1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 247 248 249 250 251 252 253 254 255 256 257 258 259 260 261 262 263 264 265 266 267 268 269 270 271 272 273 274 275 276 277 278 279 280 281 282 283 284 285 286 287 288 289 290 291 292 293 294 295 296 297 298 299 300 301 302 303 304 305 306 307 308 309 310 311 312 313 314 315 316 317 318 319 320 321 322 323 324 325 326 327 328 329 330 331 332 333 334 335 336 337 338 339 340 341 342 343 344 345 346 347 348 349 350 351 352 353 354 355 356 357 358 359 360 361 362 363 364 365 366 367 368 369 370 371 372 373 374 375 376 377 378 379 380 381 382 383 384 385 386 387

N N N N N N N N N T N N T T N N T T N T N T N N

[fol. 35v] Aristotle is as moche to seye in the language of Greeke as "fulfilled of bountees"; and his fadir was named Mecynachus, and was a passinge wise man in phesyk, and was a phesycian to Kinge Alysaundres ayel. And the seide Arystotle was borne in a citee whiche was called Stragyre, and was as nygh of the fadir syde as of the moder syde of the lynage of Esculapyus, of the whiche is made mencyon here- tofore, whiche was the beste lynage of alle Grece. And whanne Arystotle was of the age of eight yere, his fadir brought him to the cytee of Athenes, whiche at that tyme was named the citee of wyse men. And there he made him for to lerne gramer and rethoryk and the bookis of poetes. And there he studyed by the space of nine yere and profyted gretely, for at that tyme somme men sette right moche by thees sciencis aboveseide, and helde oppynyoun that thei were the ladder wherby men myght clymbe up to alle othir sciences. And somme othir were wysemen at that tyme as Pyctagoras, Pychoras, and many other, helde hem as for nothinge, and mokked hem that lerned thes sciencis, seyenge that suche sciences as gramer, rethoryk, and poetrye were nat covenable to gete any connynge where wysedam was inne; and that gramere was noughte but for to teche children, and poetry for to telle fables and compose lesynges, and rethoryk for to polysshe and make faire his wordes and sette hem pleasauntly togeders. And whanne Aristotle herde thes thinges, he merveylled gretely and was gretly ameved agenste hem that helden suche openyoun, and enforced himself to his power for to susteene gramaryens, the poetes, and the rethorycyenes. And seide that sapience myght nat excuse him- self from the sciences aboveseide, lyke as resoun was the instrumente of sapience; and it apperith openly, ho that wole knowe anything, he muste have it by reasoun, for in that God hath geven a prerogatyf to man over alle othir beestis for the moste worthiest, to that entente that amonge alle men he is holde moste noble and most rightwos that useth reasoun, and he that moste covenably resceyveth in his herte the derke thingis, and he that pronownceth hem in tyme and in place cov- enable. And forasmeche as sapience is the moste noble of alle other thingis, it shulde be shewed by the bettir reasoun and in the moste covenable maner, by wordes most propre and as shorte as a man coude goodely shewe hem withoute empechemente of errour, for yf a resoun be shewed unparfytely [fol. 36r] the name of sci- ence lesyth and he that redes it is in defaute, and thanne the heerers bene in doute. And whanne Aristotil had lerned the sciencis aboveseid, he lerned etyque and the foure sciences of theologie. And lerned of Plato in a place whiche was called Lopedimie in the terroyre of Athenes, and at that tyme Arystotle was seven- tene yere of age. And whanne Plato wente the secunde tyme into Cecillé, he lefte Arystotle in his place in the same towne of Lopedume in the whiche he lerned his science. And aftir that Plato was dede. The Kinge Phelyp sente for Arystotle, the whiche wente to him to Macedoyne and dwelled with him alle his lyfetyme, where he shewed his grete connynge. And aftir the decesse of the seide Phelyp, the grete Alysaundir his sone regned. Ande whanne Alysaundir departed from Macedoyne for to go unto the regyoun of Dayse, Arystotle retourned agen into Athenes; and there he abode ten yer, and there he studyed til he was a passinge sovereigne clerc. And it happened for envye a preest appeched hym to the cetezeyns and tolde hem that he worshipped nat the ydolles lyke as othir dede in that tyme, the whiche thinge was shewed anon unto Arystotle; and sodeynly he departed and wente to a town whiche was called Stragye, wherinne the seide Arystotle was borne: for he douted that yf he had taryed any lenger in Athenes, thei wolde have done by him as thei dede by Socrates, to whom thei gafe the venyme for to drynke, wheron