1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92

N       N       N             N               N           N         N                                               N   N             N     N                       N

T                           T                         T                 T       T           T       T               T   T       T     T                                         T     T

Gode men, suche a day ye schul have Seynte Katerine day, the whyche was an holy martir. Than ye schul knowon that Seynte Katerine was a kyngus dowthur. But thogh scheo were comon of so hygh blode, for Goddys sake scheo sette noghte be the pompe of the worlde, but sette hur herte alle in oure Lorde Jhesu Criste. Wherefore whan scheo hadde ben at scole, and was lerud at the fulle and cowde spyton wyth any clerke that com to scole, whan scheo herde that Maxencius the Emperoure was comyn to the cyté of Alysaundyr to make a solemp offering to hys goddys of bollus and calveron and othur bestus, so that alle the cyté dynote of the noyse of hem, than Katerine blessyd hur and yode into the tempul to the Emperoure and baldely rebukyd hym, and sayde he dude foule to worcheppon fendys and leve the worschep that he schulde do to God of Heven, that made alle thing and send hym lyf and hele and alle thing to hys nede, and prevyd be very reson and skylle that Criste was God and bouthe mankynde on the Crosse wyth Hys deth oute of the fendes bandam. Than badde the Emperoure don hure into warde tyl he mythe ben a lesur to heron hure; for than he was so bysy to pleson hys goddys that he mythe not tende to hur.     Than this menewhyle he made to fathe fyfty scole-maysteres of the wysest that weron in any cuntré. And whan thei weron comyn, he badde hem gone and spyton wyth Katerine and ovrecomen hur, and he wolde rewardon hem heyghly for hure travayle. Than hadde the maysteres grete hokur that they caried were of so fere cuntré to spyte wyth a womman, wyl the leste scoler of there hadde ben wyse inowh to have ovrecomyn hure. But whan Katerine hadde spokyn wyth hem a lytyl whyle, be helpe of the Holy Goste scheo convertyd hem, so that thei alle levyd on Cryste and wyth gode wille woldon take deth for Hys love.     Than anone Maxencius commawnded to makon a grete horribul fyre and bren hem alle therine. But God schewod there Hys miracul for hem, so that there was no cloth that thei hadde no none here of here heved tamyd wyth the fyre, bot alle lay dede be othor wyth as fayre chere os thei hadden ben on slepe. Than was the Emperoure wode for tene, and made to done Katerine nakyd and so to beton hur fayre body wyth schoureges, that alle hur fayre body was ful of woundes and rennyng alle on blode, and made to putton hur into preson, to abyde there thritti dayes wythoute mete or drink til he com ageyne, for nedys he muste gone fro thennus.     Bot the quene hadde a grete longyng to speke wyth Katerine and toke wyth hure on a nyght a knyte that was kallud Porphyrius, and yodon to the preson and spake wyth Katerine. And than see scheo an angel that hadde in eyther hande a crowne of schynyng golde, and sette that one on the quenes heved and that other on Porphyrius heved, and bad hem bene stedefaste in the beleve, for wythine the thridde day thei schulde bothe com to God be martirdam.     Than come this Emperoure hom and anone sende aftur Katerine and wende scheo hadde ben nygh dede for hungur, bot scheo was thanne alle thilk dayes fedde wyth a colvor from Heven, so that scheo was in bettur poynte than scheo was beforon. Wherefore this Emperoure was nygh wode and commawndyd to sette Katerine betwene tweyon whelus that weron wondurly makuth, so that too turnyd upwarde and too dounwarde, ful of kene hokus, so that too schuldon have alle torasud hyre upwarde and othor too donwarde. But whan Katerine was sette in these weles, scheo prayed to God to helpon hur. And anone ther com an angel from Heven and smote alle the welys into pesus, os hit hadde ben a whyrwlewynde; thei ronnon on the pepul and slow anone foure thowsand of hem.     Than sawe the quene this miracull and anone com doune before hure husbonde and spak to hym boldely, rebukyng hym for he sagh Goddys myracul so oponly and yitte wol not levon on God. Than anone this tyrande commawnded to lede forth the quene and furste rason hur pappes wyth hokus from hur body and than smyton of hur hed; and so dudon. Then on the morowh, for Porphirius hadde beried the quene, he was takon and an hundred knythes of hys felowes, and weron beheduth uchon for Goddys sake.     Than this Emperoure spake fayre to Katerine, and byhatte hure that he wolde weddon hure and done hur alle the worchep that he cowthe, if scheo wolde forsakyn Criste and levon on hys goddys. But for scheo sette noghte be hym ny be hys goddys, he made to smyton of hure hedde. Than whan the hed was off, instede of blode ran oute whyte mylke. And anone therwyth com angellys and tokon hur body and bere it up into the eyre, and so forth twenti dayes jurney into the mounte of Synay, and there byried itte wyth grete worchep where God hath wrowte many grete miraclus, and yitte doth into this day.     For at the foot of this mount ther is an abbey of monkis whiche lyven in ful grete abstinens. And so this abbey is ful strong and high wallid and barrid bicause of wilde bestis. And in this abbey lieth Saint Kateryne in a rial tombe of alabastre. For here bonys were fett theder for more worship and reverence. And also in this abbey is the busshe whiche that oure Lord aperid inne what tyme that He spake to Moises and what tyme that He delyvered to him the tablis of stone and of the commandmentis. And that busshe unto this daie is as feir and as grene as it was that same tyme that oure Lorde aperid therinne. Also in that same abbey is a grete merveile, which is this. Every monk in this abbey hath a lampe brennyng with oile. And what tyme ony of hem shal die, thaie shal have a knowelege by his lampe. For evyn as he drawith to deethwarde, so his lampe will derke more and more. And whan the abbot is deed, thaie shal singe a masse of the Holi Gost and than bury him solemply. And by the tyme that the masse be done, theie shal finde a lettre on the aultere and writen who shal be thair abbot.        Also another grete merveile ther is done there on Saint Kateryns daie, which is this: that alle the birdis of the contrey as that daie comith thidir, and eche of hem bringith a branche of olyve into the abbey. And pilgrimes sayn that the monkis make hem oyle therof to serve her lampes all the yere, and the remanent they sille for her sustynaunce.      [Narracio.] I rede of a man that furste servid Seynte Katerine and fast here evyn, as many done, but aftyr he lafte of. Than in a vision he sagh a grete com- pany of fayre maydenes comyng be hym, and among ham was one passing alle othyr in bewté. Bothe whan sche com by this man, sheo hudde hure face and wolde note lokyn on hym. Than askud he one of the hyndemaste whatte thei weron. Than seyde scheo that thei weron alle seyntus of Heven, and that was Seynte Katerine that hudde hure faas from hym and wolde note knowon hym, for encheson that he hadde lafte the knalache of hur. Than this man repentut and turnid ageyne to hys devociones as he hadde done before.