1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151 152 153 154 155 156 157 158 159 160 161 162 163 164 165 166 167 168 169 170 171 172 173 174 175 176 177 178 179 180 181 182 183 184 185 186 187 188 189 190 191 192 193 194 195 196 197 198 199 200 201 202 203 204 205 206 207 208 209 210 211 212 213 214 215 216 217 218 219 220 221 222 223 224 225 226 227 228 229 230 231 232 233 234 235 236 237 238 239 240 241 242 243 244 245 246 247 248 249 250 251 252 253 254 255 256 257 258 259 260 261 262 263 264 265 266 267 268 269 270 271 272 273 274 275 276 277 278 279 280 281 282 283 284 285 286 287 288 289 290 291 292 293 294 295 296 297 298 299 300 301 302 303 304 305 306 307 308 309 310 311 312 313 314 315 316 317 318 319 320 321 322 323 324 325 326 327 328 329 330 331 332 333 334 335 336 337 338 339 340 341 342 343 344 345 346 347 348 349 350 351 352 353 354 355 356 357 358 359 360 361 362 363 364 365 366 367 368 369 370 371 372 373 374 375 376 377 378 379 380 381 382 383 384 385 386 387 388 389 390 391 392 393 394 395 396 397 398 399 400 401 402 403 404 405 406 407 408 409 410 411 412 413 414 415 416 417 418 419 420 421 422 423 424 425 426 427 428 429 430 431 432 433 434 435 436 437 438 439 440 441 442 443 444 445 446 447 448 449 450 451 452 453 454 455 456 457 458 459 460 461 462 463 464 465 466 467 468 469 470 471 472 473 474 475 476 477 478 479 480 481 482 483 484 485 486 487 488 489 490 491 492 493 494 495 496 497 498 499 500 501 502 503 504 505 506 507 508 509 510 511 512 513 514 515 516 517 518 519 520 521 522 523 524 525 526 527 528 529 530 531 532 533 534 535 536 537 538 539 540 541 542 543 544 545 546 547 548 549 550 551 552 553 554 555 556 557 558 559 560 561 562 563 564 565 566 567 568 569 570 571 572 573 574 575 576 577 578 579 580 581 582 583 584 585 586 587 588 589 590 591 592 593 594 595 596 597 598 599 600 601 602 603 604 605 606 607 608 609 610 611 612 613 614 615 616 617 618 619 620 621 622 623 624 625 626 627 628 629 630 631 632 633 634 635 636 637 638 639 640 641 642 643 644 645

N                                                     N                                   N         N   N, T T           N                           N                 T                           N                   N                     N                                                       N     N, T             T                                   N                           N                                               T   T             N                                                       T     N                 N             N             N             T       N           N                                           T           T           N                   N             T                                 T             N                                       N                             N                     T                           T                   T   T     T                                           T                                     T       N, T             N     T         N             N       T                 N                               T T         N     T         T       T               N     T                 T                   T                         N                           T               T       N       T

Part Three Lessons from Nature Mine leove sustren, alswa as ye witeth wel ower wittes ute-with, alswa over alle thing lokith thet ye beon in-with softe ant milde ant eadmode, swete ant swote i-heortet ant tholemode ayein woh of word thet me seith ow, ant werc thet me misdeth ow, leste ye al leosen. Ayein bittre ancres Davith seith this vers: Similis factus sum pellicano solitudinis, et cetera. "Ich am," he seith, "as pellican the wuneth bi him ane." Pellican is a fuhel se wea-mod ant se wreathful thet hit sleath ofte o grome his ahne briddes hwen ha doth him teone, ant thenne sone th'refter hit wurth swithe sari, ant maketh swithe muche man, ant smit him-seolf with his bile thet he sloh ear his briddes with, ant draheth blod of his breoste, ant with thet blod acwiketh eft his briddes i-sleine. This fuhel, pellican, is the wea-mode ancre. Hire briddes beoth hire gode werkes thet ha sleath ofte with bile of scharp wreththe. Ah hwen ha swa haveth i-don, do as deth the pellican: ofthunche hit swithe sone, ant with hire ahne bile beaki hire breoste - thet is, with schrift of hire muth, thet ha sunegede with ant sloh hire gode werkes - drahe thet blod of sunne ut of hire breoste - thet is, of the heorte thet sawle lif is inne - ant swa schulen eft acwikien hire i-sleine briddes, thet beoth hire gode werkes. Blod bitacneth sunne, for alswa as a mon bibled is grislich ant eatelich i monnes ehe, alswa is the sunfule bivore Godes ehe. On other half, na-mon ne mei juggi wel blod ear hit beo i-colet. Alswa is of sunne. Hwil the heorte walleth in-with of wreaththe nis ther na riht dom, other hwil the lust is hat toward eani sunne, ne maht tu nawt te hwiles deme wel hwet hit is, ne hwet ter wule cumen of. Ah let lust overgan, ant hit te wule likin. Let thet hate acolin as deth the wule iuggi blod, ant tu schalt demen ariht the sunne ful ant ladlich thet te thuhte feier, ant uvel se muchel cumen th'rof, yef thu hit hefdest i-don hwil thet hate leaste, thet tu schalt deme wod te-seolf tha thu ther-toward thohtest. This is of euch sunne soth - hwi blod hit bitacneth - ant nomeliche of wreaththe. Impedit ira animum ne possit cernere verum. "Wreaththe," hit seith, "hwil hit least, ablindeth swa the heorte thet ha ne mei soth i-cnawen." Maga quedam est transformans naturam humanam. Wreaththe is a forschuppilt, as me teleth i spelles, for ha reaveth mon his wit ant changeth al his chere, ant forschuppeth him from mon into beastes cunde. Wummon wrath is wulvene; mon, wulf other liun other unicorne. Hwil thet eaver wreaththe is i wummone heorte, versaili, segge hire ures, Avez, Paternostres, ne deth ha bute theoteth. Naveth ha bute - as theo thet is i-went to wulvene i Godes ehnen - wulvene stevene in his lihte earen. Ira furor brevis est. Wreaththe is a wodschipe. Wrath mon - nis he wod? Hu loketh he? Hu speketh he? Hu feareth his heorte in-with? Hwucche beoth ute-with alle hise lates? He ne cnaweth na-mon. Hu is he mon thenne? Est enim homo animal mansuetum natura. "Mon cundelich is milde." Sone se he leoseth mildheortnesse, he leoseth monnes cunde, ant wreaththe, the forschuppilt, forschuppeth him into beast, as ich ear seide. Ant hwet yef eni ancre, Jesu Cristes spuse, is forschuppet into wulvene? Nis thet muche sorhe? Nis ther bute sone forwarpe thet ruhe fel abute the heorte, ant with softe sahtnesse makien hire smethe ant softe, as is cundeliche wummone hude, for with thet wulvene fel na thing thet ha deth nis Gode lic-wurthe.        Lo, her, ayeines wreaththe, monie remedies, frovren a muche floc ant misliche boten. Yef me misseith the, thench thet tu art eorthe. Ne totret me eorthe? Ne bispit me eorthe? Thah me dude swa bi the, me dude the eorthe rihte. Yef thu berkest ayein, thu art hundes cunnes. Yef thu stingest ayein, thu art neddre cundel, ant nawt Cristes spuse. Thench - dude he swa? Qui tanquam ovis ad occisionem ductus est et non aperuit os suum. Efter alle the schendfule pinen thet he tholede o the longe Fri-niht, me leadde him ine marhen to hongin o weari-treo, ant driven thurh his fowr limen irnene neiles, ah "na mare then a schep," as the Hali Writ seith, "cwich ne cweth he neaver."        