he deyed, and for that cause oonly that he repreved alle hem that dede worship the ydolles, as it is more pleynly declared before. And in the seid town of Stragye he ordeigned a place where that he helde his scooles and there he taughte many goode thinges to the people, and dede his peyne for to do wele to the people, as for to gefe almes to the poore, and to mary the poure maydens and orphelynes. And he gaf also to alle hem that had luste to studye of what estate or degree that he was of. And also he bilded and made newe the seide towne of Stragye, and there he stablisshed lawes that kinges helde hem in grete worship and in grete reverence, him and alle his dedis. And aftir he deyed in the sixty-fourth yere of his age, and the people of the seid towne of Stragye token his boonys and leide hem in a tombe in the place where thei holde here counsellys for the weel of the towne, and as wel for the grete goodnesse that was in him as for the love that thei loved him. And thei dede him so grete reverence and had so grete affeccion in that toombe where his boonys laye [fol. 36r] inne, that whanne thei were in any perplexitee of any grete thing, thei wolde go and dispute theire matiers as nygh as thei myghte to the saide toombe, and there thei wolde abyde unto the tyme that thei knew the trouthe of here matiers. And thei hadde suche an hoope that yf thei helde here counsell nygh the toombe where as Arystotles bonys laye inne, as it is seide before, that here wittes shulde be the gretter and the more subtyle to here undirstandinge. And thus thei dede for the more worship to him aftir his deth and to shewe also that thei were right sory for the losse of so good a man. And this same Arystotle had many kinges and many kingis sones to his dyssiples, and composed wel an hundred bookes, of the whiche we have at this tyme eightene of logyk, and eight of nature, the booke of etyques, the booke of polletyques, the booke of metaphesyk, whiche is named Detheologye, and the booke of the engynes of geometrye. And Plato repreved him for he wrote his connynge in bookes, to whome Arystotle aunsuerd and seide, in excusynge himself, that it was a sure and notable thynge for hem that loved science, for thei shulde lose nothinge that thei had lerned, but thei shulde fynde it agen in here bookes: "wherfore it is good that we make bookes, by the whiche men maye lerne all maner scyence, for whanne that mannys mynde is loste, it maye be recoverd agene by the meane of bookes. And sothely, thei that haten science shulle nat proufyte therinne, though so be that thei have bookes; and though thei have bookes, yet thei sette nat by hem, and so thei departen wors and with lasse connynge thanne before. And I have ordeigned my bookes by suche condycions that the wysemen shulde undirstonde hem, and the ignorauntes for to have litil profyte." And Arystotle helde gladly in his hande an instrumente of the sterres; and Arystotle seide: "He that hadde a good name in this worlde, and the grace of God with all, ought nat to aske none othir thinge." And seide to Alysaun- dir: "Redresse thiself firste, for yf thu be nat wele redressed, with gret peyne thu shalt redresse thi people; and yf thu be in erroure, thu mayste nat wele governe. The passynge feble man maye nat wele comforte othir men, and there maye no man wele redresse anothir but he first begynne at himself, and therfore yf thu wilt putte aweye the fylth of othir men, clene thiself firste, or ellis thu shalt be as the seeke leche that can nat heele himself nor othir men that bene in the same mal- adye." And seith: "That thinge that redresseth beste the nedys of the people is for to have a rightwose lorde. And that thynge that [fol. 37r] moste hurtes hem is to have a corupte lorde." And seide: "Kepe thee from covetyses, for yf thu thenke wele theron, thu shalt fynde that it is nat lowable for to have worship in this worlde and shame in anothir, for this worlde is but an hous of passage for to go into anothir. And yf thu wilt be ryche, suffyse thee with that that thu haste, for that man maye never be ryche that holdeth him nat contente with that that he hathe, be it never so litil." And seith: "The cursednesse of this worlde is good to knowe, for there maye no man be worshipped withoute dysworshippynge of other." And seith: "If it happened that of an evel dede there felle to thee some maner of good, or of a good dede there felle to thee some maner of harme, yet loke thu eschewe allewaies the evel dede, for thu shalte ellis be begiled at the ende. But loke thu do wel alleweyes, for at the ende thu