi frende, thu shalt wynne many enemyes." And seith: "Whanne a man is in his grete wrath, he is lyke an house that is sette on fyre, in the whiche for the quan- tytee and the noyse of the fyre the yghen maye nat see nor the eeres here. And lyke as a shippe by a grete and outeragious tempeste may nat be wel governed and ruled for the outerage of the tempeste, in lyke wyse a courage meoved with angre maye nat be wele governed ne appeesed, neithir by meanes ne steringes what- somever thei be. For anger is so cursed that a litil flame maketh lightly a grete fyre, and many tymes it is appeesed by scylence, lyke as the fyre is staunched by takinge aweye of the woode. And [fol. 66v] also lyke as a drunken man hath no knowelech of his drunkennesse as longe as it dureth, and aftir that whanne he seeth anothir drunk- en thanne he knoweth in what estate he was himself, in lyke wyse it is of a man that is wrothe." And seithe: "We sene comounly the wommen sooner wrothe thanne the men, the seeke men sooner thanne the hoolle, and the oolde men sooner thanne the yonge men, wherby a man may knowe that angre cometh of feblenesse of cour- age." And a man disputed with his servaunte, to whome he seide: "Holde thi peas, boonde-mannes sone." To whome he aunsuerd: "I maye nat be the wors for my lyne, but thu mayste be lasse worthe for thi condyciouns." And seith: "A wyse man shulde seye these thinges that bene covenable, and othirwhile heere that thinge that apperteyneth nat to him." And seith: "Ther is nothinge that maye greve thi frende so meche as for to have hym in suspescyon." And anothir seithe: "Loke thu be conversaunte with thi fellawes in suche wise that thei wil wysshe and desire to have thee agen in here presence whanne thu arte departed from hem, and that thei myght weepe aftir thi dethe." And there was a man that wepte the daye of the nativitee of his sone, whome oon asked wherfore he wepte and hadde so grete a cause to be mery. He aunsuerd and seide: "For because my sone gothe towarde his dethe." And somme asked of anothir who were thoo people that were leest hated. He aunsuerd and seide: "Thei that maye nother helpe ne noye and that do nother good ne harme, for the evell haten the goode, and the goode the evell." And anothir seide: "Custome is harder to breeke thanne nature." And another seithe: "There bene two maner of abstynences: oon is by constreynte and the tothir is of good wille, whiche is the bettir." And anothir seithe: "Loke thu speke nat of thinges but suche as bene profitable. And loke thu eete no more thanne is necessarye for thy sustenaunce. And loke thu aske nothinge but that thu arte possible for to have. And loke thu pleyne thee not on thi frendes. And loke thu dyspeire thee not of thees thinges that thu maiste nat amende. And aske nothinge of a coveitouse man. And holde faste that thu haste lerned. And lerne that thu haste nat knowen before tyme. And geve of that that thu haste. Wryte in thi seal or in thi signet that the goode and the evell shull ende, and loke upon that oftentymes. And have pacience in thyne adversitees." And anothir seith: "Oon of the thinges that makith a man sonnest to erre in his jugemente is short thenking [fol. 67r] and hastynesse for to speke." And oon rebuked a wyse man, to whom the wyse man aunsuerd: "Thu reprevest me for I shulde amende my vices." And thei asked of anothir wyse man wherof profyted a good sone. He aunsuerd and seide: "He geveth dilectacioun to his fader in his lyffe and putteth awey the doute of his deeth." And thei asked of anothir why he wolde have no sone. He aunsuerd and seide: "Whanne I see the love that a man hath to his sone and the grete peynes and sorowes that he hathe for hem, I had lever be withoute him thanne have him." And somme seyden to another, that wente in a straunge vyage, that he shulde nat go, for he myght lightly deye by the weye. And he aunsuerd hem seyenge in this wise, that the deeth was in a straunge cun- tree, even as it was in his owen chambre at hoome. And thei asked of anothir what thinge was that that was nat good for to do, though so were that it were true. And he aunsuerd and seide: "A man that preyseth his owen goode deedes, though so be that thei be true; and also for to lye othirwhile it is good, in gevynge comforte to his enemyes and save his frende from the deeth; and trouthe is nat alweyes good to be seide." And thei asked him what thinge was moste delectable. He aunsuerd and seide: "That thinge that might nat longe abyde in oon state, and that that a man maye leest fynde." And seithe: "A man that hathe wille to come to any goode, he shulde nat leeve it, though so were that he myght nat come therto at the firste tyme, but he shulde do his parte for to recover it agen, for there falleth at oon tyme that falleth nat at anothir tyme." And seithe: "The wyse man is never deceyved by flaterers and sweete wordes, lyke as the serpente is taken and eten of the pecocke for lokynge on the faire fedres of his taille." And seith: "A wyse prince shulde helpe hymself in the werre with goode and evell men in divers maners." And seith: "Yf thu have a man in hate, thu oughtest nat for that to hate alle his meynee." And somme seiden to anothir that a man had bought a booke and studyed nat therinne, to whome he aunsuerd and seide: "The bookes constreyne nat a man for to reede hem." And anothir seithe: "Men shulde serve God in ten maners. That is to seye: yelde graces to God of the goodes that He hathe sente hem; suffre paciently the adversitees that thei resceyven; speke thinges that bene true; holde that thei promyse; juge truly; and to have good attemperaunce; to do wel aftir her power withoute requeryng; worship theire frendes; and forgeve also the fautes of theire [fol. 67v] frende and of his enemyes; and desyre nat ne do nat to other men suche thinges that he wolde nat have himself." And he was blamed for he gafe moneye to an evel man that was poure, and he aunsuerd unto hem that blamed him: "I have nat geven him the moneye as for an evel man, but as for a poure and a nedy man." And seith: "A man shulde worship the goode folkes in here lyfe, and preye for hem aftir her dethe." And seith: "The excercise of diverse werkemen putteth aweye the dilectacioun of the body." Thanne somme asked him how longe it was syn he was a wyse man. He aunsuerd and seide: "Sythen that tyme that I began to dyspreyse my lyffe." Thanne he herde a man that rehersed leesynges and wordes that were impossible, to whome he seide: "Yif anothir tolde thee thes wordes that thu seyste, thu woldest nat beleve him, wherfore thu shuldest holde thi peas and thenke that men beleve nat thee." And Arystophanus seith: The victorye of worde is no victorye, but the verrey victorye is in dedes." And Anaxagoras seith: "The wyse man dredeth not the dethe, for wysedome governeth his undirstandinge, his tunge is voyce of trouthe, his herte is good wille, pytee and mercy bene his frendes, his feete bene the seechers of wysemen, his lordship is justice, his regne is mesure, his swerde is grace, his speere is peas, his arowe is salvacion, his knyght- hode is the counsell of wysemen, his arraye is streyngthe, his thresoure is disci- plyne, the companye of goode is his love, and alle his desire is for to flee synne and to sewe and love God." And anothir wyse man seide that he hadde gone aboute the barrage of a good towne, that is to seye, for to gadre a newe subsedye whiche the lorde of the towne had sette. Thanne oon seide unto him: "Arte thu nat wrothe with that thu haste done?" To whome the wyse man aunsuerd: "It is even soo with me lyke as I hadde dreemed it." And seithe: "The frendes ben of noble affeccion, wherfore a man shulde kepe hem wele and geete oon aftir anothir, lyke a colver that is pryvee draweth straunge doves to him and maketh hem pryvee." And a kynge asked of a wyse man who he wolde thenke shulde be a juge. He aunsuerd and seide: "That man that is nat meoved by flaterers, nor he that wole nat be overcomen with geftys, and he that is nat deceyved by faute of dyscrecione." And anothir seithe: "Sclaunderers bene worse thanne theefes, for theefes steele not but goodes, and sclaunderers taken and steelen aweye the worship of a man." And anothir seithe: "Worship geven to a man withoute cause, in the ende it shal be [fol. 68r] turned into shame." And anothir seith: "It were better to dwelle with a serpente thanne with an evel womman." And seithe: "Oon oughte to doughte the subtilitees and the engynes of his enemye yf he be wyse; and yf he be a foole, his cursyd- nesse." And anothir seithe: "The moste liberal man of the worlde is he that taketh for a grete thing the goodnesse that oon dothe him, and for litil the goodnesse that he himself dothe to othir men; and also he that holdes him contente with that he hathe, be he ryche or poure." And seithe: "The moste nygarde of the worlde is he that asketh over beesily