1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 247 248 249 250 251 252 253 254 255 256 257 258 259 260 261 262 263 264 265 266 267 268 269 270 271 272 273 274 275 276 277 278 279 280 281 282 283 284 285 286 287 288 289 290 291 292 293 294 295 296 297 298 299 300 301 302 303 304 305 306 307 308 309 310 311 312 313 314 315 316 317 318 319 320 321 322 323    324 325 326

N       N     N     N N                         N N         N     N   N         N   N         N             N     N   N                 N           N   N N             N           N           N             N           N             N N N   N               N     N       N         N         N           N         N             N   N           N   N N       N       N N   N           N                                                                 N                     N           N   N               N                             N       N         N           N N             N                               N N   N                     N

Oure Lord God Almyghty spekith in His lawe of tweie matrimoneys or wedlokis. The first is gostly matrimonye, bitwixe Crist and Holy Chirche, that is, Cristene soulis ordeyned to blisse. The secunde matrimoyne is bodily or gostly, bitwene man and womman, bi just consent, after Goddis lawe.     Of the first matrimoyne spekith God bi the prophete Osie to Holy Chirche; and to ech persone of Holi Chirche God Himself seith, I schal spouse thee, or wedde thee to me, in rightwisnesse, in dom, in mercy, and in feith; and I schal wedde thee withouten ende. This is the first matrimoyne and best, as God and the soule of trewe men ben betre than mennys bodies. And this beste matrimoyne is broken for a tyme bi brekynge of saad feith, and defaute of rightwis lyvynge. And herefore God seith oft His prophetis, that His peple dide fornicacioun and avoutrie, for thei worschipen false goddis; and Seynt Jame seith that men that loven the world ben gostly avoutreris. For thus writith he: yee avoutreris, wite ye not that frendischipe of this world is enemyté of God? And thus alle men that loven more worldly worschipe or goodis of the world than God and His lawe and trewe life, ben avoutreris gostly, yif thei weren Cristene bifore; and this is worse avoutrie than brekynge of fleschly matrimonye.     Of the secunde matrimoyne, that is bodily, spekith God in the firste bok of Holy Writt, whanne he maade matrimoyne bitwene Adam and Eve in paradis in staat of innocence, bifore that thei synneden. And for that God Hymself made this ordre of matrimoyne, and he not so made thes newe religions, it is betre and more to preise than thes newe ordris. Also Jesus Crist wolde not be borne of the Virgine Marie, ne conseyved, but in verrey matrimoyne, as the gospel of Luc, and Seynt Ambrose, and othere seyntis witnessen. Also Jesus Crist was present in His owene persone with His modir in bodily matrimoyne, to approve it, as the gospel of Jon techith, whanne He turned watir into wyn. Also the Holy Gost warneth Cristen men, hou in the laste daies summe heretikis schullen departe fro feith of Goddis lawe, gevenge entente to spiritis of error, and to techynge of develis, spekynge lesyngis in ypocrisie, forbedynge men and wymmen to be weddid, and techynge men to abstene hem fro metis, the whiche God hath maad to be eten of trewe men, with thankyngis and heriyng of God. Also this bodily matrimoyne is a sacrament and figure of the gostly wedlok bitwene Christ and Holy Chirche, as Seynt Poul seith. Also, this wedlok is nedful to save mankynde bi generacioun to the day of dom, and to restore and fulfille the noumbre of aungelis, dampned for pride, and the noumbre of seyntis in hevene, and to save men and wommen fro fornycacion. And therfore he that forbedith or lettith verrey matrimonye is enemye of God and seyntis in hevene and alle mankynde. And herefore man ponyschide fornycacion and avoutrie in the olde lawe bi stonynge to deth, and in the lawe of grace bi dampnynge in helle, but yif men be verrey contrit therfore.     