shalt fare the bettir." And seith: "What thynge that is preysed upon thee, loke thu blame it nat upon anothir man." And seith: "Loke thu do to no man othirwise thanne thu woldeste he dede to thee. Refreyne thi will. Eschewe covetyse. And loke thu hate no man. Kepe thee from envye. And yf any man erre ageyns thee, yet for all that have him nat in thyne indignacioun, for there maye no man eschewe errour and kepe thee from suche covetyses that shulde em- peche thi reasoun and destroye trouth." And seith: "Loke thu use nat thi lyfe in suche thingis as bene unprofitable, and also put thee in the fellaship of wysemen, and studye in here bokes. Flee leesynges, for the lyers lyen not but for that thei recche not of reasoun of here soulle; and the leest harme that may come to a lyer is that no man wole beleeve that he seyth; and yet natwithstandinge, a man maye bettir kepe himself frome a theef thanne from a lyer." And seith: "The hertys of goode men accorden soone togedir, lyke as the reyne is lightly medled with the watir of the see; and the hertes of evel folk accorden nat lightly, though so be that thei be alweye togedre, lyke as beestis maken moche of othir and soudeynly thei fallen at debate." And thanne he taughte Alisaundir, seyenge to him: "The firste thinge that ye shal do: establisshe youreself, and that ye geve nat youre goodes awey but to hem that loven and sewen trouthe. And loke ye do rygorous peynes to hem that loven falsheed and dothe harme to othir folkes." And seith: "Yf thu have a dowte in anythinge, loke thu have recours to the wyse men; and yf the wyse men dyspreyse thee, loke thu be nat wrothe therfore, for there is no man but he hath somme vyce, and yet he hath many othir goode vertues, and therfore a man shulde nat lette for to aske hym counsell." [fol. 37v] And seide to Alysaunder that "to moche people wole hurte thee and annoye thee, for thei maye nat helpe thee." And seith: "Justyce is a mesure that God hath stablisshed upon the erthe, by the whiche the feeble bene defended fro the myghty and the true man fro the lyer. And he is right a grete foole and foulle deceyved that wil dyspreise that noble dysposicion." And seith: "The wyse man knoweth the ignoraunte for he was oon himself somtyme, but the ignoraunt was never wyse, and therfore he myght never knowe wysedame." And seide to Alisaundir: "Knowe right wele that all besynesses of the reame that longen to thee be but litill; and yf thei be generall withoute comyttinge to other, and yf so be that thu commytte the grete thingis to othir men and takest upon thee the smale thingis, thu shal parceyve right wele that in tyme to come grete hurte shal falle unto thee or ellis sooner thanne thu wenyste." And seith: "Lyberalté is for to gefe to the nedy people or ellis to him that hathe deserved it, or to him that is in wille for to deserve it. And loke that the gyfte be meetely aftir the power of the gever, for he that geveth over his possibilité oughte to be called a wastoure and not liberal." And seith: "Wysedame is as a thinge that defendith the soulle and the myrroure of reasoun. O what he is wele at ease that enforceth himself for to gete it, for it is the fundacioun and the roote of alle noble thingis. And by it we maye have the good ende and to kepe oureself from alle grete turmentis." And seide: "O Alysaundir, if thu wilt use thi lordship otherwise thanne thu oughteste, envye shal falle upon thee and of envye shal come lesynges, and of lesynges hate, and of hate injustyce, of injustyce injurye, of injurye bataile, and by bataile the lawe shal perysshe, and thi possessyons shull be loste. But and thu use thi lordship as thu aughteste, trouthe shal growe in thy reame and by trouthe shal come justice, and from justice love, and frome love grete geftys and sureté, by the whiche the feyth shal be mayntened and thy people encresed." And seith: "Ho that stablissheth his reame to be servaunt of the lawe, he shulde regne; and ho that seweth the lawe, it maketh him to encrese." And seith: "A kinge shulde be of grete courage, and thenke what shal falle of the ende of his dedis, curteys and debonayre. He shulde also refreyne his wrath where that him oughte to do it, and to shewe it there as it is nedfull; and kepe him also from covetyses, [fol. 38r] to leve truly and to governe him as nygh as he maye aftir his predecessours, and to ordeigne for his people lyke as thei be and as thei have deserved; and defende and kepe the lawe and the feyth, to do wele at alle tymes and to be stronge. And yf the strengthe of the body faile him yet lete him have