Thench yet, on other half, hwet is word bute wind? To wac ha is i-strengthet thet a windes puf, a word, mei afellen ant warpen into sunne, ant hwa nule thunche wunder of ancre wind-feallet? On other half yetten, ne schaweth ha thet ha is dust ant unstable thing, the with a lute wordes wind is anan toblawen? The ilke puf of his muth, yef thu hit wurpe under the, hit schulde beore the uppart toward te blisse of heovene, ah nu is muche wunder of ure muchele meadschipe. Understondeth this word. Seint Andrew mahte tholien thet te hearde rode heve him toward heovene, ant luveliche biclupte hire. Sein Lorenz alswa tholede thet te gridil heve him uppardes with bearninde gleden. Seinte Stefne tholede the stanes thet me sende him ant underveng ham gleadliche ant bed for ham the ham senden him, with hommen i-falden - ant we ne mahe nawt tholien thet te wind of a word beore us towart heovene, ah beoth wode ayeines ham the we schulden thonkin as the ilke the servith us of muche servise, thah hit beo hare unthonkes. Impius vivit pio velit nolit. Al thet te unwreaste ant te uvele deth for uvel, al is the gode to god: al is his biheve ant timbrunge toward blisse. Let him - ant thet gleadliche! - breide thi crune. Thench hu the hali mon i Vitas Patrum custe ant blescede the othres hond the hefde him i-hearmet, ant seide se inwardliche cussinde hire yeorne, "i-blescet beo eaver theos hond, for ha haveth i-timbret me the blissen of heovene." Ant tu segge alswa bi hond the misdeth the, ant bi the muth alswa the ewt misseith the, "i-blescet beo thi muth" - sei, "for thu makest lome th'rof to timbri mi crune. Wel me is for mi god ant wa thah for thin uvel, for thu dest me freame ant hearmest te-seolven." Yef ei mon other wummon misseide other misdude ow, mine leove sustren, swa ye schulden seggen. Ah nu is muche wunder, yef we wel bihaldeth, hu Godes halhen tholeden wunden on hare bodi, ant we beoth wode yef a wind blawe a lutel toward us! Ant te wind ne wundeth nawt bute the eir ane, for nowther ne mei the wind - thet is, thet word thet me seith - ne wundi the i thi flesch, ne fule thi sawle, thah hit puffe up-o the, bute the- seolf hit makie. Bernardus: Quid irritaris quid inflammaris ad verbi flatum, qui nec carnem vulnerat, nec inquinat mentem? Wel thu maht underyeoten thet ter wes lute fur of chearite, thet leiteth al of ure Laverdes luve, lute fur wes ther thet a puf acwencte, for thear as muche fur is, hit waxeth with winde.        Ayein mis-dede other mis-sahe, lo her on ende the beste remedie - ant cunneth this essample. A mon the leie i prisun other ahte muche rancun ne o nane wise ne schulde ut, bute hit were to hongin, ear he hefde his rancun fulleliche i-paiet - nalde he cunne god thonc a mon the duste uppon him of peonehes a bigurdel for-te reimin him with ant lesen him of pine, thah he wurpe hit ful hearde ayeines his heorte? Al the hurd were foryeten for the gleadnesse. O this ilke wise we beoth alle i prisun her, ant ahen Godd greate deattes of sunne; for-thi we yeiyeth to him i the Paternoster: et dimitte nobis debita nostra. "Laverd," we seggeth, "foryef us ure deattes, alswa as we foryeoveth ure deatturs," woh thet me deth us, other of word other of werc. Thet is ure rancun thet we schule reimin us with ant cwitin ure deattes toward ure Laverd - thet beoth ure sunnen. For withute cwitance up of this prisun nis nan i-numen thet nis anan ahonget, other i purgatoire other i the pine of helle. Ant ure Laverd seolf seith, dimittite et dimittetur vobis. "Foryef, ant ich foryeove the," as thah he seide, "thu art endeattet toward me swithe with sunnen, ah wult tu god foreward? Al thet eaver ei mon misseith the other misdeth the, ich wulle neomen on-ward the deatte the thu ahest me." Nu thenne, thah a word culle the ful hearde up-o the breoste ant, as the thuncheth, on earst hurte thin heorte, thench as the prisun walde the the other hurte sare with the bigurdel, ant underveng hit gleadliche for-te acwiti the with, ant thonke the the hit sent te, thah Godd ne cunne him neaver thonc of his sonde. He hearmeth him ant freameth the, yef thu hit const tholien. For as Davith seith swithe wel with alle, "Godd deth in his tresor the unwreaste ant te uvele, for-te hure with ham as me deth with gersum theo the wel fehteth." Ponens in thesauris abyssos. Glosa: crudeles quibus donat milites suos.        Eft upon other half, pellican, this fuhel, haveth an-other cunde, thet hit is aa leane. For-thi, as ich seide, Davith eveneth him ther-to in ancre persone, in ancre stevene: Similis factus sum pellicano solitudinis. "Ich am pellican i-lich, the wuneth bi him ane." Ant ancre ah thus to seggen, ant beon i-lich pellican onond thet hit is leane. Judith clausa in cubiculo jejunabat omnibus diebus vite sue, et cetera. Judith bitund inne, as hit teleth in hire boc, leadde swithe heard lif - feaste ant werede here. Judith bitund inne bitacneth bitund ancre the ah to leaden heard lif as dude the leafdi Judith, efter hire evene - nawt ase swin i-pund i sti to feattin ant to greatin ayein the cul of the axe.     Twa cunnes ancren beoth thet ure Laverd speketh of ant seith i the Godspel: of false ant of treowe. Vulpes foveas habent et volucres celi nidos. Thet is, "foxes habbeth hare holen ant briddes of heovene habbeth hare nestes." The foxes beoth false ancres, ase fox is beast falsest. Theose habbeth, he seith, holen the holieth in-ward eorthe with eorthliche untheawes ant draheth into hare hole al thet ha mahen reopen ant rinnen. Thus beoth gederinde ancres of Godd i the Godspel to voxes i-evenet. Fox ec is a frech beast ant freote-wil mid alle, ant te false ancre draheth into hire hole ant fret, ase fox deth, bathe ges ant hennen. Habbeth efter the vox a simple semblant sum-chearre, ant beoth thah ful of gile. Makieth ham othre then ha beoth, ase vox, the is ypocrite. Weneth for-te gili Godd as ha bidweolieth simple men, ant gilith meast ham-seolven. Gealstrith as the vox deth, ant yelpeth of hare god hwer-se ha durren ant mahen, chafflith of idel, ant se swithe worltliche i-wurtheth thet on ende hare nome stinketh as fox ther he geath forth. For yef ha doth uvele, me seith bi ham wurse.     