1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 247 248 249 250 251 252 253 254 255 256 257 258 259 260 261 262 263 264 265 266 267 268 269 270 271 272 273 274 275 276 277 278 279 280 281 282 283 284 285 286 287 288 289 290 291 292 293 294 295 296 297 298 299 300 301 302 303 304 305 306 307 308 309 310 311 312 313 314 315 316 317 318 319 320 321 322 323 324 325 326 327 328 329 330 331 332 333 334 335 336 337 338 339 340 341 342 343 344 345 346 347 348 349 350 351 352 353 354 355 356 357 358 359 360 361 362 363 364 365 366 367 368 369 370 371 372 373 374 375 376 377 378 379 380 381 382 383 384 385 386 387 388 389 390 391 392 393 394 395 396 397 398 399 400 401 402 403 404 405 406 407 408 409 410 411 412 413 414 415 416 417 418 419 420 421 422 423 424 425 426 427 428 429 430 431 432 433 434 435 436 437 438 439 440 441 442 443 444 445 446 447 448 449 450 451 452 453 454 455 456 457 458 459 460 461 462 463 464 465 466 467 468 469 470 471 472 473 474 475 476 477 478 479 480 481 482 483 484 485 486 487 488 489 490 491 492 493 494 495 496 497 498 499 500 501 502 503 504 505 506 507 508 509 510 511 512 513 514 515 516 517 518 519 520 521 522 523 524 525 526 527 528 529 530 531 532 533

T             T N         N       T                       T T           T     T               T           N, T     T     N                   N, T     T                                                               T                       N               T                                     T                                     T T         N     N     N             N, T             T T                 T   T                     N         N       N T     N                     T                               N                   T                             N                               T     T                   T               T             T   T                       T   T       T                                       N                                           T     N           N                                       T T         T                                                                           T           T                                           N     N

Part Five Confession Twa thinges neometh yeme of schrift i the biginnunge: the earre, of hwuch mihte hit beo; the other, hwuch hit schule beon. This beoth nu as twa limen ant either is todealet, the earre o sixe, the other o sixtene stucchen. Nu is this of the earre:     Schrift haveth monie mihtes, ah nulle ich of alle seggen bute sixe: threo ayein the deovel ant threo on us-seolven. Schrift schent then deovel, hacketh of his heaved, ant todreaveth his ferd. Schrift wescheth us of alle ure fulthen, yelt us alle ure luren, maketh us Godes children. Either haveth hise threo. Pruvie we nu alle. The earste threo beoth alle i-schawde i Judithe deden. Judith - thet is, schrift, as wes yare i-seid - sloh Oloferne - thet is, the feond of helle. Turn th'ruppe ther we speken of fuhelene cunde the beoth i-evenet to ancre. Ha hackede of his heaved ant seoththen com ant schawde hit to the burh-preostes. Thenne is the feond i-schend, hwen me schaweth alle hise cweadschipes: his heaved is i-hacket of, ant he i-slein i the mon, sone se he eaver is riht sari for his sunnen ant haveth schrift on heorte. Ah he nis nawt the yet i-schend hwil his heaved is i-hulet, as dude on earst Judith, ear hit beo i- schawet - thet is, ear the muth i schrift do ut the heaved sunne - nawt te sunne ane, ah al the biginnunge th'rof, ant te fore-ridles the brohten in the sunne - thet is, the deofles heaved, thet me schal totreoden anan, as ich ear seide. Thenne fli[t]h his ferd anan as dude Olofernes: his wiheles ant his wrenches thet he us with asaileth, doth ham alle o fluhte ant te burh is arud thet ha hefden biset. Thet is to seggen, the sunfule is delifret. Judas Macabeu - hwa stod ayein him? Alswa i Judicum, thet folc tha hit easkede efter Josues death, hwa schulde beon hare dug ant leaden ham i ferde: Quis erit dux noster? Ure Laverd ham ondswerede: Judas schal gan bivoren ow, ant ich chulle ower faes lond biteachen in his honden. Lokith nu ful yeorne hwet tis beo to seggen: Josue spealeth "heale," ant Judas "schrift" - as Judith. Thenne is Josue dead hwen sawle heale is forloren thurh eani deadlich sunne. The sunfule seolf is the unwihtes lond, the is ure deadliche fa, ah this lond ure Laverd bihat to biteachen i Judase honden, for-hwon thet he ga bivoren. Schrift, lo, is gunfanuner, ant bereth the banere bivoren al Godes ferd - thet beoth gode theawes. Schrift reaveth the feond his lond - thet is, the sunfule mon - ant al todriveth Chanaan the feondes ferd of helle. Judas hit dude licomliche, ant schrift thet hit bitacneth deth gasteliche thet ilke. This beoth nuthe threo thing [thet schrift deth o the deovel. The other threo thing] thet hit deth us-seolven - thet beoth theose her-efter.     Schrift wescheth us of alle ure fulthen, for swa hit is i-writen: Omnia in confessione lavantur. Glosa super: Confitebimur tibi, Deus, confitebimur. Ant thet wes bitacnet tha Judith wesch hire ant despulede hire of widewene schrud, thet wes merke of sorhe - ant sorhe nis bute of sunne: Lavit corpus suum et exuit se vestimentis sue viduitatis. Schrift eft al thet god thet we hefden forloren thurh heaved-sunne bringeth al ayein ant yelt al togederes. Joel: Reddam vobis annos quos comedit locusta, brucus, rubigo et erugo. This wes bitacnet thurh thet Judith schrudde hire mid hali- dahne weden ant feahede hire ute-with as schrift deth us in-with: with alle the feire urnemenz the blisse bitacnith. Ant ure Laverd seith thurh Zacharie, Erunt sicut fuerant antequam projeceram eos. Thet is, "schrift schal makie the mon al-swuch as he wes bivore thet he sunegede," ase cleane ant ase feier, ant ase riche of alle god the limpeth to sawle. The thridde thing is thet schrift deth us-seolven the frut of thes othre twa ant endeth ham bathe - thet is, maketh us Godes children. This is bitacnet ther-bi thet Judas i Genesy biwon of Jacob Benjamin. Benjamin seith ase muchel ase "sune of riht half." Judas - thet is "schrift," alswa as is Judith, for ba ha spealieth an on Ebreische ledene. Thes gasteliche Judas biyet of Jacob, his feader - thet is, ure Laverd - to beon his riht-hondes sune, ant bruken buten ende the eritage of heovene. Nu we habbeth i-seid of hwuch mihte schrift is, hwucch efficaces hit haveth, ant i-nempnet sixe. Loki we nu yeornliche hwuch schrift schule beon, the beo of swuch strengthe. Ant for-te schawin hit bet, deale we nu this lim o sixtene stucchen.     