the strengthe of courage, by the whiche he shal be assured in alle his nedfull thinges and at the leste weye that same strengthe shulde suffyse him." And seith: "That kinge that governeth himself wel by his wysedame is worthy to have grete laude." And seide: "O Alysaundir, gete thee ricchesses that wole nat passe aweye, a lyfe that wole nat chaunge, a reame that maye nat be take awey, thinges that bene perpetuell. And loke thu be petevous, and nat oonely suche pitee as maye cause thee for to have harme therby, but loke thu do punycioun on hem that have deserved it withoute dyfferrynge. Laboure for to fortefye the lawe, for in that is the drede of a lorde. And whanne thu mayste take vengeaunce of thyne enemye, loke thu deferre it not unto anothir tyme, for the statis of this worlde chaungen sou- deynly." And seith: "Thu oughtest nat to hate him that seith trouthe, nor tempte nat him that kepith his feythe." And seith: "Stablysshe the feithe in the begynnynge of thi regne, and it is bettir that thu amende and corecte aftir the exsample of thi predecessours thanne thi successours shulde amende it in exsample of thee." And seith: "Worship the goode folkis, and by that thu mayste gete the love of thi people. And sette nat all thyne entente on this worlde wherinne thu shalte nat longe abyde. Worship sapience and fortefye it in goode maners by goode maisters, by dyssiples, and by scolers; honoure hem and helpe to paye her dispence, and holde hem of thyne housholde lyke as thu seest that they have profyted in science, and thu shalte fynde that grete worshippe and profyte shal come to thee therfore." And seith: "He is of grete corage and of good dyscrecion and of a true feythe that taketh paciently his adversytees, for oon can nat knowe a man in his prosperitees." And seith: "Thu shuldeste thenke that the moste feble of thyne enemyes is more stronge thanne thiself." And seith: "Thu shuldest as wel cherysshe thi knyghtes in tyme of peas as in tyme of were, for yf thu wilte nat please hem nor sette by hem in tyme of peas, they wole quyte thee wel ynough in tyme of werre, whanne thu shalt have neede unto hem." And seith: "The gretteste proufyte that thu mayste do to thi reame is for to putte awey the evel people and to rewarde wele the good people." And seith: "That man is of evel condycioun that taketh none [fol. 38v] heede but to the vyces of othir men, and that preyseth himself in dyspreysinge othir folkes." And seith: "It is bettir to deye worshipfully thanne for to lefe in shame." And seith: "The wysedame of a man that is of poure lynage is worshipfull, and the foly of him that is of grete lyn- age is the grettest shame that maye be, and covetyse is the thing that moste taketh awey the name of gentilnesse." And seith: "A good governoure shulde take his people as his kynne, and his kynne as his frendes, and not as his thresoure or his heritage, and delyte himself in that that he hath of his people rightwosly, and nat of that that he hathe by vyolence." And seith: "There shulde no man be ashamed for to do justyce." And seithe: "If the kinge be nat rightwose, he nys not kinge, but a vyolente man and a raptour." And seith: "The evell folkes obeyen for feere, and the goode obeyen by her goode dedis, and whanne a man knoweth these two maner of peple, a man shulde do wele to the goode folkes and chastyse rigorously the evel people." And seith: "Thyne angre shulde nat be to sharpe ne to lighte." And seide in a pystel whiche he sente to Alysaundyr that the kinges bene wor- shipped for thre maner causes, that is to seye: by instituciouns of goode lawes, by conquestis of regyons, and of landes that bene deserte for to fylle hem with people. And he wrote also to Alysaundir that he shulde nat at all tymes correcte the people with rygour, for the people maye nat at alle tymes kepe hemself oute of defaute. Wherfore a man shulde at somme tyme pardone here trespasses; and yf so be that a man muste nedys do punycioun, a man shulde shewe that he were constreyned in maner for to redresse it, and nat to shewe that he doth it vengeably. And he sawe a man whiche had his hande kutte of for a thefte that he had done, and thanne he seide: "For because that he toke awey othir mennys thinges, thei have taken awey that was his." And seith: "How shulde oon foole love anothir whanne he can nat love himself?" And seith: "Thu mayste nat be bettir loved of thi people ne to have thi lordship for to endure thanne for to do wel to thi people, for yf thu greeve hem and hurte hem though so be that thu be lorde over here bodyes, yet shalte nat thu be