Theos eoden into ancre-hus as dude Saul into hole, nawt as Davith the gode. Ba ha wenden into hole, Saul ant Davith, as hit teleth i Regum, ah Saul wende thider in for-te don his fulthe th'rin, as deth bimong monie sum unseli ancre-went into hole of ancre- hus to bifule thet stude, ant don dearnluker th'rin fleschliche fulthen then ha mahten yef ha weren amidde the worlde. For hwa haveth mare eise to don hire cweadschipes then the false ancre? Thus wende Saul into hole to bidon thet stude, ah Davith wende thider in, ane for-te huden him from Saul thet him heatede ant sohte to sleanne. Swa deth the gode ancre, the Saul - thet is, the feond - heateth ant hunteth efter. Ha deth hire in to huden hire from hise kene clokes. Ha hud hire in hire hole, ba from worltliche men ant worltliche sunnen. Ant for-thi ha is gasteliche Davith - thet is, strong toyein the feond - ant hire leor lufsum to ure Laverdes ehnen - for swa muchel seith this word "Davith" on Ebreische ledene. The false ancre is "Saul," efter thet his nome seith. Saul: abutens sive abusio. For Saul on Ebreisch is "mis-notunge" on Englisch, ant te false ancre mis-noteth ancre nome ant al thet ha wurcheth. The gode ancre is Judith, as we ear seiden, thet is, bitund as heo wes, ant alswa as heo dude, feasteth, waketh, swinketh ant wereth hearde. Ha is of the briddes thet ure Laverd speketh of efter the voxes, the with hare lustes ne holieth nawt dune-ward ase doth the voxes - thet beoth false ancres - ah habbeth on heh ase brid of heovene i-set hare nestes - thet is, hare reste. Treowe ancres beoth briddes i-cleopede, for ha leaveth the eorthe-thet is, the luve of alle worltliche thinges - ant thurh yirnunge of heorte to heovenliche thinges fleoth uppart toward heovene. Ant tah ha fleon hehe with heh lif ant hali, haldeth thah the heaved lah thurh milde eadmodnesse, as brid fleonninde buheth thet heaved, leoteth al noht wurth thet ha wel wurcheth, ant seggeth as ure Laverd learde alle hise: Cum omnia benefeceritis, dicite: "Servi inutiles sumus." "Hwen ye al habbeth wel i- don," he seith, ure Laverd, "seggeth thet ye beoth unnete threalles." Fleoth hehe ant haldeth thah thet heaved eaver lahe. The wengen the uppard beoreth ham - thet beoth gode theawes thet ha moten sturien into gode werkes, as brid hwen hit fleo wule stureth hise wengen. The treowe ancres yetten, the we to briddes evenith - nawt we, thah, ah deth Godd - ha spreadeth hare wengen ant makieth creoiz of ham-seolf as brid deth hwen hit flith - thet is, i thoht of heorte ant i bitternesse of flesch beoreth Godes rode.        Theo briddes fleoth wel the habbeth lutel flesch, as the pellican haveth, ant feole fitheren. The strucion, for his muchele flesch, ant othre swucche fuheles, makieth a semblant to fleon, ant beateth the wengen, ah the vet eaver draheth to ther eorthe. Alswa fleschlich ancre the liveth i flesches lustes ant folheth hire eise - the hevinesse of hire flesch ant flesches untheawes bineometh hire hire fluht, ant tah ha makie semblant ant muche nurth with wengen - othres, nawt hiren - thet is, leote of as thah ha fluhe, ant were an hali ancre. Hwa-se yeorne bihalt, lahheth hire to bismere, for hire vet eaver as doth the strucions - thet beoth hire lustes - draheth to ther eorthe. Theos ne beoth nawt i-lich the leane fuhel pellican, ne ne fleoth nawt on heh, ah beoth eorth-briddes, ant nisteth on eorthe. Ah Godd cleopeth the gode ancres "briddes of heovene," as ich ear seide. Vulpes foveas habent, et volucres celi nidos. "Foxes habbeth hare holen, ant briddes of heovene habbeth hare nestes." Treowe ancres beoth ariht briddes of heovene, the fleoth on heh ant sitteth singinde murie o the grene bohes - thet is, thencheth uppart of the blisse of heovene the neaver ne faleweth, ah is aa grene - ant sitteth o this grene singinde murie - thet is, resteth ham i thulli thoht, ant ase theo the singeth, habbeth murhthe of heorte. Brid, tah, other-hwile for-te sechen his mete, for the flesches neode, lihteth to ther eorthe. Ah hwil hit sit on eorthe, hit nis neaver siker, ah biwent him ofte ant biloketh him aa yeornliche abuten, alswa the gode ancre. Ne fleo ha neaver se hehe, ha mot lihten other-hwiles dun to ther eorthe of hire bodi: eoten, drinken, slepen, wurchen, speoken, heren of thet hire neodeth to of eorthliche thinges. Ah thenne, as the brid deth, ha mot wel biseon hire, bilokin hire on euch half thet ha no-hwer ne misneome leste ha beo i-caht thurh sum of the deofles grunen, other i-hurt summes-weis, the hwil ha sit se lahe.        "Theos briddes habbeth nestes," he seith, ure Laverd. Volucres celi nidos. Nest is heard ute-with of prikinde thornes, in-with nesche ant softe - swa schal ancre ute- with tholien heard on hire flesch ant prikiende pinen, swa wisliche thah ha schal swenche thet flesch, thet ha mahe seggen with the Psalm-wruhte, fortitudinem meam ad te custodiam, thet is, "ich chulle wite mi strengthe, Laverd, to thine bihove." For-thi beo flesches pine efter euch-anes evene. Thet nest beo heard withuten, ant softe ant swete the heorte withinnen. Theo the beoth of bitter other of heard heorte, ant nesche to hare flesch, ha makieth frommard hare nest, softe withuten, ant thorni withinnen. This beoth the wea-mode ant te estfule ancres - bittre withinnen, as thet swete schulde beon, ant estfule withuten, as thet hearde schulde beon. Theos i thulli nest mahen habben uvel rest hwen ha ham wel bithencheth, for leate ha schulen bringe forth briddes of swuch nest - thet beoth gode werkes the fleon toward heovene. Job cleopeth nest the ancre- hus, ant seith as he were ancre: In nidulo meo moriar. Thet is, "ich chulle deien i mi nest, beon ase dead th'rin - for thet is ancres rihte - ant wunien athet death th'rin, thet ich nulle neaver slakien, hwil the sawle is i the buc, to drehen heard withuten - alswa as nest is - ant softe beo withinnen."        Of dumbe beastes leorne wisdom ant lare. The earn deth in his nest a deore-wurthe yim-stan, "achate" hatte, for nan attri thing ne mei the stan nahhin, ne hwil he is i the nest hearmin his briddes. This deore-wurthe stan, thet is Jesu Crist, ase stan treowe ant ful of alle mihtes over alle yim-stanes - he is the achate thet atter of sunne ne nahhede neaver. Do him i thi nest - thet is, i thin heorte. Thench hwuch pine he tholede on his flesch withuten, hu swote he wes i-heortet, hu softe withinnen, ant swa thu schalt driven ut euch atter of thin heorte ant bitternesse of thi bodi. For i thulli thoht - ne beo hit neaver se bitter pine thet tu tholie for the luve of him the droh mare for the - schal thunche the swote. Thes stan, as ich seide, afleieth attrie thinges. Habbe thu thes stan in-with thi breoste, ther Godes nest is. Ne thearf thu noht dreden the attri neddre of helle. Thine briddes - thet beoth thine gode werkes - beoth al sker of his atter.        Hwa-se ne mei thes yim-stan habben ne halden i the nest of hire heorte, lanhure i the nest of hire ancre-hus habbe his i-liche - thet is, the crucifix. Bihalde ofte th'ron ant cusse the wunde-studen i swote munegunge of the sothe wunden the he o the sothe rode thuldeliche tholede. Se vorth se ha mei, beo Judith - thet is, libben hearde, beon cnawen ofte to Godd his muchele godlec toward hire, ant hire fawtes toward him, thet ha him yelt hit uvele. Crie him yeorne th'rof mearci ant are, ant schrive hire i-lome. Thenne is ha Judith, the sloh Oloferne. For Judith on Ebreisch is "schrift" on Englisch, thet sleath gasteliche then deovel of helle. Judith: Confessio. For-thi seith ancre to euch preost, Confiteor on alre earst ant schriveth hire ofte, for-te beo Judith ant slean Oloferne - thet is, the deofles strengthe. For ase muchel seith this nome Oloferne as "stinkinde in helle." Secundum nominis ethimologiam Olofernus "olens in inferno," secundum interpretationem "infirmans vitulum saginatum." On Ebreische ledene Oloferne is "the feond the maketh feble ant unstrong feat kealf" ant to wilde - thet is, thet flesch the awildgeth sone se hit eaver featteth