Schrift schal beo wreiful, bitter mid sorhe, i-hal, naket, ofte i-maket, hihful, eadmod, scheomeful, [dredful], hopeful, wis, soth, ant willes, ahne, ant stude-vest, bithoht bivore longe. Her beoth nu as thah hit weren sixtene stuchen the beoth i-feiet to schrift, ant we [schulen] of euch-an sum word sunderliche seggen:     Schrift schal beo wreiful. Mon schal wreien him i schrift, nawt werien him, ne seggen, "Ich hit dude thurh othre. Ich wes i-ned ther-to. The feond hit makede me don." Thus Eve ant Adam wereden ham - Adam thurh Eve, ant Eve thurh the neddre. The feond ne mei neden na-mon to na sunne, thah he eggi ther-to, ah ful wel he let of hwen ei seith thet he makede him to sunegin, as thah he hefde strengthe the naveth nan mid alle bute of us-seolven. Ah me ah to seggen, "Min ahne unwrestlec hit dude, ant willes ant waldes ich beah to the deovel." Yef thu witest ei thing thi sunne bute the- seolven, thu ne schrivest te nawt; yef thu seist thet tin unstrengthe ne mahte nawt elles, thu wrenchest thi sunne up-o Godd the makede the swuch, thet tu, bi thin tale, withstonde ne mahtest. Wreie we thenne us-seolven, for, lo, hwet Seinte Pawel seith, Si nos ipsos dijudicaremus, non utique judicaremur - thet is, "yef we wreieth wel her ant demeth her us-seolven, we schule beo cwite of wreiunge ed te muchele dome," thear as Seint Anselme seith theos dredfule wordes: Hinc erunt accusancia peccata; illinc, ter[r]ens justicia; supra, iratus judex; subtra, patens horridum chaos inferni; intus, urens consciencia; foris, ardens mundus. Peccator sic deprehensus in quam partem se premet? "O the an half o Domes[-dei] schulen ure swarte sunnen strongliche bicleopien us of ure sawle morthre. O the other half stont rihtwisnesse, thet na reowthe nis with, dredful ant grislich, ant grureful to bihalden; buven us, the eorre deme" - for ase softe as he is her, ase heard he bith ther; ase milde as he is nu, ase sturne thenne; lomb her, liun ther, as the prophete witneth: leo rugiet: quis non timebit? "The liun schal greden," he seith. "Hwa ne mei beon offearet?" Her we cleopieth him lomb as ofte as we singeth Agnus Dei, qui tollis peccata mundi. - Nu as ich seide, schule we seon buven us the ilke eorre deme thet is ec witnesse ant wat alle ure gultes; bineothen us, yeoniende the wide throte of helle; in-with us-seolven, ure ahne conscience - thet is, ure in-wit - forculiende hire-seolven, with the fur of sunne; withuten us, al the world leitinde o swart lei up into the skiwes. The sari sunfule thus biset - hu schal him stonde thenne? To hwuch of thes fowre mei he him biwenden? Nis ther buten heren thet hearde word, thet wa word, thet grisliche word, grureful over alle: Ite, maledicti, in ignem eternum qui paratus est diabolo et angelis ejus. "Gath ye, aweariede, ut of min eh-sihthe, into thet eche fur thet wes i-greithet to the feond ant to his engles. Ye forbuhe monne dom thet ich demde mon to - thet wes to libben i swinc, ant i sar on eorthe - ant ye schulen nu, for-thi, habben deofles dom, bearne with him echeliche i the fur of helle." With this, schulen the forlorene warpen a swuch yur, thet heovene ant eorthe mahen ba grimliche agrisen. For-thi, Seint Austin leofliche us leareth, Ascendat homo tribunal mentis sue, si illud cogitat, quod oportet eum exiberi ante tribunal Christi. Assit accusatrix cogitatio; testis, consciencia; carnifex, timor - thet is, thenche mon o Domes-dei ant deme her him- seolven thus o thisse wise. Skile sitte as domes-mon up-o the dom-seotel. Cume th'refter forth his thohtes munegunge, wreie him ant bicleopie him of misliche sunnen: "Beal ami, this thu dudest thear! ant tis thear! ant tis thear! ant o thisse wise." His in-wit beo i-cnawes th'rof ant beore witnesse: "Soth hit is! Soth hit is! This, ant muchele mare." Cume forth th'refter fearlac thurh the deme heast the heterliche hate: "Tac, bind him hete-veste, for he is deathes wurthe. Bind him swa euch lim thet he haveth with i- suneget thet he ne mahe with ham sunegi na mare." Fearlac haveth i-bunden him, hwen he ne dear for fearlac sturie toward sunne. Yet nis nawt the deme - thet is, skile - i-paiet, thah he beo i-bunden ant halde him with sunne, bute yef he abugge the sunne thet he wrahte, ant cleopeth forth pine ant sorhe, ant hat thet sorhe thersche in-with the heorte with sar bireowsunge, swa, thet hire suhie, ant pini the flesch ute-with mid feasten ant with othre fleschliche sares. Hwa-se o thisse wise, bivoren the muchele dom, demeth her him-seolven, eadi he is ant seli. For as the prophete seith, Non judicabit Deus bis in id ipsum. "Nule nawt ure Laverd thet a mon for a thing beo twien i- demet." Hit nis nawt i Godes curt as i the schire, ther-as the thet nicketh wel mei beon i-borhen, ant te ful the is i-cnawen. Bivore Godd is other-weis. Si tu accusas, Deus excusat, et vice versa. "Yef thu wreiest te her, Godd wule werie the thear," ant skerin mid alle ed te nearewe dome, for-hwon thet tu deme the as ich i-taht habbe.     