a thinge aftir that that he is seide pleynely naye to and utterly refused." And another seithe: "Envye destroieth the worlde, and weres it as the fyle dothe the yren." And anothir seithe: "Lyke as a man maye nat wryte in a letter that is wreten inne before onlasse thanne the writynge be defaced before, in the same wyse a man maye not putte the vertues and the noblesses in a body on- lasse thanne the vices and the ordeures bene voyded oute therof." And anothir seithe: "Lyke as a man maye nat see allatoones with his yghe bothe the heven and the erthe, in lyke wyse a man maye not applye his witte bothe atoones to vertues and to vyces." And seith: "The verey true and stable love is whanne the frendes bene of lyke condycioun, for yf thei have divers and contrarye condycions, with grete peyne the love shal endure." And seithe: "The people aughte for to obbeye and doute the kinge and for to love him and dreede him." And somme asked him what tyme a mannes witte was parfyte. He aunsuerd and seide: "Whanne he speketh nothinge but allewey wele to the poynte." And anothir seithe: "The envyous man hateth the liberal man, and the covetouse man is wrothe with that that other men spenden." And another seithe: "Wynnynge may nat be with justifi- cacioun, ne helthe with glotonye, frendeship with deceyvenge, justice with neces- sitee, noblesse with dysciplyne, love with pryde, reste of herte with envye, wyse dame and dyscrecioun with vengeaunce, nor processe withoute counsell." And anothir seithe: "Loke thu put not thi truste in a foole nother for love ne for neigh- burhed that thu haste in him, for it were as good have the neighburhed of an hous that is sette on fyre." And seithe: "He is right a grete enemye whos dedes bene felle and bitter, and his wordes sweete and curteys." And anothir seith: "The wyse man dureth while the worlde dureth, and aftir his dethe [fol. 68v] his ymage shal endure in the hertes of the people." And another seithe: "Ho that consydereth the ende of thinges, it helpeth him meche for to werche wele." And anothir sethe: "Thu shuldest love whedir thu be loved or not." And anothir seithe: "The foole wenyth alwey that God hathe employed nothinge wele but that He hathe geven unto him, and he weneth also that he coude have made the worlde bettir thanne God, though so be that he can nat wele governe his owen persone." And another seithe: "Loke ye geve and do wele to the poure and needy people, for in so doynge, ye shal serve and please God." And anothir seithe: "It is bettir for a man to holde his peas thanne to contrarye and argue with a foole. And it is bettir to have the enemytee of an evel man thanne his frendship. And it is bettir to have a sharpe lyfe in doynge wele thanne to have a plesaunte lyfe in doynge evel. And it is bettir to be withoute renoune thanne for to have it evel. And povertee is bettir thanne the ricchesse of caytefes. And it is bettir be poure withoute vices thanne ryche to be worshipped by synnes." And anothir seith: "It is better a man knowe nat a kinge that is nat juste thanne to be his secretarie or nexste aboute him." And another seithe: "Yf thu geve any man for to be wele named therby oonely, it is no liberalté, for thu doste nat but for thi profyte." And anothir seithe: "Ho that pleyeth ungoodely pleyes, it is a signe of pride and it shal gladly ende in angre." And anothir seithe: "He ne ys to be allowed in his levynge that taketh nat this daye as good or better as that that is passed." And another seithe: "Thu mayste nat have that thu desierest, but yf thu susteyne firste that thing that thu woldest nat have." And seithe: "The men shull be in thyne handes as longe as thei maye truste in thee." And somme asked of a wyse man why he wolde have no sones. He aunsuerd and seide: "For I have hadde ynough adoo to chastise my body, and to redresse my soulle, though I hadde none other to redresse and teche." And thei asked him ho it was that repented him moste in this worlde. He aunsuerd and seide: "The wyse man at the houre of his dethe that hath nat wrought aftir his wisdome, and that man also that hathe done wele to a nygarde." And thei asked him what thinge encresed the lawe. He aun- suerd and seide: "Trouthe." And thanne thei asked him what thynge sustened trouthe, he aunsuerd and seide: "Witte." And thanne: [fol. 69r] "Ho governeth witte?" He seide: "The kepynge of a mannes tunge." "Ho kepeth the tunge?" "Pacience." "Ho maketh for to have pacience?" "The