And herefore, sith fornicacioun is so perilous, and men and wymmen ben so frele, God ordeynede prestis in the olde lawe to have wyves, and nevere forbede it in the newe lawe, neither bi Crist ne bi His apostlis, but rathere aprovede it. But now, bi ypocrisie of fendis and false men, manye bynden hem to presthod and chastité, and forsaken wifis bi Goddis lawe, and schenden maydenes and wifis, and fallen foulest of alle. For many ben prestis and religious, in doynge and othere, for to have lustful lif and eisy, yong and strong of complexion, and faren wel of mete and drynk, and wolen not traveile, neither in penaunce, ne studie of Goddis lawe, ne techynge, ne laboure with here hondis; and herefore thei fallen into lecherie in dyverse degrees, and in synne agenst kynde. For many gentilmennis sonys and doutres ben maad religious agenst here wille, whanne thei ben childre withouten discrecion, for to have the heri- tage holly to o child that is most lovyd. And when thei come to age, what for drede of here frendis, and what for drede of povert in cas that thei gon out, and for ypocrise and flatirynge, and faire bihestis of thes religious, and for drede of takynge of here bodi to prison, thei doren not schewe here herte ne leven this stat, though thei knowen hemself unable therto. And hereof cometh lecherie and sumtyme mortherynge of many men.     Netheles, though matrimonye be good and gretly comendid of God, yit clene virgynité is moche betre, - and wedlok also, as Seynt Poul seith opynli; for Jesus Crist, that lyvede most perfitly, was evere clene virgine, and not weddid bodely, and so was His modir evere virgine, and Jon Evaungelist. Seynt Austyn and Jerom specially witnessen wel this in many bokis. Netheles virgynité is so heye and so noble that Crist comaundid it not generaly, but saide, who may take, take he it. And therefore Poul gaf no comaundement of virgynité, but gaf conseil to hem that weren able therto. And thus prestis that kepen clene chastité in bodi and soule doun best; but many taken this charge not discretly, and sclaundren hemselfe foule bifore God and His seyntis, for newe bondis maade nedeles of synful men. And this is a gret disceit of the fend under colour of perfeccion and chastité. For he stireth men to heighe poyntis of perfeccion, when he knowith or supposith hem unable, not for here goode, but for to falle foulere and depere in more synne, as Seynt Austyn techith. And thus the fend Sathanas transfigureth or turneth hem falsly into an angel of light, to disceyve men bi colour of holynesse.     See now how this wedlok owith to be kept in both sides. First this wedlok shulde be maad with ful consent of bothe partis, principaly to the worschipe of God, to lyve clenly in the ordre that He made, and bringe forth childre to fulfille the chosen noumbre of seyntis in blisse, and not to have flescly lustis withoute reson and drede of God, as mulis and hors and swyn that han no undirstondynge. For the angel Raphael warned Tobie, that the fend hath maistrie upon siche men that ben weddid, to have thus lustis of flesch as bestis withoute resoun and drede of God. Also this contract shulde not be maade bitwixe a yonge man and an olde bareyne widewe, passid child-berynge, for love of worldly muk, as men ful of coveitise usen sumtyme, - for than cometh soone debat and avoutrie and enemyté, and wast of goodis, and sorowe and car ynowgh. And it is a gret dispit to God to coloure thus here wickide coveitise, lecherie, and avoutrie bi the holy ordre of matrimoyne. And many men synnen moche, for thei defoulen many wymmen, and letten hem fro matrimoyne, and undon hem in this world, and sumtyme ben cause of here dampnacion; for thei ben maad comyn wymmen, whanne thei han lost here frendishipe, and kunnynge no craft to lyve by. Many hote and coragious men wolen not take a pore gentil womman to his wif in Goddis lawe, and make here a gentil womman, and save here owene soule, but lyven in the develis servyce al here lif, or the more part; and defoulen many templis of God to gret peril of here soule, and abiden to have a riche womman for muk, and thanne wasten here goodis in harlotrie and nyse pride, in avoutrie on gaie strumpatis, and evere lyven in wrathe, and chydynge, and in bondage of synne to the fendis of helle. Also summe myghtty men marien here children where that here herte consentith not wilfully, but feynen for drede. For comynly thei loken alle aftir richesse and worthinesse to the world, and not after goodnesse of virtuous lif. And so God and His side is putte bihynde, and the devel and the world and the flesch han now here maistrie.     