Schrift schal beo bitter, ayein thet te sunne thuhte sum-chearre swete. Judith, the spealeth "schrift," as ich ofte habbe i-seid, wes Merarihtes dohter. Ant Judas - thet is ec "schrift" - wivede o Thamar. "Merariht" ant "Thamar" ba ha spealieth an on Ebreische ledene. Neometh nu yeorne yeme of the bitacnunge; ich hit segge scheortliche. Bitter sar ant schrift - thet an mot cumen of the other, as Judith dude of Merariht. Ant ba beon somet i-feiet, as Judas ant Thamar. For nowther withuten other nis noht wurth, other lutel - Phares ant Zaram, ne temith ha neavre. Judas streonede of Thamar Phares ant Zaram. Phares divisio, Zaram oriens interpretatur, the gasteliche bitacnith tweamunge from sunne, ant i the heorte th'refter arisinde grace. Fowr thinges, yef mon thencheth thet heaved sunne dude him, mahen makien him to sorhin ant bittrin his heorte. Lo, this the forme: yef a mon hefde i-losed in a time of the dei his feader ant his moder, his sustren ant his brethren, ant al his cun, ant alle his freond thet he eaver hefde weren astorven ferliche, nalde he over alle men sorhful beon ant sari, as he eathe mahte? Godd wat, he mei beon muche deale sorhfulre thet haveth with deadlich sunne gasteliche i-slein Godd in-with his sawle, nawt ane forloren the swete feader of heovene, ant Seinte Marie, his deore-wurthe moder, other Hali Chirche - hwen he of hire naveth ne leasse ne mare - ant te engles of heovene, ant alle hali halhen, the weren him ear for freond, for brethren ant for sustren. As to him ha beoth deade. As onont him is, he haveth i-slein ham alle, ant haveth, thear as ha livieth aa, leaththe of ham alle, as Jeremie witneth: Omnes amici ejus spreverunt eam; facti sunt ei inimici - thet is, "al thet him luvede yeieth spi him on, ant heatieth him alle." Yet mare, his children sone se he sunegede deadliche deiden alle clane - thet beoth his gode werkes, the beoth forloren alle. Yet upon al this ilke he is him-seolf biwrixlet ant bicumen of Godes child the deofles bearn of helle, eatelich to seonne as Godd seolf i the Godspel seith: Vos ex patre diabolo estis. Thenche euch of his estat, thet he is other wes in, ant he mei seon hwer-vore he ah to siken sare. For-thi seith Jeremie, Luctum unigeniti fac tibi, planctum amarum. "Make bitter man, as wif deth for hire child the nefde bute him ane" ant sith hit bivoren hire fearliche asteorven. Nu the other thet ich bihet: A mon the were i-demet for a luther morthre to beo forbearnd al cwic, other scheomeliche ahonget - hu walde his heorte stonden? Me thu, unseli sunful, tha thu thurh deadlich sunne murthredest Godes spuse - thet is, thi sawle - tha thu were i-demet for-te beon ahonget o bearninde weari-tre i the eche lei of helle.     Ther thu makedest foreward mid te deovel of thi death, ant seidest in Ysaie with the forlorene, Pepigimus cum morte fedus, et cum inferno inivimus pactum - thet is, "we habbeth treowthe i-pliht death, foreward i-feast mid helle." For this is the feondes chaffere: he yeove the sunne, ant tu him thi sawle, ant ti bodi mid al, to weane ant to wontreathe, world abuten ende. Nu the thridde scheortliche: Thench - a mon the hefde al the world o walde, ant hefde for his cweadschipe forloren al on a stunde - hu he walde murnin ant sari i-wurthen. Thenne ahest tu to beon hundret sithe sarure, the thurh an heaved sunne forlure the riche of heovene - forlure ure Laverd, thet is hundret sithen, ye, thusent thusent sithen betere then is al the world, eorthe ba ant heovene. Que enim conventio Christi ad Belial. Nu yet the feorthe: yef the king hefde bitaht his deore sune to his an cniht to lokin, ant untheode leadde forth this child in his warde swa thet tet child seolf weorrede upon his feader with thet untheode, nalde the cniht beo sari ant scheomien ful sare? We beoth alle Godes sunen - the kinges of heovene - the haveth bitaht ure euch an engel i warde. Sari is he on his wise hwen untheode leat us forth - hwen we ure gode feader wreatheth with sunne. Beo we sari thet we eaver schulen wreathen swuch feader ant sweamen swuch wardein, the wit ant wereth us eaver with the unseli gastes, for elles uvele us stode. Ah we schuhteth him awei hwen we doth deadlich sunne, ant heo leapeth thenne to, sone se he us firseth. Halde we him neh us with smeal of gode werkes, ant us in his warde. Wat Crist, ure euch-an to se g[ent]il wardein bereth to lutel menske, ant kunnen him to lutel thonc of his servise. Theos ant monie reisuns beoth hwi mon mei beo bitterliche sari for his sunnen ant wepen ful sare. Ant wel is him the swa mei, for wop is sawle heale. Ure Laverd deth toward us as me deth to uvel deattur: nimeth leasse then we ahen him, ant is thah wel i-paiet. We ahen him blod for blod, ant ure blod, thah, ayein his blod thet he schedde for us were ful unefne change. Ah wast tu hu me yeddeth: "me nimeth ed uvel dettur aten for hweate," ant ure Laverd nimeth ed us teares ayein his blod, ant is wil-cweme. He weop o the rode, o Lazre, o Jerusalem - for other monne sunnen. Yef we wepeth for ure ahne, nis na muche wunder. "Wepe we," quoth the hali mon i Vitas Patrum, tha me hefde longe on him i-yeiet efter sarmun. "Leote we," quoth he, "teares leste ure ahne teares forseothen us in helle."     