1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150

N     N           N         N             N                   N     N                 N N   N       N           N N                       N                             N   N                                                                                                                             N

T     T   T     T             T                                                 T   T T                           T                               T     T                 T                     T     T   T

Gode men, suche a day [N] ye schul have the feste of Mary Magdalé, that was so holy that oure Lorde Jhesu Criste aftur Hys modur He lovid hir moste of alle wommen. Wherefore ye schal comyn to the chyrch that day to worchep God and this holy womman, for scheo was the furste in tyme of grace that dud penaunce for hyr synnes, and so recovred ageyne grace be doing of penaunce, and repentyng that scheo hadde loste be luste of the flesse and so synnyng. The wyche is made a myrroure to alle synful to schewon how alle that wollon levon hur synne, and done penaunce for hur trespace, thei schul recovre grace ageyn that thei have loste and ofte myche more. An so dude this womman, and how ye schul here.     This womman Mary Magdaleyne hadde a fadur that was a grete lorde and comyn of kyngus blode, and hadde grete lordeschep in Jerusalem, the wyche he gaf at hys dying to Lazarus hys sone. And the lordschep that he hadde in Betanye, he gaf to Martha, hys doghtor. Magdaleyn Castele wyth alle the lordschep he gaf to Mary, hys other doghtyr, of the whyche castel scheo was callyd Mary Magdaleyne, for scheo was lady therof. Than, as many bokys tellyth, whan John Evangeliste schulde have weddyd hyr, Criste hadde John sewond Hym, and lyvon in maydenhed; and so he dud. Herfore Mary was wroth and gaf hyr al to synne and namely to lechery, insomyche that scho loste the name of Magdaleyne and was kallyd the synful womman. Than, for it was often seyne that Cryste of the gresteyste synnerres He made the moste holy aftyr, wherfore whan He seygh tyme, He gaf this womman grace to knowyn hyrself and repentaunce of hur mysdedus.     Then, whan scheo herde that Cryste was atte the mete in a mannus houce that was kalled Symond the Pharasen, scheo toke a boyste wyth oynement, such os men usenden in that cuntré for hete of the sonne, and yode thidur. But for scheo durste note for schame gon before Cryste, scheo yode behynde Hym, and toke Hys fette in hyr handes; and for sorow that scheo hadde in hur herte, scheo wepte so tendurly, that the terus of hur heyen woschon Cristes fette; than wyth hyr fayre fax sche wypud hem aftur; and than wyth alle the love that was in hyr herte, scheo cussyd Hys fette and so wyth hyr box anoynted hem. Bot no worde spake scheo that man myght here, bot softely in hyr herte heghly scheo cried to Criste of mercy, and made a vow to Hym that scheo wolde nevre trespace more. Than hadde Criste compassion of hur, an clensed hur of seven fendes the whyche scheo hadde wythinne hur, and forgaf hur alle hur gylte of synne in herryng of alle that there weron.     Than for joy that scheo was thus delyverhud of the devellys bondys, scheo toke suche a tendur love to Cryste, that evre aftur sche was gladde and fayne to leven alle hur ladyschep and sewon Hym ay forth wyth so fervent love, that in Hys passion thereas Hys disciplus flowen away from Hym for drede of the deth, scheo lafte Hym nevre tyl scheo wyth othyr hadde layde Hym in Hys tombe. And whan no man durste go thyddur for the armyd knytus that kep the tombe, scheo spared for no drede of lyf ne deth, bot in the dark dawyng toke wyth hur swete bawmus and yod thidor to have bawmet Crystus body. Thus scheo lovid Criste bothe levyng and dede.     