thurh eise ant thurh este. Incrassatus est dilectus et recalcitravit. "Mi leof is i-featted," he seith, ure Laverd, "ant smit me with his hele." Sone se flesch haveth his wil, hit regibeth anan ase feat meare ant idel. This featte kealf haveth the feond strengthe to unstrengen ant buhen toward sunne, for swa muche seith this nome "Oloferne." Ah ancre schal beo Judith thurh heard lif ant thurh soth schrift, ant slean as dude Judith thes uvele Oloferne, temie ful wel hire flesch, sone se ha i-feleth thet hit awilgeth to swithe, mid feasten, mid wecchen, with here, with heard swinc, with hearde disceplines - wisliche thah ant wearliche. Habete, inquit, sal in vobis. Item: In omni sacrifitio offeretis michi sal. Thet is, "in euch sacrefise," he seith, ure Laverd, "offrith me salt eaver. Veaste, wecche ant othre swucche, as ich nempnede nu, beoth mi sacrefises." Salt bitacneth wisdom, for salt yeveth mete smech, ant wisdom yeveth savur al thet we wel wurcheth. Withute salt of wisdom thuncheth Godd smechles alle ure deden. On other half, withute salt flesch gedereth wurmes, stinketh swithe fule ant forroteth sone. Alswa withute wisdom flesch, as wurm, forfret hire ant wasteth hire-seolven, forfeareth as thing the forroteth ant sleath hire on ende. Ah thulli sacrefise stinketh ure Laverd.        Thah the flesch beo ure fa, hit is us i-haten thet we halden hit up. Wa we moten don hit as hit is wel ofte wurthe, ah nawt fordon mid alle. For hu wac se hit eaver beo, thenne is hit swa i-cuplet, ant se feste i-feiet to ure deore-wurthe gast, Godes ahne furme, thet we mahten sone slean thet an with thet other. Augustinus: Natura mentis humane que ad ymaginem Dei creata est, et sine peccato est, solus Deus major est. Ant tis is an of the measte wundres on eorthe, thet te heste thing under Godd - thet is, monnes sawle, as Seint Austin witneth - schal beo se feste i-feiet to flesch, thet nis bute fen ant a ful eorthe, ant thurh thet ilke limunge luvien hit se swithe, thet ha for- te cwemen hit in his fule cunde, geath ut of hire hehe heovenliche cunde, ant for-te paien hire, wreatheth hire Schuppere, the scheop hire efter him-seolf thet is king ant keiser of eorthe ant of heovene. Wunder over wunder ant hokerlich wunder! thet se unimete lah thing - fere nichil "for neh nawt," seith Seint Austin - schal drahen into sunne se unimete heh thing ase sawle is, thet Seint Awstin cleopeth fere summum - thet is, "for neh hest thing," withute Godd. Ah Godd nalde nawt thet ha lupe i prude, ne wilnede to climben ant feolle as dude Lucifer, for he wes bute charge, ant teide for-thi a clot of hevi eorthe to hire as me deth the cubbel to the ku, other to the other beast thet is to recchinde ant renginde abuten. This is thet Job seide: Qui fecisti ventis - id est, spiritibus - pondus. "Laverd," he seith, "thu havest i-maket fother to fetherin with the sawlen" - thet is thet hevie flesch thet draheth hire dune-ward. Ah thurh the hehschipe of hire, hit schal wurthe ful liht, lihtre then the wind is, ant brihtre then the sunne, yef hit folheth hire her, ne ne draheth hire to swithe into hire lahe cunde. Leove sustren, for his luve thet ha is i-lich to, beoreth hire menske, ne leote ye nawt the lahe flesch meistrin hire to swithe. Ha is her in uncuththe i-put in a prisun, bitund in a cwalm-hus, ne nis nawt edscene of hwuch dignete ha is, hu heh is hire cunde, ne hwuch ha schal thunche yet in hire ahne riche. Thet flesch is her ed hame, as eorthe the is in eorthe, ant is for-thi cointe ant cover. As me seith, thet curre is kene on his ahne mixne. Ha haveth to much meistrie, wei-la-wei, o monie. Ah ancre, as ich habbe i-seid, ah to beon al gastelich yef ha wule wel fleon as brid thet haveth lutel flesch ant feole fitheren. Nawt ane yet tis, ah teke thet ha temeth wel hire ful-itohe flesch ant strengeth ant deth menske the wurthfule sawle - teke this, ha mot yet thurh hire forbisne ant thurh hire hali beoden yeoven strengthe othre, ant uphalden ham, thet ha ne fallen i the dunge of sunne. Ant for-thi Davith anan efter thet he haveth i-evenet ancre to pellican, he eveneth hire to niht-fuhel the is under evesunges. Simlis factus sum pellicano solitudinis; factus sum sicut nicticorax in domicilio.        The niht-fuhel i the evesunges bitacneth recluses the wunieth for-thi under chirche evesunges, thet ha understonden thet ha ahen to beon of se hali lif, thet al Hali Chirche- thet is, Cristene folc - leonie ant wreothie upon ham, ant heo halden hire up, with hare lif halinesse ant hare eadie bonen. For-thi is ancre "ancre" i-cleopet, ant under chirche i-ancret as ancre under schipes bord, for-te halden thet schip, thet uthen ant stormes hit ne overwarpen. Alswa al Hali Chirche, thet is schip i-cleopet, schal ancrin o the ancre, thet heo hit swa halde thet te deofles puffes-thet beoth temptatiuns - ne hit overwarpen. Euch ancre haveth this o foreward, ba thurh nome of ancre ant thurh thet ha wuneth under the chirche: to understiprin hire yef ha walde fallen. Yef ha breketh foreward, loki hwam ha lihe, ant hu continuelement, for ha ne stureth neaver. Ancre wununge ant hire nome yeieth eaver this foreward, yet hwen ha slepeth.        On other half, the niht-fuhel flith bi niht ant biyet i theosternesse his fode. Alswa schal ancre fleon with contemplatiun - thet is, with heh thoht, ant with hali bonen bi niht toward heovene - ant biyeote bi niht hire sawle fode. Bi niht ah ancre to beon waker ant bisiliche abuten gastelich biyete. For-thi kimeth anan th'refter, Vigilavi et factus sum sicut passer solitarius in tecto. Vigilavi, "Ich wes waker," seith Davith in ancre persone, "ant i-lich spearewe under rof ane." Vigilavi, "ich wes waker" - for thet is ancre rihte muchel for-te wakien. Ecclesiasticus: Vigilia honestatis tabefatiet carnes. Na thing ne awealdeth wilde flesch, ne ne maketh hit tomre, then muche wecche. Wecche is in Hali Writ i feole studen i-preiset. Vigilate et orate ne intretis in temptationem. "Alswa as ye nulleth nawt fallen into fondunge," he seith, ure Laverd, "wakieth ant i-biddeth ow" - thet schal don ow stonden. Eft he seith, Beatus quem invenerit vigilantem. "Eadi is the ilke, thet hwen ure Laverd kimeth i-fint wakiende." Ant he him-seolf sum-chearre pernoctavit in oratione, "wakede i beoden al niht." Ant swa he tahte us wecche, nawt ane with his lare, ah dude with his dede.        Eahte thinges nomeliche leathieth us to wakien eaver i sum god ant beo wurchinde: this scheorte lif; this stronge wei; ure god, thet is se thunne; ure sunnen, the beoth se monie; death, thet we beoth siker of, ant unsiker hwenne; thet sterke dom of Domes- dei ant se nearow mid alle, thet euch idel word bith ther i-broht forth, ant idele thohtes the neren ear her i-bette. Dominus in Ewangelio: de omni verbo otioso, et cetera. Item: et capilli de capite non peribunt - id est, cogitatio non evadet inpunita. Anselmus: Quid faties in illa die quando exigetur a te omne tempus inpensum qualiter sit a te expensum, et usque ad minimam cogitationem. Loke nu hwet beo of unwreaste willes ant sunfule werkes. Yet the seovethe thing the munegeth us to wakien, thet is the sorhe of helle. Ther bihald threo thing: the untaleliche pinen, the echnesse of euch-an, the unimete bitternesse. The eahtuthe thing: hu muchel is the mede i the blisse of heovene, world buten ende. Hwa-se waketh her wel ane hond- hwile, hwa-se haveth theos eahte thing ofte in hire heorte, ha wule schaken of hire slep of uvel slawthe. I the stille niht hwen me ne sith na-wiht, nowther ne ne hereth thet lette the bone, the heorte is ofte se schir, for na thing nis witnesse of thing thet me thenne deth, bute Godes engel, the is i swuch time bisiliche abuten to eggin us to gode. For ther nis nawt forloren as is bi dei ofte. Hercnith nu, leove sustren, hu hit is uvel to uppin, ant hu god thing hit is to heolen god-dede, ant fleo bi niht as niht-fuhel, ant gederin bi theostre - thet is, i privite, ant dearnliche - sawle fode.        