Schrift schal beon i-hal - thet is, i-seid al to a mon, ut of childhade. The povre widewe, hwen ha wule hire hus cleansin, ha gedereth al the greaste on an heap on alre earst, ant schuveth hit ut thenne. Th'refter kimeth eft ayein ant heapeth eft togederes thet wes ear i-leavet ant schuveth hit ut efter. Th'refter o the smeale dust, yef hit dusteth swithe, ha flasketh weater ant swopeth ut efter al thet other. Alswa schal the schriveth him efter the greate schuven ut the smealre. Yef dust of lihte thohtes windeth to swithe up, flaski teares on ham, ne schulen ha nawt thenne ablende the heorte ehnen. Hwa-se heleth ea-wiht, he naveth i-seid na-wiht for-hwon he beo the skerre, ah is i-lich the mon the haveth on him monie deadliche wunden ant schaweth the leche alle ant let healen, buten an, thet he deieth upon as he schulde on alle. He is ase men in a schip the haveth monie thurles ther the weater threasteth in, ant heo dutteth alle buten an thurh hwam ha druncnith alle clane. Me teleth of the hali mon the lei on his death- uvel ant wes lath to seggen a sunne of his childhad, ant his abbat bed him allegate seggen. Ant he ondswerede thet hit nere na neod, for-thi thet he wes lute child tha he hit wrahte. O least thah, unneathe thurh the abbates ropunge, thet he hit seide ant deide th'refter sone. Efter his death, com a niht ant schawde him to his abbat i snaw-hwite schrudes, as the thet was i-borhen, ant seide thet sikerliche, yef he nefde thet ilke thing thet he dude i childhad i schrift utterliche i-seid, he were i-demet bimong the forlorene. Alswa of an-other thet wes for neh fordemet for-thi thet he hefde en-chearre i-ned a mon to drinken ant deide th'rof unschriven. Alswa of the leafdi, for-thi thet ha hefde i- leanet to a wake a wummon an of hire weden. Ah hwa-se haveth yeorne i-soht alle the hurnen of his heorte, ne ne con rungi mare ut, yef ther ea-wiht edluteth, hit is, ich hopie, i the schrift i-schuven ut mid tet other, hwen ther ne lith na yemeles, ant he walde fein mare yef he cuthe seggen.     Schrift schal beo naket - thet is, naketliche i-maket, nawt bisamplet feire, ne hendeliche i-smaket, ah schulen the wordes beon i-schawet efter the werkes. Thet is tacne of heatunge, thet me tuketh to wundre thing thet me heateth swithe. Yef thu heatest ti sunne, hwi spekest tu menskeliche th'rof? Hwi hudest tu his fulthe? Spec hit scheome schendfulliche, ant tuk hit al to wundre, alswa as thu wel wult schende then schucke. "Sire," ha seith, the wummon, "ich habbe i-haved leofmon," other "ich habbe i-beon," ha seith, "fol of me-seolven." This nis nawt naket schrift. Biclute thu hit nawt. Do awei the totagges. Unwrih the ant sei, "Sire - Godes are! - ich am a ful stod- meare, a stinkinde hore." Yef thi fa a ful nome ant cleope thi sunne fule. Make hit i schrift steort-naket - thet is, ne hel thu na-wiht of al thet lith ther-abuten, thah to fule me mei seggen. Me ne thearf nawt nempnin thet fule dede bi his ahne fule nome, ne the schendfule limes bi hare ahne nome - inoh is to seggen swa thet te hali schrift-feader witerliche understonde hweat tu wulle meanen. Abute sunne liggeth six thing thet hit hulieth, o Latin "circumstances," on Englisch "totagges" mahe beon i-cleopede: persone, stude, time, manere, tale, cause. Persone the dude the sunne, other with hwam me hit dude, unwreo ant segge, "Sire, ich am a wummon ant schulde bi rihte beo mare scheomeful to habben i-speken as ich spec, other i-don as ich dude, for-thi mi sunne is mare then of a wepmon, for hit bicom me wurse. Ich am "an ancre," "a nunne," "a wif i-weddet," "a meiden," "a wummon thet me lefde se wel," "a wummon the habbe ear i-beon i-bearnd with swuch thing, ant ahte the betere for-te beon i-warnet." Sire, hit wes with swuch mon" - ant nempni thenne - "munek," "preost," "other clearc," ant of thet ordre, "a weddet mon," "a ladles thing," "a wummon as ich am." This is nu of persone. Alswa of the stude, "Sire, thus ich pleide other spec i chirche," "eode o ring i chirch-yard," "biheold hit other wreastlunge, ant othre fol gomenes," "spec thus other pleide bivoren worltliche men, bivoren recluse in ancre-hus, ed other thurl then ich schulde, neh hali thing." "Ich custe him ther," "hondlede him i swuch stude, other me-seolven." "I chirche ich thohte thus," "biheold him ed te weovede." Of the time alswa, "Sire, ich wes of swuch ealde thet ich ahte wel to habben wisluker i-wite me." "Sire, ich hit dude in lenten, i feasten dahes, in hali dahes, hwen othre weren ed chirche." "Sire, ich wes sone overcumen, ant is the sunne mare then yef ich hefde i-beon akeast with strengthe ant feole swenges." "Sire, ich wes the biginnunge hwi swuch thing hefde forth-gong, thurh thet ich com i swuch stude ant i swuch time. Ich bithohte me ful wel ear then ich hit eaver dude, hu uvele hit were i-don ant dude hit no-the-leatere." The manere alswa seggen - thet is the feorthe totagge. "Sire, this sunne ich dude thus ant o thisse wise." "Thus ich leornede hit earst." "Thus ich com earst th'rin." "Thus ich dude hit forth-ward o thus feole wisen, thus fulliche, thus scheomeliche." "Thus ich sohte delit, hu ich meast mahte paien mi lustes brune," ant seggen al the wise. Tale is the fifte totagge - [hu ofte hit is i-don tellen al: "Sire, ich habbe this thus ofte i-don, i-wonet for to speoke thus, hercni thullich speche, thenchen hwiche thochtes, foryeme thing ant foryeoten, lachyen, eoten, drinken, lasse other mare thenne neode asketh." "Ich habbe i-beon thus ofte wrath seoththen ich wes i-schriven nest, ant for thulli thing, ant thus longe hit leste, thus ofte i-seid les, thus ofte this ant this." "Ich habbe i- don this to thus feole, ant thus feole sithen." Cause is the seste totagge.] Cause is hwi thu hit dudest, other hulpe othre ther-to, other thurh hwet hit bigon. "Sire, ich hit dude for delit, for uvel luve, for biyete, for fearlac, for flatrunge." "Sire, ich hit dude for uvel, thah ther ne come nan of." "Sire, mi lihte ondswere other mine lihte lates tulden him earst up-o me." "Sire, of this word com other, of this dede wreaththe ant uvele wordes." "Sire, the acheisun is this hwi thet uvel leasteth yet." "Thus wac wes min heorte." Euch, efter thet he is, segge his totagges: mon as limpeth to him, wummon thet hire rineth. For her nabbe ich nan i-seid bute for-te munegin mon other wummon of theo the to ham falleth thurh theo the beoth her i-seide as on urn. Thus of theose six wriheles despoile thi sunne ant make hit naket i thi schrift, as Jeremie leareth: Effunde sicut aquam cor tuum. "Sched ut ase weater thin heorte." Yef eoile schet of a feat, yet ter wule leaven in