For three skillis may a man knowe fleschly his rightful wif, the firste for to geten children, to fulfille the noumbre of men and wymmen that schullen be savyd; the secunde to kepe his wif fro lecherie of othere men; the thridde is to kepe himself fro lecherie of othere wymmen. And no party may kepe him chaste fro the dedis of wedlok withouten assent of the tother comynly, for the man hath power of the wifis body, and the wif hath power of the mannys body, as Seynt Poul seith. And yif the partie desire to be chast, suffre he withowten his owene luste the thother part in dedis of matrimoyne, and he getith him thank of God, bothe for suffrynge of his make, and for the wille that he hath to chastité; for God takith reward to the goode wille, and not onely to the dede. Also men seyn yif bothe parties assenten wilfully to perfit chastité, bothe of wille and dede, that it is betre than to use forth the dedis of matrimonye; and yif thei assenten bothe parties at the begynnynge to lyve evere chast, withouten bodily knowynge, that it is the best kept matrimoyne of all othere, as diden oure Lady and Josep, whanne thei ben weddid. Loke that eche partie lyve wel anentis God and the world, and stire eche othere to charité, rightwisnesse, and mekenesse and pacience, and alle goodnesse. And be ech man war that he procure no fals devours, for money, ne frendischipe, ne enemye; for Crist biddith no man departe atwyn hem that God hath joyned; but only for avoutré that part that kepith him clene may be departid fro the totheris bed, and for noon other cause, as Crist seith hymself. And yit thanne the clene part myght lyve chast evere while the tother lyveth, or ellis be reconseled agen to the part. Netheles the clene may dwelle forth with the tother lyveth that forfetis, bi weie of charité. And men supposen that that weie is gret charité, yif there be evydence that the tother part wolle do wel aftirward.     See now how the wif oweth to be suget to the housbonde, and he owith to reule his wif, and how thei bothe owen to reule here children in Goddis lawe. First Seynt Petir biddith that wifis be suget to here housbondis, insomoche that yif ony bileve not bi word of prechynge, that thei ben wonnen withoute word of prechynge bi the holy lyvynge of wymmen, whanne men biholden the chast lyvynge of wymmen. And thes wymmen schulden not have withouten forth tiffynge of her, ne garlondis of gold, ne over precious or curious clothinge, but thei schulden have a clene soule, peisible and meke and bonere, the whiche is riche in the sightte of God. And sumtyme holy wymmen, hopynge in God, honoureden hem in this manere, and weren suget to here owene housbondis, as Sara, Abrahamys wif, obeischid to Abraham, clepynge hym lord; and wymmen wel doynge ben gostly doughtris of Sarra. Alle this seith Seynt Petir. Also Seynte Poul spekith thus of housbondis and wifis; I wole that men preie in eche place, liftynge up clene hondis, that is, clene werkis, withouten wraththe and strif. Also I wolle that wymmen ben in covenable abite, with schamefastnesse and sobirnesse ournynge hem or makynge fair, not in writhen here, ne in gold, ne in margery stones or perlis, ne in precious cloth, but that that bicometh wymmen bihetynge pité, bi goode werkis. A womman oweth to lerne in silence, with alle obedience and subjeccioun. But Poul seith, I suffre not a womman to teche, that is, openly in chirche, as Poul seith in a pistel to Corynthis, and I suffre not a womman to have lordischipe in here housbonde, but to be in silence or stillnesse. For, as Poul seith in many placis, the housbonde is heed of the wif; and Poul tellith this skille, that Adam was first formed and Eve aftirward, and Adam was not disceyved in feith, but the womman was disceyved in feith, in trespasynge agenst Goddis comaundement. Alle this seith Poul in dyverse placis of Holy Writt. Also Poul biddith that bishopis and prestis techen wifis to love here housbondis, to be prudent and chaste and sobre, and to have care of the hous, and benynge and underlont, or suget, to here housbondes, - that the word of God be not blasphemyd. And that olde wymmen schullen be in holy abite, not puttynge fals cryme or synne to othere, ne suynge to moche wyn, and to be wel techynge, so that thei teche prudence. Also Poul techith thus, - that wymmen ben underlont, or suget, to here husbondis, as to the Lord. For the husbonde is hed of the womman, as Crist is heed of the Chirche, He is saveour of the body therof, that is, the grete multitude of alle worthi to be savyd. But as Holy Chirche is suget to Crist, so be wymmen sugetis to here housbondis in alle thingis. Husbondis, loveth youre wifis, right as Crist lovede Holy Chirche, and toke Himself wilfully to peyne and deth for Holy Chirche, to make it clene and holy; and made it clene bi waschynge of water in the word of lif, to geve the Chirche glorious to Himself, not havynge wem ne revelynge ne ony siche filthe, but that it be holy and withouten spot other wem. And housbondis owen to love here wifis as here owene bodies, for he that loveth his wif loveth hymself. For no man hatid evere his bodi, but norischith and fortherith it, as Crist doth Holy Chirche. For we ben membris of his body, of his flesch, and of his bones. For this thyng a man schal forsake, or leve, his fadir and his modir, and schal cleve to