Oratio Hester placuit regi Assuero - thet is, "Hesteres bone, the cwen, wes the King Assuer lic-wurthe ant i-cweme." "Hester" on Ebreisch, thet is "i-hud" on Englisch, ant is to understonden thet bone ant other god-dede thet is i-don on hudles is Assuer i- cweme - thet is, the king of heovene. For "Assuer" on Ebreisch is "eadi" on Englisch - thet is, ure Laverd the is eadi over alle. Davith speketh to ancre the wes i-wunet in hudles wel for-te wurchen, ant seoththen o sum wise uppeth hit ant schaweth: Ut quid avertis manum tuam et dexteram tuam de medio sinu tuo in finem - thet is, "hwi drahest tu ut thin hond, ant yet ti riht hond, of midde thi bosum?" In finem - "on ende." Riht hond is god werc. Bosum is privite, ant is as thah he seide, "the riht hond thet tu heolde, ancre, i thi bosum" - thet is, thi gode werc thet tu hefdest i-don privement, as thing is dearne i bosum - "hwi drahest tu hit ut in finem-on ende?" - thet is, thet ti mede endi se sone, thi mede thet were endeles yef thi god-dede i-hole were. Hwi openest tu hit ant nimest se scheort mede, hure thet is agan in an hond-hwile? Amen dico vobis receperunt mercedem suam. "Thu havest i-uppet thi god," he seith, ure Laverd, "witerliche thu havest undervo thi mede." Sein Gregoire awundreth him ant seith thet men beoth wode the trochith swa uvele: Magna verecundia est grandia agere et laudibus inhiare. Unde celum mereri potest, nummum transitorii favoris querit. "Muchel meadschipe hit is," he seith, "don wel ant wilni word th'rof, don hwer-thurh he buth the kinedom of heovene, ant sullen hit for a windes puf of wordes here-word of monnes herunge." For-thi, mine leove sustren, haldeth ower riht hond in- with ower bosum, leste mede endeles neome scheort ende. We redeth in Hali Writ thet Moyseses hond, Godes prophete, sone se he hefde i-drahen hire ut of his bosum, bisemde the spitel-uvel ant thuhte lepruse, thurh hwet is bitacnet thet god-dede i-drahe forth nis nawt ane forloren thurh thet uppinge, ah thuncheth yet eatelich bivore Godes ehe, as spitel-uvel is eatelich bivore monnes sihthe. Lo, a feorli god word thet te hali Job seith: Reposita est hec spes mea in sinu meo. "I mi bosum," he seith, "is al min hope i- halden," as thah he seide, "hwet god se ich do, were hit ut of bosum i-uppet ant i-drahe forth, al min hope were edslopen. Ah for-thi thet ich hit heole ant hude as i bosum, ich hopie to mede." For-thi yef ei deth eani god, ne drahe ha hit nawt ut-ward ne yelpe na- wiht th'rof, for with a lutel puf, with a wordes wind hit mei beon al toweavet.        Ure Laverd i Johel meaneth him swithe of theo the forleoseth ant spilleth al hare god thurh wilnunge of here-word ant seith theos wordes: Decorticavit ficum meam nudans spoliavit eam et projecit. Albi facti sunt rami ejus. "Allas," seith ure Laverd, "theos the schaweth hire god haveth bipilet mi fier, i-rend al the rinde of, despuilet hire steort- naket, ant i-warpen awei, ant te grene bohes beoth fordruhede ant forwurthen to drue, hwite rondes." This word is dosc, ah neometh nu yeme hu ich hit wulle brihtin. Fier is a cunnes treo the bereth swete frut thet me cleopeth "figes." Thenne is the fier bipilet ant te rinde i-rend of hwen god-dede is i-uppet. Thenne is the lif ut; thenne adeadeth the treo hwen the rinde is awei; ne nowther ne bereth hit frut, ne greneth th'refter i lufsume leaves, ah druhieth the bohes, ant wurtheth hwite rondes - to na thing betere then to fures fode. The boh, hwen hit adeadeth, hit hwiteth ute-with ant adruheth in-with ant warpeth his rinde. Alswa god-dede the wule adeadin forwarpeth his rinde - thet is, unhuleth him. The rinde the writh hit is the treoes warde, ant wit hit i strengthe ant i cwicnesse. Alswa the hulunge is the god-dedes lif, ant halt hit i strengthe. Ah hwen the rinde is offe, thenne as the boh deth hwiteth hit ute-with thurh worltlich here-word, ant adruheth in-with ant leoseth the swetnesse of Godes grace, the makede hit grene ant lic- wurthe Godd to bihalden. (For grene, over alle heowes, frovreth meast ehnen.) Hwen hit is swa adruhet, thenne nis hit to nawt se god, as to the fur of helle, for the earste bipilunge, hwer-of al this uvel is, nis bute of prude. Ant nis this muche reowthe thet te fier the schulde with hire swete frut - thet is, god-dede - fede Godd gasteliche, the Laverd of heovene, schal adruhien rindeles thurh thet hit is unhulet ant wurthen buten ende helle fures fode? Ant nis ha to unseli the with the wurth of heovene buth hire helle? Ure Laverd i the Godspel seolf eveneth heove-riche to gold-hord, the "hwa-se hit fint," as he seith, "hudeth hit." Quem qui invenit homo abscondit. Golt-hord is god-dede, the is to heovene i-evenet, for me hit buth ther-with, ant this golt-hord, bute hit beo the betere i-hud ant i-holen, hit is forlore sone. For as Sein Gregoire seith, Depredari desiderat qui thesaurum puplice portat in via. "The bereth tresor openliche i wei thet is al ful of reaveres ant of theoves, him luste leosen hit ant beon i-robbet." This world nis bute a wei to heovene other to helle, ant is al biset of hellene mucheres the robbith alle the golt-hordes thet ha mahen underyeoten thet mon other wummon i this wei openeth. For ase muchel wurth is as hwa-se seide ant yeide as he eode, "Ich beore golt-hord! Ich beore golt-hord! Lowr hit her read gold, hwit seolver inoh ant deore- wurthe stanes!" A sapere the ne bereth bute sape ant nelden yeiyeth hehe thet he bereth. A riche mercer geath forth al stille. Freinith hwet i-tidde of Ezechie the gode king, for- thi thet he schawde the celles of his aromaz, his muchele thinges, his deore-wurthe tresor. Nis hit nawt for nawt i-writen i the hali Godspel of the threo kinges the comen to offrin Jesu Crist the deore threo lakes, procidentes adoraverunt eum, et apertis thesauris suis obtulerunt, et cetera, thet tet ha walden offrin him, ha heolden eaver i-hud athet ha comen bivoren him, tha earst ha unduden the presenz thet ha beren. For- thi, mine leove sustren, bi niht as the niht-fuhel, thet ancre is to i-evenet, beoth yeorne sturiende. Niht ich cleopie privite. This niht ye mahen habben euch time of the dei, thet al the god thet ye eaver doth, beo i-don as bi niht ant bi theosternesse, ut of monnes ehe, ut of monnes eare. Thus i niht beoth fleonninde, ant sechinde ower sawle heovenliche fode: thenne ne beo ye nawt ane, pellicanus solitudinis, ah beoth ec nicticorax in domicilio.        