Wherefore He, yytte in Hys lyve, for love of hur He helyd Martha, hur systur, of the rede flux that payned hur seven yere, and also reysyd hur brother Lazar from deth to lyfe, aftur he hadde layne foure dayes stynkyng in hys grave. And whan He rosse from deth to lyfe, He aperud to hur bodyly furste of alle othyr and suffred hur to touche Hym an cussyn Hys fette.     Than, for it was knowen to Jewes that Cryste schewod hur so many synus of love before many othyr, aftur that Cryste was steyed up to Heven, the Jewes tokon Mary Magdaleyne, Martha hur systur, and Lazarus and Sent Maximius, a byschop, and many othur, and dyden hem alle in an old schyppe, and putthyn hem into the see, hopyng so to a drowned hem alle. Bot God that ordeneth for alle aftur Hys lust, He broght hem alle holle and sounde to the londe of Marcile. There, undyr a bonke that was nygh a tempul, thei tokyn here reste. Than see Magdaleyn grete pepul comyng towarde this tempul and the lorde of that cuntré to han done offer- ing and sacrifice to here mawmentis. But Magdaleyne was so ful of grace of the Holy Goste, that scheo be hur gracious wordys turned hem alle ageyne hom. And for this lorde sethe hyr ful of alle swetnesse and gentryes, he had grete luste to heren hyr spekyn and sayde thus to hur, "If thi God that thou prechyst of is so grete of mythe as thou sayste, pray to Hym that I may have a chylde be my wyf that is bareyne, and I wyl leven on Hym." Than graunted Magdaleyne; and so wythinne a schorte tyme the lady conseyvid and was wyth chylde.     Than schappode this lorde to gone to Jerusalem, to speke wyth Seynte Petur and wytte whether it where sothe that Magdaleyne prechud othour no. And whanne he hadde vytaylyd schyppus and made alle redy, than come the lady hys wyfe, praying wepyng that scheo moste wende wyth hym, thogh scheo were grete wyth schylde. And so wyth grete strenth of praying scheo gate graunte. Than, wyth bothe assente, thei betokyn alle hor godys to Magdaleyne to kepon; and scheo sette on eyther of hyr schyldyr a crosse, and badde hem wende forth in the name of God. Bot whan thei hadde ryved a day and a nyght, than gan the see to swellen, and the wynde sternely to blowen, and suche a tempeste to ryson that thei wendon alle to han ben spylled. Wherefore this lady was so afryght that scheo began to travayle of chylde, and so anone was delyvered of a knave schylde. And scheo in the burthe fel doun and dyod.     Than, whan the fadyr saw hys wyf dedde and the chylde borne and graspyng towarde the modur pappes, he began to wepe and wrynggyd hys handys and was so sore and so woo on uche syde that he ne wyste whatte he mythe done. Wondyr sory he was for hys wyfes deth, and nedys he moste sene hys schylde dyen, for ther was no wommanus sokur for to helpon hym. And than cryed he to Mary Magdaleyne and sayde, "Allas, Mary Magdeleyne, why duste thou thus harde wyth me? Thou behettyst me a chylde, bot now is his modyr ded and it moste nedys dyen, for it hath no helpe, and I myselvyn am redy to be drowned. Help now, lady, and have compassyon of me, and namely of the chylde that is borne!" Than toke the schypmen the dede body, and wolde han caste hyr into see, and saydon thei schuldon have no rest whyl the cors was in the schyppe. Than seyde he ful helte, "Scheo is not dede bot swowned for drede. Wherefore bryngge the schyppe to yondur schare for of myne cost, that I may rather gravyn hyr than caste hur into the watur to be drownyd and devowred of cursyd bestys." Than toke he this cors and bare it up. And for ther was none erthe to makyn a grave, he leyde it undir a hongyng skare and the schylde wyth, and hylled hem wyth a mantyl that he betoke Mary Mawdeleyne to kepon, and yode ageyne to the scheppe wyth wryngyng hys handys and wondur sore herte.     