his wif, and thei schullen be tweiyne in o flesch. This sacrament is greet, but i-saye, seith Poul, in Crist and in Holy Chirche. But forsothe, ye husbondis, eche by hymself, love he his wif as hymself, and drede the wif here housbonde. Ye children, obeischith to youre eldris, fader and thi modir, in the Lord, for this thing is rightful. Worschipe thi fadir and thi modir - that is the firste comaundement in biheste; that Crist be wel to thee, and that thou be longe lyvynge upon erthe. And ye fadris, nyle ye stire youre children to wraththe, but norische hem and brynge hem forth in disciplyne, or lore, and chastisynge of God. Alle this seith Seynt Poul togidre. Also Poul comaundith thus in another pistel: wymmen, be ye underlont to youre husbondis, as it bihoveth in the Lord. Ye men, love youre wifis, and beth not bitter to hem. Children, obieschith to youre eldris bi alle thingis, for this is plesaunt to the Lord. Ye fadris, stireth not youre children to indignacion, lest thei of litel witt offenden, or trespasen, agenst God or man.     Here sturdy husbondis and cruel fightteris with here wifis, withoute resonable cause, ben blamyd of God. But manye, whanne thei ben drounken, comen hom to here wifis, and sumtyme fro here cursed strumpatis and jectouris of contré, and chiden and fightten with ther wif and meyné, as thei weren Sathanas brollis; and suffren neither reste, pees, ne charité be among hem. But dere schalle thei abie this bitternesse, for yif thei wolen have mercy of God thei moten have mercy of othere men, though thei hadden discervyd betynge, - amende hem in faire manere.     Of this may weddid men and wifis knowen, hou thei owen lyve togidre, and teche here childre Goddis lawe. For at the bigynnynge a childe may esily be taught, and goode thewis and maneris, accordynge with Goddis lawe, esily be prentid in his herte; and thanne he may esily holden hem forthe, and encresse in goodnesse. And therfore Poul biddith that the fadir norische his children in the lore and chastisynge of God; and God comaundith in the olde lawe that the fadris schulden telle to herre children Goddis hestis, and the woundris and myraclis that he dide in the lond of Egipt, and in the Rede See, and in the watir of Jordan, and in the Lond of Biheste. And moche more ben fadir and moder holden to teche here children the bileve of the Trinyté, and of Jesus Crist, howe He is verray God withouten bigynnynge, and was maad man thorough moste brennynge charité, to save mankynde bi stronge penaunce, hard torment, and bittir deth. And so alle comen in poyntis of Cristene bileve, but thei ben most holden to teche hem Goddis hestis, and the werkis of mercy, and poyntis of charité, and to geverne wel here fyve wittis, and to drede God bifore alle othere thingis, and to love Him most of alle thingis, for His endeles myght, endeles wisdom, endelesse goodnesse, mercy, and charité. And yif thei trespasen agenst Goddis hestis, thei owen to blamen hem therfore scharply, and chastise hem a thousandfold more than for dispit or unkyndenesse don agenst here owene persone. And this techynge and chastisynge schulden in fewe yeeris make goode Cristene men and wymmen, and namely goode ensaumple of holy lif of olde men and wymmen, for that is best techynge to here children.     And Cristene men, aboute many prestis, chargen godfadris and godmodris to techen the children the Pater Noster and the Crede; and this is wel don; but it most nede to teche hem the hestis of God, and geve hem good ensaumple bi here owene lif. For though thei ben cristenyd and knowen the comyn poyntis of bileve, yit thei schullen not be savyd withoute kepynge of Goddis hestis, but be ful hard and depe dampynd in helle, more than hethene men. And it hadde betre be to hem to nevere have reseyved Cristendom, but yif thei enden trewely in Goddis comaundementis, as Seynt Petir techith pleynly.     But summe techen here children jeestis of bataillis and fals cronyclis not nedful to here soulis. Summe techen novelries of songis, to stire men to jolité and harlotrie. Summe setten hem to nedeles craftis, for pride and coveitise; and summe suffren hem in ydelnesse and losengerie, to breden forth strumpatis and theves; and summe with grett cost setten hem in lawe for wynnynge and worldly worschipe, and here to costen hugely in many weies. But in alle this Goddis lawe is putt bihynde, and therof spekith unnethis ony man a good word to magnifye God and that, and to save mennys soulis. Sume techen here children to swere and stare and fightte, and schrewe alle men aboute, and of this han gret joie in here herte. But certis thei ben Sathanas techeris, and procuratouris to lede hem