lorde over her courages. And knowe right wele that it is grete per- yll for a man to wrath his people in many maners, for he shal nat be wel beloved of hem." And seith: "He is right an happy man that can chastyse himself by othir men." And seith: "Fortefye youre soulles and [fol. 39r] departe you from thes covetyses that destroyen the feble coragis." And seith: "There is nothinge that maketh a man lasse worthy thanne to make his avaunte of the goode dedis that he hath done." And somme seide unto him: "What is the cause amonge you wyse men that ye be nat wrothe whanne any man wole teche you?" He aunsuered and seide: "For we take it for a profitable thinge." And seith: "He that hath no power for to do wele yet at the leest weye lette himself from doynge evel." And seide to his dyssiples: "Loke ye have foure eeres, of the whiche lete tweyne of hem be redy for to here these thinges that profyten, and the tothre tweyne for to forsake the thinges that be nat profitable." And thei asked him what was the moste profytable thinge that myght be to the world. He aunsuerd and seide: "The dethe of evell folkes." And seith: "A man maye never knowe a persoone so wele as whanne he is in his gret lordship and myghte." And Arystotle seith: "Of alle thinges in the worlde the lighteste thinge is moste easyest for to beere but oonly connynge, for the more that a man hathe therof, the lighter he shal bere it." And thei asked him what was the moste covenable thinge for a dyscrete man to have. He aunsuerd and seide: "These thinges that leven with him yf he escaped oute of the perell of the see naked." And seith: "Of alle connynge a man shulde chese the beste, lyke as the bee chesith oute the beste thinge of the floure." He hadde a place whiche was his enherytaunce, whiche he put to the rule of othre folkes, for he wolde nat come there himself, and thei asked him whi he wolde nat go see his lyfelode. He aunsuerd and seide: "For he that moste ofte vesiteth his places is moste oftentymes wrothe." And seith: "The tunge of a foole is the keye of his secretes." And seide to oon that was slowe to lerne: "If thu wilte nat take peyne upon thee for to lerne, thu shalt have the peyne as he that knoweth nat whiche is moche gretter thanne the tothir." And seide to oon of his dyssiples: "Loke thu bewar that thu fellaship nat with that man that knoweth nat himself." And seith: "Thei that bene enclyned at alle tymes and abandoune hemself unto vyces maye never resceyve encrece ne profyte in science." And seith: "If thu wilt gefe unto thi body all his willes and lustes, it shal be the wors for the body in his helth and othir thinges, and the soulle shal falle unto perpetuel dampnacioun." And seith: "Ho that is enclyned uttirly to fornycacioun, at the ende he shal have no worship therof." And seith: "A man that is joieful, it is grete peyne to make him wrothe, and a liberal man [fol. 39v] maye nat be envyous, ne a covetouse man shal never be ryche." And seith: "A man is preved by his dedis lyke as the golde is tryed by force of the fyre." And oon of his dyssiples compleyned unto him upon oon of his fellawes and seide he hadde done hym wronge, to whome he aunsuerd and seide: "I wol nat beleve thi tale oonly agenste thi fellawe, for I wol nat beleve his tale agen thee." And seith: "In lyke wise as the reyne maye nat proufyte unto the corne that is sowen upon the stone, knowe right wele that in lyke wyse the studye of a foole maye nat prouffyte." And seith: "The tunge of a man shewith his wysedame and his foly." And seith: "Experyence correcteth a man and techeth a man to leve wele." And seith: "Wysedame shewith faire and honestely the rycchesse of a ryche man and hydeth the poverté of a poure man." And thei asked him what was good language and speche. He ansuerd and seide: "For to speke but litill, and that," he seide, "shulde be spoken with grete reasoun and able for to be allowed." And he wrote to Alysaundir: "Ye seeme to be a noble and a myghty kinge, and I knowe wele ye be so, and yet ye shal be gretter with that that ye wole ordeigne youreself to governe youre people truly, for yf ye do so, thei wole obbeye you the more. And yf ye wole take aweye her goodes and leve hem so litill that it maye unneth suffyse hem to leve upon, ye shal be lorde of a poure people, and ye shal be lykened to him that loveth bettir to governe the beestis thanne the men. And there maye nat be a more uncovenable thinge to a prynce thanne to coveyte the goodes of his people." And thei asked him in what thinge a man shulde holde his peas inne though so were that it were