Vigilavi et factus sum sicut passer solitarius in tecto. Yet is ancre i-evenet her to spearewe thet is ane under rof as ancre. Spearewe is a chiterinde brid, chitereth aa, ant chirmeth. Ah for-thi thet moni ancre haveth thet ilke untheaw, Davith ne eveneth hire nawt to spearewe the haveth fere, ah deth to spearewe ane. Sicut passer solitarius. "Ich am," he seith bi ancre, "as spearewe thet is ane." For swa ah ancre hire ane in anlich stude as ha is chirmin ant chiterin eaver hire bonen. Ant understondeth leofliche, mine leove sustren, thet ich write of anlich lif for-te frovrin ancren, ant ow over alle.        Hu god is to beon ane, is ba i the alde lahe ant i the neowe i-sutelet. For i bathe me i- fint thet Godd his dearne runes ant heovenliche privitez schawde his leoveste freond - nawt i monne floc, ah dude ther ha weren ane bi ham-seolven. Ant heo ham-seolf alswa as ofte as ha walden thenchen schirliche of Godd ant makien cleane bonen ant beon in heorte gasteliche i-hehet toward heovene - aa me i-fint thet ha fluhen monne sturbunge, ant wenden bi ham ane, ant ther Godd edeawde ham ant schawde him-seolf to ham ant yef ham hare bonen. For-thi thet ich seide thet me i-fint tis ba i the alde testament ant ec i the neowe, ich chulle of ba twa schawin forbisne.        Egressus est Ysaac in agrum ad meditandum - quod ei fuisse creditur consuetudinarium. Ysaac the patriarche, for-te thenche deopliche, sohte anlich stude ant wende bi him ane, as Genesys teleth. Ant swa he i-mette with the eadi Rebecca - thet is, with Godes grace. Rebecca enim interpretatur, "multum dedit et quicquid habet meriti preventrix gratia donat." Alswa the eadi Jacob, tha ure Laverd schawde him his deore-wurthe nebscheft ant yef him his blesceunge ant wende his nome betere, he wes i-flohe men ant wes him al ane. Neaver yete i monne floc ne cahte he swuch biyete. Bi Moysen ant bi Helye, Godes deore-wurthe freond, is sutel ant edscene hwuch baret ant hu dredful lif is eaver i-mong thrung, ant hu Godd his privitez schaweth to theo the beoth privement ham ane. Me schal, leove sustren, theose estoires tellen ow, for ha weren to longe to writen ham here, ant thenne schule ye al this brihte understonden. Set et Jeremias solus sedet. The eadi Jeremie seith he sit ane ant seith the reisun for- hwi. Quia comminatione tua replesti me. Ure Laverd hefde i-fullet him of his threatunge. Godes threatunge is wontreathe ant weane i licome ant i sawle, worlt buten ende. The were of this threatunge, as he wes, wel i-fullet, nere ther nan empti stude i the heorte to underfon fleschliche lahtren. For-thi he bed wealle of teares. Quis dabit michi fontem lacrimarum? Thet ha ne adruhede neaver na mare then wealle for-te biwepe slei folc - thet is, meast al the world thet is gasteliche i-slein mid deadliche sunnen. Ut lugeant interfectos populi mei. Ant to this wop, lokith nu, he bit anlich stude: Quis michi dabit diversorium viatorum in solitudine ut, et cetera, the hali prophete, for-te schawi witerliche thet hwa-se wule biwepen hire ahne ant othres sunnen, as ancre ah to donne, ant hwa-se wule i-finden ed te nearewe domes-mon mearci ant are, a thing thet let him meast is beowiste - thet is, wununge bimong men - ant thet swithest furthreth hit, thet is anlich stude, mon other wummon either to beon ane. Yet speketh Jeremie of anlich stude mare. Sedebit solitarius et tacebit. "Me schal sitten," he seith, "him ane ant beo stille." Of this stilnesse he speketh ther-bivoren lutel: Bonum est prestolari cum silentio salutare Dei. Beatus qui portaverit jugum Domini ab adholescencia sua. "God hit is i silence i-kepen Godes grace, ant thet me beore Godes yeoc anan from his yuhethe," ant thenne kimeth th'refter: Sedebit solitarius et tacebit, quia levabit se supra se. Hwa-se swa wule don, "ha schal sitten ane ant halden hire stille, ant swa heoven hire-seolf buven hire-seolven" - thet is, with heh lif hehi toward heovene over hire cunde. Teke this, hwet other god cume of this anlich sittunge thet Jeremie speketh of, ant of this seli stilthe, kimeth anan efter: Dabit percuscienti se maxillam et saturabitur obprobriis. "Ha wule," he seith, "the swa liveth, ayeines the smitere beode forth the cheke ant beo thurh-fullet with schentfule wordes." Her beoth i theos word twa eadi theawes to noti swithe yeorne, the limpeth ariht to ancre: tholemodnesse i the earre half, i the leatere, eadmodnesse of milde ant meoke heorte. For tholemod is, the thuldeliche abereth woh thet me him deth. Eadmod is, the tholie mei thet me him mis-segge. Theos the ich habbe i-nempnet her weren of the alde testament. Cume we nu to the neowe.        Sein Juhan Baptiste - bi hwam ure Laverd seide, Inter natos mulierum non surrexit major Johanne baptista, thet "bimong wives sunen ne aras neaver herre" - he kenneth us openliche bi his ahne dede thet anlich stude is bathe siker ant biheve. For thah the engel Gabriel hefde his burde i-bocket, al were he i-fullet of the Hali Gast anan in-with his moder wombe, al were he thurh miracle of baraigne i-boren ant in his i- borenesse unspende his feader tunge into prophecie - for al this, ne durste he yet wunie bimong men, se dredful lif he seh th'rin, thah hit nere of nawt elles bute of speche ane. Ant for-thi hwet dude he? Yung of yeres, fleh awei into wildernesse, leste he with speche sulde his cleane lif, for swa is in his ymne:          Antra deserti teneris sub annis          civium turmas fugiens petisti,          ne levi saltem maculare vitam          famine posses. He hefde, as hit thuncheth, i-herd Ysaie, the meande him ant seide, Ve michi quia homo pollutis labiis ego sum. "Wumme, wa is me," he seith, the hali prophete, "for ich am a mon of sulede lippen," ant seith the acheisun hwer-vore: Quia in medio populi polluta labia habentis ego habito. "Ant thet is for-thi," he seith, "thet ich wunie bimong men the suleth hare lippen mid misliche spechen." Lo, hu Godes prophete seith he wes i-sulet thurh beowiste bimong monne. Swa hit is sikerliche: beo neaver se briht or, metal, gold, seolver, irn, stel, thet hit ne schal drahe rust of an-other thet is i- rustet, for-hwon thet ha longe liggen togedere. For-thi fleh Sein Juhan the feolahschipe of fule men, leste he were i-fulet. Ah yet for-te schawin us thet me ne mei the uvele fleon bute me fleo the gode, he fleh his hali cun, i-coren of ure Laverd, ant wende into anli stude ant wunede i the wildernesse. Ant hwet biyet he ther? He biyet thet he wes Godes baptiste. O, the muchele hehnesse thet he heold i fulluht under hise honden, the Laverd of heovene, the halt up al the world with his anes mihte! Ther the Hali Trinite - "thrumnesse" on Englisch - schawde hire al to him: the Feader in his stevene, the Hali Gast i culvre heow, the Sune in his honden. In anlich lif he biyet threo preminences: privilegie of preachur, merite of martirdom, meidenes mede. Theos threo manere men habbeth in heovene, with overfullet mede, crune up-o crune. Ant te eadi Juhan, in anlich stude as he wes, alle theose threo estaz ofearnede him ane.        