drede of God." "And what maketh a man to drede God?" "Spekinge of the dethe, and to knowe his freelté." And anothir seithe: "Superfluytee maketh the body seeke, the wyne troubleth the witte, wrathe is contrarye to sapience, but attemperaunce comforteth the herte; it putteth awey hevynesse and sendeth heele." And seithe: "Though so be that the wyse man be of lowe lynage, yet is he noble; yf he be a straungier, he is worshipped; yf he be poure, yet men have neede to him." And another seithe: "He that endureth noth- inge in his youthe shal nat be in rest whanne he is aged." And another seithe: "The erroure of a foole wexeth lesse by oftentymes thenkinge theron." And anothir seithe: "The tunge of a discrete man is in his herte, and the herte of a fool is in his tunge." And another seithe: "A man shulde contynuelly enquere and understonde what men seyne of him, wherinne thei preyse him and wherinne thei blame him. Yf thei preyse him in his deedes, loke he use hem and do hem alweye; and yf thei blame him, kepe him wele that he falle no more in hem, withoute hatyng of hem that dispreysed his dedes." And seithe: "He is holden for the beste that meketh himself in his highnesse, and in his grete estate dispreyseth the worlde and is wele attempred whanne he is in his grete myghte." And thei desired of a wyse man to telle hem what was the defference betwene this worlde and the tother. He aun- suerde and seide: "This worlde is a dreeme and the tother is a thynge that is wak- inge the mydde of the dethe, and we bene the vanytees and the dreemes of this worlde." And anothir seith: "Natwithstondynge thy nature, accustome thiself alle- weyes in suche condycions as bene lowable." And anothir seithe: "In afflyccyons, in grete beerdes, in longe heeres, is nat the servyce of God, but it is oonly to kepe himself from vices and to applye his werkes in goode vertues." And anothir seithe: "To speke wele is bettir thanne to holde peas wele." And anothir seith: "I was ac- companyed with ryche men and I sawe here clothinge and here araye and other bettir thinges thanne myne were, wherof I hadde so grete envye and malencolye that I myghte have no reste; thanne I fellashipped me with poure men and thanne was I in rest." And anothir seithe: "Lyke as a feoble sighte maye not see in his pro- pre fygure, in lyke wyse the soulle that is not clene [fol. 69v] maye not perceyve cleerly the verrey goodnesse." And anothir seithe: "Lyke as the children that bene in the modre wombe entre into the worlde with peyne and sorowe, and aftirwarde bene joyefull whanne thei wexe grete and have felte the swetnesse and delyces of this worlde, in lyke wyse the men sorowen at here dethe and aftirwarde gone to a betir worlde where thei bene gretely enjoyed." And anothir seithe: "Lyke as the good- nesse of wyse men is allewey amendynge, in lyke wyse gone the malyces of a foole in empeyerynge." And anothir seithe: "Yf thu correcte a wyse man, he wole cone thee thanke, and yf thu teche a foole, he wole dyspreyse thee." And anothir seithe: "He is a frende that in thy neede abandoneth himself and his goodes at thy plea- sire." And anothir seithe: "The governour of a wyse man is pacience, and pride governeth a foole." And anothir seithe: "That man is slowe in his besynesse that comounly is envyous of other mennes besynesses." And anothir seithe: "It is good for a man to enquer twyes of a thinge, for the firste enquerye is trouthe and the secunde is dyscrecioun." And anothir seithe: "Trouthe is a messangier of God, wherfore a man oughte gretely to worship it for the love of his maister." And anothir seithe: "Ho that encreseth and multiplyeth his temporell goodes, he shal amyneuse the spirituell goodes." And another seithe: "Thei that dreeden and beleeven in God stedefastely have no delectacioun but oonely in Him and in His werkes." And anothir seithe: "The moste true werkes bene thei by the whiche men obbeye the pleasires of God; and the werkes of the body joyned with the werkes of the herte bene more true thanne the werkes of the herte oonely." And anothir seithe: "The evell men bene wors thanne deede careynes, venymes, leouns, or ser- pentes; and in lyke wyse there is nothinge better upon the erthe thanne the goode creature, and in the same wyse there is nothing wors thanne the evel creature." And seithe: "He that areyseth himself in a gretter estate thanne longeth unto him dothe grete peyne to have the wordes of envyous folkes." And