Than, whan he cam to Jerusalem, Seynt Petur was redy and welcomyd hym and bad he schulde not ben hevy nor discounforded, thof hys wyf were dede; for God was of myght to makyn hym another tyme as glad os he was than sory. And so lad hym forth and schewed hym alle the places of Crystes doing in erthe, of Cristes nativité, of Hys passyon, of Hys sepulture, and of Hys ascencion; and so evre formyd hym in the feyth fully. And whan he hadde ben ther too yere, Sent Petur sent hym home agayne and bad hym ben in ful beleve of Criste, and gaf hym hys blessyng and bad hym grete wel Mary Magdaleyne and alle hyre ferus.     Than, whan this lorde cam ridyng in the see, he sagh the skyrre there he lafte hys wyfe and hys chylde. And than ther felle suche longyng in hys herte to go thydor that hym thoght he schuld dye bot he yode thydyr. Than made he the schypmen to setton the schypp thidur; and whan he cam thidur, than sawe he a schylde syttyngge on the see-sonde, pleying wyth smale stonys as schyldron wyllon. But whan the chylde saghe hym, he ran forth into the skyrre. Than sued the fadur aftur and cam ther he lafte hys wyf dede, and lyft up the mantyl and fond the schylde sokyng the modur pappes. Than thankyd he Mary Magdaleyn wyth alle hys mythe and sayde, "O Mary Magdaleyne, thou arte of grete myght wyth God that thus haste kept and fede this schylde of this dede body now too yere in grete comforde and joy to me! Woldest thou nogh of thi godenesse reyse my wyfe to lyfe, than were I bondon evre to be thi servaunde, and wyl wyth a ful gode wille!"     Than, wyth that worde, the lady satte up and sayde, "Mary Magdaleyne, yblessyd mote thou be that was mydwyf to me in my bythe-tyme, and sythen hast norised my chylde wel and sounde whyl I have ben in my pylgrymage!"     Than sayde he, "My wyf, lyvest thou?"     And scheo answerod and sayde, "Ye, syr, I lyf, and now com oute of my pylgrymage, as ye don. For as Seynte Petur hath ladde thee abowton, so hath Mary Magdaleyne ladde me the same gate," and tolde hym alle thyng and fayled in no poynte. Than heven thei her handys up to God, and thankyd Hym and Mary Magdaleyne of that grete miracul that thei schewed in hem.     And whan thei comyn hom, thei foundon Magdaleyne prechyng the pepul. And than anone thei fellon doun to hur fette and thankud hyr wyth alle here mythe and prayd hur to telle hem whatte thei schulde done, and thei wolde wyth glade herte. Than Magdaleyn bad hem distroy the tempulles of that londe and make ther schyrches, and reron fontes that the pepul myghte be cristened. And so in schorte tyme alle the londe was turnyd to Cristen feyth.     Than, for Magdaleyne wolde gef hyr alle to contemplacion, scheo yode prively fer into wyldernesse and was ther thirty yere unknowon of alle men wythoute mete or drynke. Than, uche day seven sythes, angelus beron hyr up into the ayre, and there sche was fullud wyth melody of angellus, that hur nedud none othyr bodyly fode. Bot whan God wolde that scheo schulde passon oute of this worlde, He made an holy preste to sene how angelus beron hur up and doune. And he, for to wytton the sothe whate that was, he yode to the place and halsodde yyf there were any Cristyn creature that he schulde speken and tellyn hym whatte he were.     Than answerid Magdaleyne and sayde that scheo was a synful womman that the Gospel spake of, that whesse Crystes fette, and badde hym gone to Maxcencius the byschoppe, byddyng hym that he come on Astur morowon to chyrch, "for there I wyl meton hym."     Thus whan this byschop harde this, he was ful gladde; and whan he com to chyrch, than sawe he Magdaleyne borne up wyth angelus too cubitus fro the erthe, and than he was agaste. Than Mary callyd to hym and bad hym to hyr, and gone and sayne a masse, that scheo mythe ben uselled. So in syght of alle the pepul, whan masse was done, scheo wyth hye devocion reseyvid Goddys body; and anone therwyth scheo gaf up the goste. Than toke the byschop hyr body and leyde it in a tombe of stone and makyd for to graven alle aboghtyn the lyf of hur, in worchep of God, that dud so goddely be hur, and in honour of hyre and alse in heygh comforde to alle synful.     Wherefore ye schul knelon adoun etc.