true. He aunsuerd and seide that a man shulde nat comende himself. And seith: "A litil trouthe is good, for ho that ableth himself to trouthe, it shal falle the more unto him." And seith: "Reasoun maketh man to surmounte alle othir beestis, wherfore and a man lacke reasoun he is a beest." And seith: "Amonge alle thinges the newe bene beste, excepte love -- for the elder that love is, the bettir it is." And oon whiche was called Abraquis, lorde of sciences, asked him what maner thinge shuld he lerne firste that wolde gete wysedame. And he aunsuered that he shulde lerne firste that science that shulde governe the soulle, for because that it is perpetuel, and more noble withoute any comparison thanne anythinge that we have. And [fol. 40r] thei asked him how that the soulle myght gete wysedame. He ansuerd and seide: "In lyke wyse as the seeke man maketh the phesycyan by his sekenesse, and as the blynde man undirstandeth the colours by hem that seen hem." And oon asked him how maye a soulle knowe himself. He aunsuerd and seide: "Whanne a soulle lacketh wisdome, he shal nat knowe himself, nor none othir, lyke as a sighte withoute light that maye nat see himself nor none othir." And seith: "Alle thinges have propirtees, and the propirté of dyscrecioun is to chese the goode thinges." And seith: "The lordes have goten by her studye and by her laboure for to escape the grete perilles whiche causeth hem to come to good ende, and thes thingis that be geten with delytes and sportes come to a smal ende. And ye maye see comounly thees townes that good laboure is inne bene wele replenysshed of people and wele holden up; and thees townes that bene full of vyces fallen to destruccioun." And seith: "Haste of spekinge mak- eth men for to erre many tymes." And seith: "I have grete merveyle how he that a man seith wel by withouten cause can accept it, and also how he that men seye evel by withoute cause can be wrothe." And seith: "Men have in gretter cheertee that thing that is dere bought, or ellis goten with moche peyne, thanne that thing that cometh lightly to a man and withouten peyne." And seith: "Loke ye be nat lyke the bultynge cloth that casteth oute fro hym alle the meele and floure, and kepith himself the branne." And seith: "A man shulde nat gefe a childe the governaunce of the people, nor to him that knoweth nat the occupaciouns of this world, nor to him that hath grete joye in covetyses, nor to him that wole do his dedis withoute deliberacioun, nor to him that is to vengeable." And seith: "There is no difference betwene a childe of age and a childe of maners; what age that ever he be of for the condycions of men be shewed by here werkes and nat by the tyme." And seith: "It is nedful to a man yf he wole be goode that he be abled therto as for to knowe trouthe and for to do it in dede or ellis that he lerne it by anothir, for of himself he maye nat understande it. And he that wole nat lerne it by another maye never be good." And seith: "The goodnesse is devysed in thre maners: the firste is to the body, the secunde is to the soull, the thirde is withoute the body. And the moste noble is the goodnesse of the soulle, the whiche goodnesse appereth in doynge [fol. 40v] goode dedis, and in usynge of that goodnesse is founden the verrey trouthe of sci- ence." And seith: "Wysedame is founden in man by longe lernynge, and goodnesse cometh by good custume." And seith: "We oughte to knowe the signes that the condycions of men shewen by the dilectaciouns withoute forthe whiche shewen by here dedis, for he that absteyneth him oonly from his pleasaunce and fro the bodily dilectaciouns, he aughte to be called a man wele attempred. And he that absteyneth himself from dilectaciouns and is sory therfore shulde be called am- bycious, and so of othir thinges." Ande seith: "There bene many that knowen the goode maners and done hem nat, and thei resemble the seeke folkes that asken counsell of the leeches and do nat aftir hem, and lyke as here bodyes ben ferre from helthe, so bene the soulles ferre from blessednesse." And seith: "To do wele is a thinge that man hath neede of to lerne, and yet it is somwhat peynefull for to come therto. But for to do evel, men come lightly to it, for he seith to sheete aferre at a marke is but a lite thinge, but it is ful harde for to hitte it; and in many maners we maye be evell, but we maye nat be goode but in oone." And seith: "The lacke of connynge is cause of evel, for many erren in usinge of her werkes that thei shulde do by ignoraunce, for thei wote never whanne thei do wele nor whanne thei do evell." And