sum-hwet of the licur; yef milc schet, the heow leaveth. Yef win sched, the smeal leaveth. Ah weater geath al somet ut: alswa sched thin heorte - thet is, al thet uvel thet is i thin heorte. Yef thu ne dest nawt, lo, hu grurefulliche Godd seolf threateth the thurh Naum the prophete: Ostendam gentibus nuditatem tuam et regnis ignominiam tuam et proitiam super te abhominationes tuas. "Thu naldest nawt unwreo the to the preost i schrifte, ant ich schal schawin al naket to al folc thi cweadschipe, ant to alle kinedomes thine scheome sunnen, to the kinedom of eorthe, to the kinedom of helle, to the kinedom of heovene, ant trussin al thi schendfulnesse o thin ahne necke, as me deth o the theof the me leat to demen, ant swa with al the schendlac thu schalt trusse ant al torplin into helle." O, seith Sein Beornard, quid confusionis, quid ignominie erit, quando dissipatis foliis et dispersis universa nudabitur turpitudo. Sanies apparebit. "O," seith Sein Beornard, "hwuch schendlac, ant hwuch sorhe bith ther ed te dome, hwen alle the leaves schule beon towarplet, ant al thet fulthe schaweth him, ant wringeth ut thet wursum bivoren al the wide worlt, eorth ware ant heovenes, nawt ane of werkes, ah of idelnesses, of wordes ant of thohtes the ne beoth i-bet her, as Seint Anselme witneth: Omne tempus impensum requiretur a vobis, qualiter sit expensum. "Euc tide ant time schal beo ther i- rikenet, hu hit wes her i-spenet." Quando dissipatis foliis, et cetera. "Hwen alle the leaves," he seith, Sein Beornard, "schulen beo towarplet" - he biheold hu Adam ant Eve, tha ha hefden i the frumthe i-suneget, gedereden leaves ant makeden wriheles of ham to hare schentfule limen. Thus doth monie efter ham. Declinantes cor suum in verba malicie ad excusandas excusationes in peccatis.     Schrift schal beon ofte i-maket, for-thi is i the Sawter, Confitebimur tibi, Deus, confitebimur. Ant ure Laverd seolf seith to his deciples, Eamus iterum in Judeam. "Ga we eft," seide he, "into Judee" - "Judee" spealeth "schrift," ant swa we i-findeth thet he wende ofte ut of Galilee into Judee. "Galilee" spealeth "hweol," for-te learen us thet we of the worldes turpelnesse ant of sunne hweol ofte gan to schrifte. For this is the sacrement efter the weofdes sacrement, ant efter fulluht, thet te feond is lathest, as he haveth to hali men him-seolf - sare his unthonckes i-beon hit - i-cnawen. Wule a web beon ed en-chearre with a weater wel i-bleachet? A sol clath wel i-weschen? Thu weschest thine honden in anlepi dei twien other thrien, ant nult nawt the sawle, Jesu Cristes spuse - the eaver se ha is hwittre, se fulthe is senre upon hire, bute ha beo i- wesschen - nult nawt to Godes cluppunge ofte umbe seove-niht wesschen hire eanes! Confiteor, hali weater, beoden, hali thohtes, blesceunges, cneolunges, euch god word, euch god werc wesscheth smeale sunnen the me ne mei alle seggen. Ah eaver is schrift the heaved.     Schrift schal beon on hihthe i-maket: yef sunne timeth bi niht, anan other ine marhen. Yef hit timeth bi dei, ear then me slepe. Hwa durste slepen hwil his deadliche fa heolde an i-tohe sweord upon his heaved? The neappith upon helle breord, ha torplith ofte al in, ear ha least wenen. Hwa-se is i-fallen amid te bearninde fur - nis he mare then amead yef he lith, bithencheth him hwenne he wule arisen? A wummon the haveth i- losed hire nelde, other a sutere his eal, secheth hit anan-riht ant towent euch strea athet hit beo i-funden - ant Godd, thurh sunne forloren, schal liggen unsoht seove dahes fulle! Nihe thinges beoth thet ahten hihin to schrift: the pine thet okereth, for sunne is the deofles feh thet he yeveth to okere ant to gavel of pine, ant eaver se mon lith lengre in his sunne, se the gavel waxeth of pine i purgatoire other her other in helle: Ex usuris et iniquitate, et cetera. The other thing is the muchele ant te reowthfule lure thet he leoseth, thet na thing thet he deth nis Gode lic-wurthe. Alieni comederunt robur ejus. The thridde is death, thet he nat hwether he schule thet ilke dei ferliche asteorven. Fili, ne tardes, et cetera. The feorthe is secnesse, thet he ne mei thenche wel bute ane of his uvel, ne speoken as he schulde, bute granin for his eche, ant grunte, mare for his stiche then for his sunne. Sanus confiteberis et vivens. The fifte thing is muche scheome thet hit is, efter val to liggen se longe, ant hure under the schucke. The seste is the wunde thet eaver wurseth on hond, ant strengre is to healen. Principiis obsta. [Sero] medicina paratur cum mala per longas. The seovethe thing is uvel wune, thet Lazre bitacneth, the stonc - se longe he hefde i-lein i ther eorthe - o hwam ure Laverd weop, as the Godspel teleth, ant risede ant mengde him-seolven, ant yeide lude upon him ear he him arearde, for-te schawin hu strong hit is to arisen of uvel wune, the roteth in his sunne. Seinte Marie! Lazre stonc of fowr dahes. Hu stinketh the sunfule of fowr yer other of five! Quam difficile surgit quem moles male consuetudinis premit. "O," seith Seint Austin, "hu earmliche he ariseth, the under wune of sunne haveth i-lein longe." Circumdederunt me canes multi. "Monie hundes," seith Davith, "habbeth biset me." Hwen gredi hundes stondeth bivore the bord, nis hit neod yerde? As ofte as eani lecheth toward te ant reaveth the of thi mete, nult tu as ofte smiten? Elles ha walden kecchen of the al thet tu hefdest. Ant tu alswa thenne nim the yerde of thi tunge, ant as ofte as the dogge of helle kecheth ei god from the, smit him anan-riht mid te yerde of thi tunge i schrift, ant smit him se lutherliche thet him lathi ant drede to snecchen eft toward te. Thet dunt, of alle duntes, is him dunte lathest. The hund the fret lether other awuri[e]th ahte - me hit beat anan-riht thet he understonde for-hwi he is i-beaten; thenne ne dear he nawt eft do thet ilke. Beat alswa mid ti tunge [i] schrift the hund of helle anan-riht, ant he wule beon ofdred to do the eft swuch thucke. Hwa is se fol thet he seith bi the hund thet fret lether, "Abid athet to-marhen! Ne beat tu him nawt yetten!" Ah, "anan-riht beat! Beat, beat anan-riht!" Nis thing i the world thet smeorteth him sarre then deth swuch beatunge. Se me deoppre wadeth i the feondes lei-ven, se me kimeth up leatere. The eahtuthe thing is thet Seint Gregoire seith: Peccatum quod per penitentiam non diluitur, mox suo pondere ad aliud trahit - thet is, "sunne thet nis sone i-bet, draheth anan an-other," ant thet eft the thridde, ant swa euch-an cundleth mare ant wurse cundel then the seolve moder. The nihethe reisun is - se he ear biginneth her to don his penitence, se he haveth to beten leasse i pine of purgatoire. This beoth nu nihe reisuns, ant monie ma ther beoth, hwi schrift ah to beon i-maket aa on hihthe.     Schrift ah to beon eadmod, as the puplicanes wes, nawt as the phariseus wes, the talde his god-deden ant schawde thet hale forth, tha he schulde habben unw[r]ihen hise wunden. For-thi, he wende unhealet - as ure Laverd seolf teleth - ut of the temple. Eadmodnesse is i-lich theose cointe hearloz, hare gute-feastre, hare flowinde cweise thet ha putteth eaver forth. Ant yef hit is eatelich, ha schawith hit yet eateluker i riche monnes ehnen, thet ha habben reowthe of ham ant yeoven ham god the reathere. Hudeth hare hale clath, ant doth on alre uvemest fite-rokes al totorene. O this ilke wise, eadmodnesse eadmodliche bigileth ure Laverd ant biyet of his god with seli truandise: hudeth eaver hire god, schaweth forth hire poverte, put forth hire cancre, wepinde ant graninde bivore Godes ehnen, halseth meadlesliche on his derve passiun, on his deore- wurthe blod, on his fif wunden, on his moder teares, o the ilke tittes thet he seac, the milc thet hine fedde, on alle his halhene luve, o the deore druerie thet he haveth to his deore spuse - thet is, to cleane sawle, other to Hali Chirche - on his death o rode, for hire to biyeotene. With thus ane-wil ropunge, halseth efter sum help to the wrecche meoseise, to lechni with the seke, to healen hire cancre. Ant ure Laverd, i-halset swa, ne mei for reowthe wearnen hire ne sweamen hire with warne - nomeliche swa as he is se unimete large, thet him nis na thing leovere then thet he mahe i-finden acheisun for-te yeovene. Ah hwa-se yelpeth of his god, as doth i schrift theos prude, hwet neod is ham to helpe? Moni haveth a swuch manere to seggen hire sunnen thet hit is wurth a dearne yelp, ant hunteth efter here-word of mare halinesse.     Schrift ah to beon scheomeful: bi thet te folc of Israel wende ut thurh the Reade Sea, thet wes read ant bitter, is bitacnet thet we moten thurh rudi scheome - thet is, i soth schrift ant thurh bitter penitence - passin to heovene. God riht is, wat Crist, thet us scheomie bivore mon, the foryeten scheome tha we duden the sunne bivore Godes sihthe. Nam omnia nuda sunt et aperta oculis ejus, ad quem nobis sermo. "For al thet is, al is naket," seith Seinte Pawel, "ant open to his ehnen, with hwam we schulen rikenin alle ure deden." Scheome is the measte deal, as Seint Austin seith, of ure penitence: Verecundia pars est magna penetentie. Ant Sein Bernard seith thet na deore-wurthe yim-stan ne deliteth swa muchel mon to bihalden as deth Godes ehe the rude of monnes neb the riht seith hise sunnen. Understond wel this word. Schrift is a sacrement, ant euch sacrament haveth an i-licnesse ute-with of thet hit wurcheth in- with - as hit is i fulluht: the wesschunge withuten bitacneth the wesschunge of sawle withinnen. Alswa i schrift: the cwike rude of the neb deth to understonden thet te sawle, the wes bla ant nefde bute dead heow, haveth i-caht cwic heow ant is i-rudet feire. Interior tamen penitentia non dicitur sacramentum, set exterior vel puplica vel solempnis.     Schrift schal beo dredful, thet tu segge with Jerome, Quociens confessus sum, videor michi non esse confessus. "As ofte as ich am i-schriven, eaver me thuncheth me unschriven," for eaver is sum foryeten of the totagges. For-thi, seith Seint Austin, Ve laudabili hominum vite, si remota misericordia discutias eam - thet is, "the beste mon of al the world, yef ure Laverd demde him al efter rihtwisnesse, ant nawt efter mearci, wa schulde him i-wurthen." Set misericordia superexaltat judicium. "Ah his mearci toward us weieth eaver mare then the rihte nearewe."     Schrift schal beon hopeful. Hwa-se seith as he con, ant deth al thet he mei, Godd ne bit na mare. Ah hope ant dred schulen aa beon i-mengt togederes. This for-te bitacnin wes i the alde lahe i-haten thet te twa grindel-stanes ne schulde na-mon twinnin. The neothere, the lith stille ant bereth hevi charge, bitacneth fearlac, the teieth mon from sunne, ant is i-heveget her with heard for-te beo quite of heardre. The uvere stan bitacneth hope, the eorneth ant stureth hire i gode werkes eaver with trust of muche mede. Theos twa na-mon ne parti from other, for as Sein Gregoire seith, Spes sine timore luxuriat in presumptionem. Timor sine spe degenerat in desperationem. "Dred withuten hope maketh mon untrusten, ant hope withute dred maketh over- trusten." Theos twa untheawes, untrust ant over-trust, beoth the deofles tristen, ther thet wrecche beast seldene edstearteth. Triste is ther me sit mid te grea-hunz for-te kepe the heare, other tildeth the nettes ayein him. Toward an of theos twa is al thet he sleateth, for ther beoth his grea-hunz, ther beoth his nettes. Untrust ant over-trust beoth, of alle sunnen, nest te yete of helle. With dred, withuten hope - thet is, with untrust - wes Caymes schrift ant Judasen, for-hwi ha forferden. With hope, withute dred - thet is, with over-trust - is the unselies sahe, the seith i the Sawter, Secun- dum multitudinem ire sue non queret. "Nis nawt Godd," quoth