Ure leove Leafdi, ne leadde ha anlich lif? Ne fond te engel hire in anli stude al ane? Nes ha no-wher ute, ah wes biloken feste, for swa we i-findeth: Ingressus angelus ad eam dixit. Ave Maria, gratia plene, Dominus tecum; benedicta tu in mulieribus. Thet is, "the engel wende into hire." Thenne wes heo inne in anli stude hire ane. Engel to mon i thrung ne edeawede neaver ofte. On other half, thurh thet no-wher in Hali Writ nis i-writen of hire speche bute fowr sithen, as is i-seid th'ruppe, sutel prufunge hit is thet ha wes muchel ane, the heold swa silence.        Hwet seche ich other? Of Godd ane were inoh forbisne to alle, the wende him-seolf into anli stude, ant feaste ther-as he wes ane i wildernesse for-te schawin ther-bi thet bimong monne thrung ne mei nan makien riht penitence. "Ther in anli stude him hungrede," hit seith, ancre to frovre thet is meoseise. Ther he tholede thet te feond fondede him feole-weis, ah he overcom him, alswa for-te schawin thet te feond fondeth muchel theo the leadeth anlich lif, for onde thet he haveth to ham. Ah he is ther overcumen, for ure Laverd seolf ther stont bi ham i fehte ant bealdeth ham hu ha schulen stonden strongliche ayein, ant yeveth ham of his strengthe. He, as Hali Writ seith, thet na nurth ne thrung of folc ne mahte letten him of his beoden, ne desturbin his god, he thah no- the-leatere, hwen he walde beon i beoden, he fleh nawt ane othre men, ah dude yet his halie deore-wurthe apostles, ant wende ane upon hulles, us to forbisne thet we schule turne bi us-seolf ant climben with him on hulles - thet is, thenchen hehe ant leaven lahe under us alle eorthliche thohtes hwiles we beoth i bonen. Pawel ant Antonie, Hylariun ant Benedict, Sincletice ant Sare, ant othre swucche, monie men ant wummen bathe, fondeden witerliche ant underyeten sothliche the biyete of anlich lif, as theo the duden with Godd al thet ha walden. Sein Jerome nu leate seith bi him-seolven: Quotiens inter homines fui, minor homo recessi. "As ofte as ich eaver wes," he seith, "bimong men, ich wende from ham leasse mon then ich ear wes." For-thi, seith the wise Ecclesiasticus, Ne oblecteris in turbis; assidua est enim commissio - thet is, "ne thunche the neaver god i-mong monne floc, for ther is eaver sunne." Ne seide the stevene - to Arsenie - of heovene, Arseni, fuge homines et salvaberis? "Arseni, flih men ant tu schalt beon i-borhen." Ant eft hit com ant seide, Arseni, fuge, tace, quiesce - thet is, "Arseni, flih, beo stille, ant wune stude-vestliche i sum stude ut of monne."        Nu ye habbeth i-herd, mine leove sustren, forbisne of the alde lahe ant ek of the neowe hwi ye ahen anlich lif swithe to luvien. Efter the forbisnes, hereth nu reisuns hwi me ah to fleo the world, eahte ed te leaste. Ich ham segge scheortliche - neometh the betere yeme.        The forme is sikernesse. Yef a wod liun urne yont te strete, nalde the wise bitunen hire sone? Ant Seinte Peter seith thet helle liun rengeth ant reccheth eaver abuten for-te sechen in-yong sawle to forswolhen, ant bid us beo wakere ant bisie in hali beoden leste he us lecche: Sobrii estote et vigilate in orationibus, quia adversarius vester diabolus tanquam leo rugiens circuit querens quem devoret. This is Seinte Petres word thet ich ear seide. For-thi beoth ancren wise the habbeth wel bitund ham ayein helle liun for- te beo the sikerure.        The other reisun is - the bere a deore licur, a deore-wurthe wet as basme is, in a feble vetles, healewi i bruchel gles, nalde ha gan ut of thrung bute ha fol were? Habemus thesaurum istum in vasis fictilibus dicit apostolus. This bruchele vetles, thet is wummone flesch, thah no-the-leatere the basme, the healewi is meidenhad thet is th'rin other eft[er] meith-lure, chaste cleannesse. This bruchele vetles [is] bruchel as is eani gles. For beo hit eanes tobroken, i-bet ne bith hit neaver, i-bet ne hal as hit wes ear, na mare thene gles. Ah yet hit breketh mid leasse then bruchel gles do. For gles ne tobreketh nawt bute sum thing hit rine, ant hit, onont meith-lure, mei leosen his halnesse with a stinkinde wil, swa vorth hit mei gan ant leaste se longe. Ah this manere bruche mei beon i-bet eft ase hal allunge as hit wes eaver, halest thurh medecine of schrift ant bireowsunge. Nu the preove her-of: Sein Juhan Ewangeliste - nefde he brud i-broht ham? Nefde he i-thoht tha - yef Godd nefde i-let him - meithhad to forleosen? Seoththen thah, nes he meiden neaver the unhalre, ah "wes meiden bitaht meiden to witene." Virginem virgini commendavit. Nu as ich segge, this deore-wurthe healewi i bruchel vetles is meithhad ant cleannesse in ower bruchele flesch, bruchelure then eani gles, thet yef ye weren i worldes thrung, with a lutel hurlunge ye mahten al leosen as the wrecches i the world the hurlith togederes ant breoketh hare vetles ant cleannesse schedeth. For-thi ure Laverd cleopeth thus: In mundo pressuram in me autem pacem habebitis. "Leaveth the world ant cumeth to me, for ther ye schulen beon i thrung, ah reste ant peis is in me."        The thridde reisun of the worldes fluht is the biyete of heovene. The heovene is swithe heh. Hwa-se wule biyeoten hit ant areachen ther-to, hire is lutel inoh for-te warpen al the world under hire fotes. For-thi alle the halhen makeden of al the world as a scheomel to hare vet to areache the heovene. Apocalypsis: Vidi mulierem amictam sole et luna sub pedibus ejus. This is Sein Juhanes word, Ewangeliste, i the Apocalipse: "Ich i-seh a wummon i-schrud mid te sunne ant under hire vet the mone." The mone woneth ant waxeth, ne nis neaver stude-vest, ant bitacneth for-thi worltliche thinges the beoth as the mone eaver i change. Thes mone mot te wummon halden under hire vet - thet is, worldliche thinges totreoden ant forhohien - the wule heovene areachen ant beo ther i-schrud mid te sothe sunne.        The feorthe reisun is preove of noblesce ant of largesce. Noble men ant gentile ne beoreth nane packes, ne ne feareth i-trusset with trussews, ne with purses. Hit is beggilde riht to beore bagge on bac, burgeise to beore purse - nawt Godes spuse, the is leafdi of heovene. Trussen ant purses, baggen ant packes beoth worltliche thinges: alle eorthliche weolen ant worltliche rentes.        The fifte resiun is, noble men ant wummen makieth large relef, ah hwa mei makie largere then the other theo the seith with Seinte Peter, Ecce nos reliquimus omnia et secuti sumus te. "Laverd, for-te folhi the, we habbeth al forleavet." Nis this large relef? Nis this muche lave? Mine leove sustren, kinge[s] ant keisers habbeth hare liveneth of ower large relef thet ye i-leavet habbeth. "Laverd, for-te folhi the," seith Seinte Peter, "we habbeth al forleavet," as thah he seide, "we wulleth folhi the i the muchele genterise of thi largesce. Thu leafdest to othre men alle richesces ant makedest of al relef ant lave se large. We wulleth folhi the. We wulleth don alswa, leaven al, as thu dudest, folhi the on eorthe i thet ant in other-hwet - for-te folhi [the] ec into the blisse of heovene, ant yet tear over al folhi the hwider-ward se thu eaver wendest, as nane ne mahen bute ane meidnes: Hii secuntur agnum quocumque ierit, utroque scilicet pede, id est, integritate cordis et corporis.        The seste reisun is hwi ye habbeth the world i-flohen - familiarite, muche cun- redden, for-te beo prive with ure Laverd. For thus he seith bi Osee: Ducam te in solitudinem et ibi loquar ad cor tuum. "Ich chulle leade the," he seith to his leofmon, "into anli stude, ant ter ich chulle luveliche speoke to thin heorte, for me is lath preasse." Ego Dominus, et civitatem non ingredior.        