seith: "Olde men loven togedre but children done nat, for the olde mennys delytes bene gretely even and the yonge dyfferren in many maners." And seith: "The accomplesshemente of felycité of man is for to gete him frendes, for a man aloone maye never have felicité in himself, for the perfeccioun of felicité is to do wele to other. And therfore he that hath an indignacioun of the goode deedis that bene done by othir folkes is altogedir oute of felicité." And seith: "He hathe neede to frendes that hath gretely for to do, be it wele or be it evel, for yf it go evell he hathe nede of helpe of his frendes; and yf it go wele it is necessarye that he make joye and solace with his frendes." And seith: "Ho that loveth God truly hath wysdame, and he that hathe wysedame and dothe the dedis theraftir is beloved of God and is full redy to do wele to him agen." And seith: "The evell folkes susteyne the perilles by the force of here bodyes, and the goode suffren the perilles by the force of here soulle, for the wysdame of the goode men is nat in the streyngth of here [fol. 41r] handes, of here armes, or in here othir membres, which is the streyngthe of othir dombe beestis, but the goode pacience of the soulle withstandeth gladly the grete perilles of coveityses and othir delites in full hope for to have a good ende." And wrote to Alysaundir, seyng in this wise: "Thu oughteste wele to obbeye the worldly thinges of God, for he hathe geve thee that thu woldest have, and that thinge that thu haste desired of him." And seith: "Knowynge is lyfe, and ignor- aunce is deth. And therfore he that knoweth is alyve, for he undirstandeth that he dothe, and he that knoweth nat is deed, for he undirstandeth nothinge that he dothe." And seith: "Men maye nat undirstande withoute enformacion of dysci- plyne, lyke as here sight maye nat see withoute lighte the schappes of thingis." And seith: "The longe passinge of tyme maketh a mannes dedis olde and defaceth here traces, and thanne there abideth nothinge but good renowne and love that abideth in the hertis of here successours, for here goode dedis that thei dede in here dayes. And therfore enforce thee for to conquere thee a good name, whiche at no tyme shal faille, and for that good renown thi noblesse shal endure." And seith: "The foole is as a man that falleth in a deep watir, and yf he ley honde upon thee, he wole drowne thee with him; and yf thu flee fro him, thu arte seure." And seith: "Lesynge is an infirmyté of the soule, for by the meane of reasoun he shulde nat lye." And seith: "The most stedfaste wyseman is he that wole nat pronounce his matiers unto the tyme that he hathe wele undirstande hem. And the beste spekinge man is he that spekith nat unto the tyme that he be wel purveied of his language. And the beste werkeman is he that wole nat begynne his werkes til that he hath wele advysed and discussed hem in his herte. And there is none that oughte to thenke more thanne the wiseman, for it is right nedful that he knowe his matiers right wele, or he be wel acerteigned in hem." And seith: "The men bene more en- clyned to coveityses thanne to reasoun, for coveityse is accompanyed with hem in her childhode, and reasoun cometh nat to hem unto the tyme that thei come to parfite age." And seith: "The children dispreysen and haten here maisters for, at that tyme that the maister techeth hem, thei conceyve nat the goodnesse that maye come to hem therby, but thei feele oonly the laboure of the lernynge." And he called Alisaundre [fol. 41v] and asked him questions of the governaunce of the lordes and of the people, to whome Alisaundir aunsuerd right wele. And yet natwithstanding that, Aristotle bete him with a rodde. And thanne somme asked him what was the cause that he beete him so withouten any trespasse. He aunsuerd and seide that "this childe is ordeigned for to be a grete kinge. And for to kepe him lowely, ther- fore, I beete him, for he wol ful hastily be right proude." And seith: "If thu maiste redresse any man, loke thu do it as thu woldest do to thyne owen self." And a yonge man asked him whi he was so poure, to whome he aunsuered: "My poverté offended me never, nor dede me never harme, but thyne hath done thee harme, and yet wole do thee moche more." And seith: "The worlde is lyke a gardeyne, wherof the dyches be lykened to realmes; and the realmes be maintened by the lawes whiche the kinge hath stablysshed. The kinge is mayntened by his knyghtes, the knyghtes bene governed by money, the money cometh of the people, the people is governed by justice. And so is all the world."