to helle bi here cursed ensaumple and techynge and norischynge and meyntenynge in synne; and ben cruel sleeris of here owene children, ye, more cruel than though thei hackeden here children as small as morselis to here poot or mouth. For bi this cursid technyge and endynge therin, here children bodies and soulis ben dampnyd withouten ende in helle. And though here bodies weren thus hackid nevere so smale, bothe bodi and soule schal be in blis of hevene, so that thei kepen trewely Goddis comaundementis. And of siche necligent fadris and modris, that techen not here children Goddis lawe, and chastisen hem not whanne thei trespasen agenst Goddis hestis, Seynt Poul spekith a dredeful word. He that hath not care of his owene, and most of his homly in houshod, hath resceyved the feith, and he is worse than a man out of Cristendom. And siche fadris and modris, that meyntenen wityngly here children in synne, and techen hem schrewdnesse, ben werse than the cursed fadris that killeden here children, and offre hem up to stockis, worschipynge false maunmetis. For tho children in here youghthe weren ded and distried, and diden no more synne; but thes children of cursed fadris and modris, that techen hem pride, thefte, lecherie, wraththe, coveitise, and glotonye, and meyntenen hem therinne, ben holden in long lif, and encresen in synne to more dampnacion of eche party. And thus litel wonder though he take vengaunce on oure peple both old and yong, for alle comynly dispisen God, and han joie and myrthe at his dispit and reprovynge. And God mot ponische this synne for his rightful majesté.     But though husbondis han thus power over his wifis bodi, netheles thei owen to use this doynge in mesure and reson, and sumwhat refreyne here foule lustis, and not take superfluyté of hot wynes and spised alle and delicat metis to delite hem in this occupacion, but thenk that thei ben gestis and pilgrimes in the world, and han not here a dwellynge-place forevere. And therfore thei mosten geve hem to holynesse, withouten whiche no man schal see God; and abstynen hem fro fleschly desiris that fightten agenst the soule, as Petir and Poul techen bi auctorité of God Hymself; and thenke on this word of Seynt Poul; - The tyme is schort; the tother part is that thei that han wifes ben as havynge noon; that is to seie, that thei usen hem for and in drede of God and mesure, not to fulfille here lustis, as bestis withoute undirstondynge; and that thei have mynde of the dredful comynge of Crist to the laste dom, hou thei schullen thanne answere for eche dede, eche word, and eche thought, - and eche evyl suffraunce of here children and meyné, and princypaly of evyl ensaumple to here sugetis. And ne cavyllacion ne procuratour schal be there, but here owene goode lif to save hem, or cursed lif to dampne hem. And fleschly lustis, and glotonye, dronkenesse, and overe moche likynge in fleschly dedis and lecherie, maken men most to forgete this dredful dom. And therfore the gospel seith, that the thridde servaunt that hadde wedded a wif, seide that he myghtte not come to the soper of Crist, and that servaunt is undirstonden, he that geveth hym to overe moche likynge in fleischly lustis. And therfore biddith Crist in the gospel, that we take hede that oure hertis ben not chargid with glotonye and dronkenesse and bisyness of this lif, for the day of dom schal come as a snare, or grane, upon alle tho that sitten upon the face of alle the erthe.     But ben wifis war that thei stiren not here husbondis to wraththe, ne envye agenst here neigheboris, ne to falsnesse and overe moche bisynesse of the world, to fynde to costy array. For the wif was made to be an helpere lich to the husbounde, eche to helpe other in clennesse and holy lif, and trewe anentis God and man. But yif the husbonde be stired to vengaunce and pride and envye, the wif oweth to stire hym to penaunce and pacience, mekenesse and charité, and alle good manere of Cristene lif. And whanne Goddis lawe biddith the husbonde and the wif love eche other, be thei war that thei turnen not this love al to fleschly love, and not to love of the soule, for thei ben holden moche more to love the soule than the body, for God loveth that more than the bodi, and for the soule Crist diede. And certis love of the body is verrey hate, but yif it be in helpe to save the soule, and kepe it in holy lif.     