anothir seithe: "He that wole have reste in his lyfe muste kepe him from foure manere thinges: the firste is that he make no sorowe though a man lefe that he wolde were dede; the sec- unde is yf any man deye whiche he wolde have for to lefe; the thirde is though he may nat have that he coveyteth; the fourthe is though he see fortune areyse another man of a lower degree thanne he is himself." [fol. 70r] And seithe: "That thinge that maye moste kepe a man oute of alle empechementes is for to be litil conversaunte amonge the people." And anothir seithe: "The evel kinge is lyke a careyne that maketh alle the erthe aboute him for to stynke." And anothir seithe: "The wyse men bene not contente of the profyte that falleth oonely to hem, but in lyke wyse of the profyte that falleth to othir men. And the fooles empeche not onely hemself, but thei travaile allewayes for to empeche othir men." And anothir seithe: "A foole for a litil wynnynge dysposeth himself lightly to the weyes of fortune." And seithe: "Thu mayste nat be so wele arrayed in any wyse as with trouthe." And another seithe: "A man that absteyneth himself from angre and covetyse, it is a vayleable thinge in this worlde and in the tother." And seithe: "He that geveth good counsell and aftirwarde shewith himself of good discrecioun ought to be holden for wyse." And anothir seithe: "Loke thu leve nat for to do wele though so be that thi goode dedes be not knowen, for the good deede is so good in itself that it shal worthe goode ynough to thee." And seithe: "A man of good dyscrecioun shulde nat put himself in excercise of thinges that bene impossible, ne make his dyspenses gretter thanne his wynnynge, ne promyse more thanne he maye paye." And anothir seithe: "A man maye nat have but povretee and laboure in his lyfe, for yf he eete not he shal deye anone. And yf he eete any more thanne him oughte, it wyl greeve him and he shal nat sleepe wele. And yf he eete to outeragyously, he shal be seeke. And yf he eete to litel, he shal deye for hunger, wherfore it is an harde thinge and a straunge to be longe in suretee." And anothir seithe: "Loke thu truste nat in him that forswereth him by his feithe for any worldly thinges." And anothir seithe: "Idelnesse engendereth ignoraunce, and ignoraunce erroure." And anothir seithe: "Thu shalte fynde overall coverynge, vytaile, and places for to abyde inne, but and so be that these thinges that bene necessarye to thee suffyse thee not, thu shalte be boonde to covetyse." And anothir seithe: "In longe sleepynge is no profyte, but grete hurte in the contynuaunce; and he shulde keepe him that he use not halfe his lyfe in ydelnesse." And anothir seithe: "The goode soulle wole have no grete reste in this worlde here." And anothir seithe: "Kepe thee frome fellaship of a lyere in alle besynesses, be thei grete or smale." And anothir seithe: "Ho that loveth thee for vanytees and worldly thinges, he wole hate thee for the same thinges. But he that loveth thee for the perpetuell goodes shal alleweyes be encresed [fol. 70v] in thi love." And anothir seithe: "Governe thee so wele that thu mayste kepe thee frome evell doynges, and thanne suffyse thee with the goode dedes that thu mayste do aftir." And anothir seithe: "Ho that wole knowe wheder his soulle be clene or foulle, lete him consydre his delectacioun. And yf he delyte him in profitable thinges and withoute ende, his soulle is noble and worthy. And yf so be that he sette his delec- tacioun in foulle thinges that bene transytorye and unprofytable, his soulle is foulle, for everythinge rejoysseth with his sembleable." And anothir seithe: "He is blessed that gothe the righte waye, for he shal the sonner fynde the ende of the weye that he gothe to; and he that gothe oute of his weye, the more he gothe the further he is from his weyes ende." And somme asked of a wyse man what was par- fyte folye. He aunsuerd and seide: "He that weneth to come to goode estate by evell werkes, to love falshede and hate trouthe." And somme asked him what was the ende of folye. He aunsuerd and seide: "To love ricchesses and truste every man to moche." And thei asked him what is the sygne of litil syght and litil knoweleche. He aunsuerd and seide: "To truste in him that hathe deceyved men before tyme." And suffyse thee of the translacioun of morall seyengis of phylosophye.    Here endeth the booke of morall seyenges of philysophres, translated oute of Frenshe into Englysshe.