The seovethe reisun is for-te beo the brihtre ant brihtluker seon in heovene Godes brihte nebscheft, for ye beoth i-flohe the world ant hudeth ow for hire her. Yet ter-teken thet ye beon swifte as the sunne gleam, for ye beoth with Jesu Crist bitund as i sepulcre, bibarret as he wes o the deore rode, as is i-seid th'ruppe.        The eahtuthe reisun is to habben cwic bone - ant lokith yeorne hwer-vore. The eadmode cwen Hester bitacneth ancre, for hire nome seith "i-hud" on Englische ledene. As me ret in hire boc, ha wes the King Assuer over al i-cweme, ant thurh hire bone arudde of death al hire folc, the wes to death i-demet. This nome Assuer is i-spealet "eadi," as is ear i-seid, ant bitacneth Godd eadi over alle. He yetteth Hester the cwen - thet is, the treowe ancre, thet is riht Hester, thet is riht "i-hud" - he hereth ant yetteth hire alle hire benen, ant sawveth thurh ham muche folc. Monie schulde beo forloren the beoth thurh the ancre benen i-borhen, as weren thurh Hesteres, for-hwon thet ha beo Hester ant halde hire as heo dude, Mardochees dohter. "Mardoche" is i-spealet amare conterens inpudentem - thet is, "bitterliche totreodinde thene scheomelese." Scheomeles is the mon the seith eani untu other deth bivoren ancre. Yef eani thah swa do, ant heo breoke bitterliche his untohe word other his fol dede, totreode ham anan-riht with unwurth tellunge, thenne is ha Hester, Mardochees dohter, bitterliche breokinde thene scheomelese. Bitterluker ne betere ne mei ha him neaver breoken then is i-taht th'ruppe with narraverunt michi, other mid tis vers: Declinate a me maligni et scrutabor mandata Dei mei, ant wende in-ward anan toward hire weovede ant halde hire ed hame, as Hester, the "i-hudde." Semei i Regum hefde death ofservet, ah he criede mearci ant Salomon foryef hit him, thah thurh swuch a foreward: thet he ed hame heolde him i Jerusalem as he wunede ant hudde him in his huse, yef he o-hwider wende ut - swuch wes the foreward - thet he were eft al ful ant to death i-demet. He thah brec foreward thurh his unselhthe. His threalles edfluhen him ant edbreken him ut, ant he folhede ham ant wende ut efter ham - hwet wult tu mare? - wes sone forwreiet to the king, Salomon, ant for the foreward tobroken wes, fordemet to deathe. Understondeth yeorne this, mine leove sustren. Semey bitacneth the ut-warde ancre, nawt Hester, the "i-hudde." For Semey seith audiens, thet is "herinde" on ure ledene - thet is the recluse the haveth asse earen, longe to here feor, thet is hercninde efter ut- runes. Semeis stude wes Jerusalem, thet he schulde in huden him yef he walde libben. This word "Jerusalem" spealeth "sihthe of peis" ant bitacneth ancre-hus. For th'rinne ne thearf ha seon bute peis ane. Ne beo neaver Semei - thet is, the recluse swa swithe forgult toward te sothe Salomon - thet is, ure Laverd. Halde hire ed hame i Jerusalem thet ha na-wiht nute of the worldes baret. Salomon yetteth hire blitheliche his are, ah yef ha entremeateth hire of thinges withuten mare then ha thurfte, ant hire heorte beo ute- with, thah a clot of eorthe - thet is, hire licome - beo in-with the fowr wahes, ha is i-wend with Semei ut of Jerusalem alswa as he dude efter his threalles. Theos threalles beoth the ethele fif wittes, the schulden beon et hame ant servin hare leafdi. Thenne ha servith wel the ancre, hare leafdi - hwen ha notieth ham wel in hare sawle neode: hwen the ehe is o the boc, other o sum other god, the eare to Godes word, the muth in hali bonen. Yef ha wit ham uvele ant let ham thurh yemeles etfleon hire servise ant folhi ham ut-wart with hire heorte - as hit bitimeth eaver meast thet gan the wittes ut, the heorte geath ut efter - ha breketh Salomon foreward with the unseli Semey ant is to death i-demet.        For-thi mine leove sustren, ne beo ye nawt Semey, ah beoth Hester, the "i-hudde," ant ye schule beon i-hehet i the blisse of heovene. For the nome of Hester ne seith nawt ane abscondita - thet is, nawt ane "i-hud" - ah deth ther-teken, elevata in populis - thet is, "i folc i-hehet." Ant swa wes Hester, as hire nome cwiddeth, i-hehet to cwen of a povre meiden. I this word "Hester" beoth "hudunge" ant "hehnesse" i-feiet togederes, ant nawt ane "hehnesse," ah "hehnesse over folc" for-te schawin witerliche thet teo the hudeth ham ariht in hare ancre-hus - ha schulen beon in heovene over othres cunnes folc wurthliche i-hehet. Ba Hesteres nome ant hire hehunge pruvieth thet ich segge. On other half understondeth: ye beoth i Jerusalem. Ye beoth i-flohe to chirche grith. For nis ower nan thet nere sum-chearre Godes theof. Me weiteth ow - thet wite ye ful yeorne - withuten, as me deth theoves the beoth i-broke to chirche. Haldeth ow feaste inne. Nawt te bodi ane, for thet is the unwurthest, ah ower fif wittes ant te heorte over al, ant al ther the sawle lif is. For beo ha bitrept ute-with, nis ther bute leade forth toward te geal-forke - thet is, the weari-treo of helle. Beoth ofdred of euch mon alswa as the theof is, leste he drahe ow ut-wart - thet is, biswike with sunne - ant weiti for-te warpen upon ow his cleches. Bisecheth yeornliche Godd as theof i-broke to chirche, thet he wite ant wardi ow with alle the ow weitith. Chiterith ower beoden aa as spearewe deth [thet is] ane, for this an word is i-seid of anlich lif, of anlich stude, ther me mei beon Hester, i-hud ut of the world, ant do betere then i thrung euch gastelich biyete. For-thi eveneth Davith ancre to pellican thet leat anlich lif, ant to spearewe ane.        Spearewe haveth yet a cunde thet is biheve ancre, thah me hit heatie - thet is, the fallinde uvel. For muche neod is, thet ancre of hali lif ant of heh habbe fallinde uvel. Thet uvel ne segge ich nawt thet me swa nempneth, ah fallinde uvel ich cleopie licomes secnesse other temptatiuns of flesches fondunges hwer-thurh hire thunche thet ha falle dune-ward of hali hehnesse. Ha walde awilgin elles other to wel leoten of [hire-seolven], ant swa to noht i-wurthen; the flesch walde awilgin ant bicumen to ful-itohen toward hire leafdi - yef hit nere i-beaten - ant makie sec the sawle - yef secnesse hit ne temede with uvel other with sunne.        The licome ne the gast - yef hare nowther nere sec, as hit timeth seldene, orhel walde awakenin, thet is the measte dredfule secnesse of alle. Yef Godd fondeth ancre with ei uvel ute-with, other the feonde in-with with gasteliche untheawes, ase prude, wreaththe, onde, other with flesches lustes, ha haveth thet fallinde uvel, thet me seith is spearewe uvel. Godd hit wule for-thi thet ha beo eaver eadmod ant with lah haldunge of hire-seolven falle to ther eorthe, leste ha falle i prude.     Nu we hurteth, leove sustren, to the feorthe dale, thet ich seide schulde beon of feole fondunges, for ther beoth uttre ant inre, ant either moni-valde. Salve ich bihet to teachen toyeines ham ant bote, ant hu hwa-se haveth ham mei gederin of this dale cunfort ant frovre toyeines ham alle. Thet ich thurh the lare of the Hali Gast mote halden foreward, he hit yetti me thurh ower bonen.