But yit thre grete defautis fallen many tymes in weddid men and wymmen. The firste defaute is, as Seynt Jon with the gildene mouth seith, that thei maken sorowe yif here children ben nakid or pore, but though here children ben nakid fro virtues in soule, thei chargen nothing. And with moche traveile and cost thei geten grete richessis and heighe statis and beneficis to here children, to here more dampnacion ofte tymes, but thei wolen not gete here children goodis of grace and virtuous lif, ne suffre hem to resceyve siche goodis, frely profrid of God, but letten it as moche as thei may; and seyn, yif here child drawe hym to mekenesse and povert, and flee coveitise and pride, for drede of synne and for to plese God, that he schal nevere be man, and nevere coste hem peny, and cursen hem, yif he lyve wel and techen othere men Goddis lawe, to save mennis soulis. For bi this doynge the child getith many enemyes to his eldris, and thei seyn that he sclaundrith alle here noble kyn, that evere weren helde trewe men and worschipful.     The secunde defaute is that wifis geven here husbondis goodis to stronge beggeris and riche, and othere curleris, to geten hem swete morselis, and sumtyme spende here husbondis goodis aboute holouris and lecherous, the while here husbondis traveilen fare in ferre contreies or grevous traveiles. And to holden holy and excuse this wickidnesse, wifis many tymes don a litil almes opynly and fynden ypocritis to seyn massis and maken the sely husbondis to meyntene siche ypocritis in here falsnesse, to robbe the pore peple and to lette trewe men to teche Goddis lawe and to favoure false sclaunderis of here brethren. And yif wifis favouren and meyntenen siche ypocritis and stiren here husbondis therto, for preve lecherie bitwen hemself and for fals sykernesse that the ypocritis maken to hem, though thei dwellen stille as swyn in synne, it is so mochel the worse.     The thridde defaute is this: yif Almyghtty God, of His rightwisnesse and mercy, take here children out of this world bi fair deeth, thes riche wifis wepen, grucchen, and crien agenst God, as God schulde not do agenst here wille; and axen God whi He takith rathere here children fro hem than pore mennis, sith thei may betre fynde here children than may pore men heren. See now the woodnesse of this grucchynge! It is gret mercy of God to take a child out of this world; for yif it schal be saaf, it is delyverid out of woo into blisse, lest malice turnyd the undirstondynge of the child to synne, and that is gret mercy of God, and herefor alle men schulden be glade. Yif it schal be dampnyd, yit it is mercy of God to take hym soone to deth, leste it lyve lengere, and do more synne, and therfore be in more peyne. And sith thei grucchen thus agenst Goddis rightful dom, thei putten on God that He is unrightful, - unwitty, - that He knowith not whanne is best tyme of the child, and out of mercy and charité ponysche so sore the child and his eldris. But certis than thei ben cursed Luciferis children, weiward Anticristis, and unkynde heretikis and blasphemes. Therfore be thei glade, and thanke thei God for al His mercyes, and benefices, and rightful domes. Amen.     Also loke that eche parti enforce hymself to kepe this ordre maad of God, and breke it not for no temptacion ne likynge of flesch. And hereto helpen many resones. First, for God that is auctour of this ordre loveth it to be kept in clennesse and present in every place, and for His rightwisnesse mot ponyschen hym that brekith it. And no defoulynge therof may askape unpeyned, for He knoweth alle thingis, be thei nevere so prevé; and nothing, be it nevere so myghtty, may agenstonde His ponyschynge. Also thenk hou soone this stenkynge flesch, that now deliteth in lecherie, schal turne alle to aschis, and poudre, and erthe, and wermes mete; and for so schort likynge to lese everelastynge blisse and to gete everelastynge peyne in helle, in body and soule, were a cursed chaunge; and no man wot hou soone he schal die, and in what staat. Also goode angelis, keperis of men and wymmen, schewen to God a grevous pleynt, whanne this holy ordre is thus broken, and Cristene soulis, templis of the Holy Gost, ben thus wickidly bleckid with filthe of synne, and maad liche to the fendis of helle. And for this skille, men and wymmen schulden be wel occupied in goode werkis, and not ydel; for ydelnesse is the develis panter, to tempte men to synne; and lyven in devout preieris and resonable and abstynence of mete, and namely of hote drynkis and myghtty, and visite here pore neigheboris that ben bedrede, and clothe hem, and herberwe hem, to gete remyssion of over moche likynge in fleschly dedis; and evere crie to God with gret desire and good lif, that He graunte hem grace to kepe clenly this holy ordre, and do verrey penaunce for here olde synnes, to ende in perfit charité, and so evere have here verrey spouse, Jesus Crist, in blisse of hevene withouten enden. Amen. Explicit.