ha, "se grim as ye him fore makieth." "Na?" he seith, Davith. "Yeoi he," ant seith thenne, Propter quid irritavit impius Deum? Dixit enim in corde suo non requiret. On alre earst he cleopeth the over-trusti unbilevet. "The unbilevet, with hwon gremeth he Godd almihti? With thon thet he seith, 'Nule he nawt se nearowliche demen as ye seggeth.'" Yeoi, siker ah he wule. Thus theos twa untheawes beoth to grimme robberes i-evenet. For the an - thet is, over-trust - reaveth Godd his rihte dom ant his rihtwisnesse. The other - thet is, untrust - reaveth him his milce. Ant swa ha beoth umben to fordon Godd seolf, for Godd ne muhte nawt beon withuten rihtwisnesse, ne withuten milce. Nu thenne, hwucche untheawes beoth evening to theose the wulleth Godd acwellen on hare fule wise? Yef thu art to trusti ant haldest Godd to nessche for-te wreoke sunne, sunne liketh him, bi thin tale. Ah bihald hu he wrec in his heh engel the thohte of a prude, hu he wrec in Adam the bite of an eappel, hu he bisencte Sodome ant Gommorre, were ant wif ant wenchel, the nome-cuthe burhes, al a muche schire, dun into helle grunde - ther-as is nu the Deade Sea thet na-wiht cwikes nis inne - , hu he i Noes flod al the world adrencte, bute eahte i the arche, hu he in his ahne folc Israel, his deorling, grimliche awrec him ase ofte as ha gulten: Dathan, ant Abyron, Chore ant his feren, the othre alswa the he sloh bi feole thusendes, ofte for hare gruchunge ane. On other half loke, yef thu havest untrust of his unimete milce, hu lihtliche ant hu sone Seinte Peter, efter thet he hefde forsaken him, ant thet for a cwene word, wes with him i-sahtnet, hu the theof o rode, the hefde aa i-lived uvele, in a stert-hwile hefde ed him milce with a feier speche. For-thi, bitweone theos twa, untrust ant over-trust, hope ant dred beon aa i-feiet togederes.     Schrift yet schal beo wis, ant to wis mon i-maket - of uncuthe sunnen, nawt to yunge preostes - yunge, ich segge, of wit - ne to sotte alde. Bigin earst ed prude, ant sech alle the bohes th'rof as ha beoth th'ruppe i-writene, hwuch falle to the. Th'refter alswa of onde, ant ga we swa dune-ward, rawe bi rawe, athet to the leaste. Ant drah togedere al the team under the moder.     Schrift ah to beo soth: ne lih thu nawt o the-seolf. For as Seint Austin seith, Qui causa humilitatis de se mentitur, fit quod prius ipse non fuit, id est, peccator. "The seith leas on him-seolf thurh to muchel eadmodnesse, he is i-maket sunful, thah he ear nere." Sein Gregoire seith thah, Bonarum mentium est culpam agnoscere ubi culpa non est. "Cunde of god heorte is to beon offearet of sunne ther-as nan nis ofte," other weie swithre his sunne sum-chearre then he thurfte. Weien hit to lutel is ase uvel other wurse. The middel wei of meosure is eaver guldene. Drede we us eavre, for ofte we weneth for-te don a lutel uvel ant doth a great sunne; ofte wel to donne, ant doth al to cweade. Segge we eaver thenne with Seinte Anselme, Etiam bonum nos trum est aliquo modo corruptum, ut possit non placere, aut certe displicere Deo. Paulus: Scio quod non est in me, hoc est in carne mea, bonum. Na god in us nis of us: ure god is Godes. Ah sunne is of us ant ure ahne. "Godes god, hwen ich hit do," quoth he, Seint Anselme, "swa o summe wise min uvel hit forgneaieth: other ich hit do ungleadliche, other to ear, other to leate, other leote wel th'rof, thah na-mon hit nute, other walde thet ei hit wiste, other yemelesliche do hit, other to unwisliche, to muchel other to lutel. Thus eaver sum uvel mongleth him with mi god thet Godes grace yeveth me, thet hit mei lutel likin Godd, ant mislikin ofte." Seinte Marie! Hwen the hali mon seide thus bi him-seolf, hu mahe we hit witerliche seggen bi us wrecches?     Schrift ah to beon willes - thet is, willeliche, unfreinet, nawt i-drahen of the as thin unthonkes. Hwil thu const seggen eawt, sei al uneasket. Me ne schal easki nan, but for neode ane, for of the easkunge mei uvel fallen bute hit beo the wisre. On other half, moni mon abit for-te schriven him athet te nede tippe. Ah ofte him liheth the wrench thet he ne mei hwen he wule, the nalde tha he mahte. Na mare cangschipe nis then setten Godd tearme, as thah grace were his as he bere hire in his purs to neomen up-o grace th'rin i the tearme as he him-seolf sette. Nai, beal ami, nai. The tearme is i Godes hond, nawt i thi bandun. Hwen Godd beot hit te, reach to ba the honden, for withdrahe he his hond, thu maht th'refter lokin. Yef uvel other other-hwet ned te to schrifte - lo, hwet seith Seint Austin: Coacta servicia Deo non placent. "Servises i-nedde ne cwemeth nawt ure Laverd," thah no-the-leatere, betere is o thene no. Nunquam sera penitentia si tamen vera. "Nis neaver to leate penitence thet is sothliche i-maket," he seith eft him-seolven. Ah betere is, as Davith seith, Refloruit caro mea et ex voluntate mea confitebor ei - thet is, "mi flesch is i-fluret, bicumen al neowe, for ich chulle schrive me ant herie Godd willes." Wel seith he "i-fluret," to bitacnin wil-schrift, for the eorthe al unnet ant te treon alswa openith ham ant bringeth forth misliche flures. In Canticis: flores apparuerunt in terra nostra. Eadmodnesse, abstinence, culvres unlathnesse, ant othre swucche vertuz beoth feire i Godes ehnen, ant swote i Godes nease, smeallinde flures. Of ham make his herbearhe in-with the-seolven, for his delices, he seith, beoth ther for-te wunien: Et delicie mee esse cum filiis hominum - in libro Proverbiorum.     Schrift ah to beon ahne. Na-mon ne schal i schrift wreien bute him-seolven, ase forth as he mei. This ich segge for-thi thet swuch aventure bitimeth to sum mon other to sum wummon thet ha ne mei nawt fulleliche wreien hire-seolven, bute ha wreie othre. Ah bi nome, no-the-leatere, ne nempni ha nawt the ilke, thah the schrift-feader wite wel toward hwam hit turne - ah "a munk," other "a preost," nawt "Wilyam" ne "Water," thah ther ne beo nan other.     Schrift schal beo stude-vest to halde the penitence ant leave the sunne, thet tu segge to the preost: "Ich habbe stude-festliche i thonc ant in heorte this sunne to forleten ant do the penitence." The preost ne schal nawt easki the yef thu wult theonne-vorth forhate thi sunne; inoh is thet tu segge thet tu hit havest on heorte treoweliche to donne thurh Godes grace, ant yef thu fallest eft th'rin, thet tu wult anan-riht arisen thurh Godes help ant cumen ayein to schrifte. Vade et amplius noli peccare. "Ga," quoth ure Laverd to a sunful wummon, "ant have wil thet tu nult sungi na mare." Thus ne easkede he nan other sikernesse.     Schrift ah to beon bithoht bivore longe. Of fif thinges with thi wit gedere thine sunnen of alle thine ealdes - of childhad, of yuhethehad gedere al togederes. Th'refter gedere the studen thet tu in wunedest, ant thench yeorne hwet tu dudest in euch stude sunderliche ant in euch ealde. Th'refter sech al ut ant trude thine sunnen bi thine fif wittes, th'refter bi alle thine limen i hwuch thu havest i-suneget meast other oftest. Aleast, sunderliche bi dahes ant bi tiden.     Nu ye habbeth alle i-haved, as ich understonde, the sixtene stucchen the ich bihet to dealen, ant alle ich habbe tobroken ham ow, mine leove sustren, as me deth to children, the mahten with unbroke bread deien on hunger. Ah me is - thet wite ye! - moni crome edfallen. Secheth ham ant gederith, for ha beoth sawle fode.     Thulli schrift, thet haveth thus thes sixtene stucchen, haveth the ilke muchele mihten thet ich earst seide: threo ayein the deovel, threo on us-seolven, ant threo ayeines the world - deore-wurthe over gold or, ant yimmes of Ynde.     Mine leove sustren, this fifte dale, the is of schrift, limpeth to alle men i-liche; for-thi ne wundri ye ow nawt thet ich toward ow nomeliche nabbe nawt i-speken i this dale. Habbeth thah to ower bihove this lutle leaste ende. Of alle cuthe sunnen, as of prude, of great other of heh heorte, of onde, of wreaththe, of slawthe, of yemeles, of idel word, of untohene thohtes, of sum idel herunge, of sum fals gleadunge, other of hevi murnunge, of ypocresie, of mete, of drunch to muchel other to lutel, of gruchunge, of grim chere, of silences i-brokene, of sitten longe ed thurl, of ures mis i-seide withute yeme of heorte, other in untime, of sum fals word, of sware, of plohe, of i-schake lahtre, of schede cromen other ale, of leote thinges muhelin, rustin other rotien, clathes unseowet, bireinet, unwesschen, breoke nep other disch, other biseo yemelesliche ei thing thet me with feareth other ahte to yemen, of keorfunge, of hurtunge, thurh unbisehenesse - of alle the thinges the beoth i this riwle the beoth misnumene, of alle thulliche thing schrive hire euche wike eanes ed te leaste, for nan se lutel nis of theos thet te deovel naveth enbrevet on his rolle. Ah schrift hit schrapeth of, ant maketh him to leosen muchel of his hwile. Ah al thet schrift ne schrapeth of, al he wule o Domes-dei rede ful witerliche for-te bicleopie the with: a word ne schal ther wontin. Nu thenne, ich reade, yeoveth him to writen thet leaste thet ye eaver mahen, for na meoster nis him leovere, ant hwet-se he writ, beoth umben to schrapien hit of cleanliche. With na thing ne mahe ye matin him betere. To euch preost mei ancre schriven hire of swucche utterliche sunnen the to alle bifalleth. Ah ful trusti ha schal beon o the preostes god-lec thet ha allunge schaweth to, hu hire stonde abute flesches temptatiuns, yef ha is swa i-fondet - bute i deathes dute. Thus, thah, me thuncheth thet ha mei seggen: "Sire, flesches fondunge thet ich habbe - other habbe i-haved - geath to vorth up-o me thurh mi theafunge. Ich am ofdred leste ich ga drivinde other-hwiles to swithe forth-ward mine fol thohtes, ant fule umbe-stunde, as thah ich huntede efter licunge. Ich mihte thurh Godes strengthe schaken ham ofte of me yef ich were cwicliche ant steale-wurthliche umben. Ich am offearet sare thet te delit i the thoht leaste to longe ofte, swa thet hit cume neh skiles yettunge." Ne dear ich thet ha deopluker ne witerluker schrive hire to yung preost her-abuten, ant yet of this inoh-reathe him walde thunche wunder. Ah to hire ahne schrift-feader, other to sum lif-hali mon, yef ha mei him habben, culle al the pot ut, ther speowe ut al thet wunder, ther with fule wordes, thet fulthe, efter thet hit is, tuki al to wundre, swa thet ha drede thet ha hurte his earen thet hercneth hire sunnen. Yef ei ancre nat nawt of thulliche thinges, thonki yeorne Jesu Crist, ant halde hire i drede. The deovel nis nawt dead, thet wite ha, thah he slepe.     Lihte gultes beteth thus anan bi ow-seolven, ant thah seggeth ham i schrift hwen ye thencheth ham on as ye speoketh mid preoste. For the leaste of alle, sone se ye underyeoteth hit, falleth bivoren ower weoved o cros to ther eorthe, ant seggeth Mea culpa! "Ich gulte! Mearci, Laverd!" The preost ne thearf for na gult, bute hit beo the greattre, leggen other schrift on ow then thet lif thet ye leadeth efter theos riwle. Ah efter the absolutiun, he schal thus seggen: "Al thet god thet tu eaver dest, ant al thet uvel thet tu eaver tholest for the luve of Jesu Crist in-with thine ancre-wahes, al ich engoini the, al ich legge up-o the i remissiun of theose, ant foryevenesse of alle thine sunnen." Ant thenne sum lutles i-hweat he mei leggen upon ow, as a Salm other twa, Pater nostres, Aves, tene other tweolve. Disceplines echi to, yef him swa thuncheth. Efter the totagges the beoth i-writen th'ruppe, he schal the sunne demen mare other leasse. A sunne ful foryevelich mei wurthe ful deadlich thurh sum uvel totagge the lith ther-bisiden. Efter schrift falleth to speoken of penitence - thet is, deadbote - ant swa we habbeth in-yong ut of this fifte dale into the seste.