Wyclif (?), Of Weddid Men and Wifis and of Here Children Also, Select Bibliography

Manuscripts

Bodleian Library MS Bodley 938 (SC 3054), fols. 62a-73a (early fifteenth century).

Cambridge University Library MS 756, fols. 3a-16a (late fourteenth century).

British Library MS Additional 24202, fols. 29a-33b (late fourteenth century).

Corpus Christi College Cambridge MS 296, fols. 224-35 (late fourteenth century). [Base text for this edition.]


Critical Edition

Arnold, Thomas, ed. Select English Works of John Wyclif. Vol. 3. Oxford: Clarendon Press, 1871. Pp. 188-201. [Based on Cambridge MS Corpus Christi 296.]


Selections

Vaughan, Robert, ed. Tracts and Treatises of John de Wycliffe, D.D. with Selections and Translations from His Manuscripts and Latin Works. London: Blackburn, 1845. Pp. 58-59.

Winn, Herbert E., ed. Wyclif: Select English Writings. Oxford: Oxford University Press, 1929. Pp. 105-07.


Related Studies

Aston, Margaret. "'Caim's Castles': Poverty, Politics, and Disendowment." In The Church, Politics and Patronage in the Fifteenth Century. Ed. R. B. Dobson. Gloucester: A. Sutton, 1984. Pp. 45-81.

---. Lollards and Reformers: Images and Literacy in Late Medieval Religion. London: Hambledon Press, 1984.

---. "Wyclif and the Vernacular." SCH Subsidia 5 (1987), 281-330.

Hargreaves, H. "Sir John Oldcastle and Wycliffite Views on Clerical Marriage." Medium Aevum 42 (1973), 141-45.

Hudson, Anne. The Premature Reformation: Wycliffite Texts and Lollard History. Oxford: Clarendon Press, 1988.

---. Lollards and Their Books. London: Hambledon Press, 1985.

Kenny, Anthony, ed. Wyclif in His Times. Oxford: Clarendon Press, 1986.

Lambert, Malcolm. Medieval Heresy: Popular Movements from Bogomil to Hus. London: Blackwell, 1977; rpt. 1992.

Matthew, F. D., ed. The English Works of Wyclif Hitherto Unprinted. EETS o.s. 74. London: Trübner & Co., 1880. [Does not contain "Of Weddid Men."]

McFarlane, K. B. Lancastrian Kings and Lollard Knights. Oxford: Clarendon Press, 1972.

---. John Wycliffe and the Beginnings of English Nonconformity. London: The English Universities Press, 1952; rpt. 1966.

Murdoch, Vaclav. The Wyclyf Tradition. Ed. Albert Compton Reeves. Athens: Ohio University Press, 1978.

Robson, John Adam. Wyclif and the Oxford Schools: The Relation of the "Summa de ente" to Scholastic Debates at Oxford in the Later Fourteenth Century. Cambridge: Cambridge University Press, 1961.

Stacey, John. John Wyclif and Reform. London: Lutterworth Press, 1964.

Workman, Herbert B. John Wyclif: A Study of the English Medieval Church. Hamden, CT: Archon Books, 1966.