1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132

N N N N

[Merlin and Nimiane; and Arthur and the Giant of St. Michael's Mount] [Summary. Arthur's forces proceed against the Romans. Gawain leads an envoy to the Roman camp, telling the Romans they must leave Arthur's lands. The emperor is angered by this demand; and when a young man sitting beside him says the Briton's words are greater than his deeds, Gawain immediately cuts off his head. The messengers leap to their horses, with the Romans in pursuit. Arthur's men ride to the rescue, and the Britons slaughter many Romans. The entire Roman force enters the fray, causing the Britons to lose many knights; the Britons are forced to retreat. Before the great battle is about to commence, the emperor gives his troops a stirring talk; then they prepare to attack. The battle ensues, with both sides using their full forces. The Britons do many great deeds, yet of them are slain. Gawain advances on the emperor, and they fight; using Calibourne, Gawain succeeds in killing Lucius. The enraged Romans fight on, but the Britons prove too much for them, and the surviving Romans are forced to flee. Fols. 230r (line 28)-235r (line 9).] Full gladde was the Kynge Arthur of the discounfiture of the Romains and of the victorie that God hadde hym yoven. And than [thei] com into the feelde ther the bateile hadde be and biryed the deed bodies in chirches and abbeyes of the contrey, and the wounded lete hem be ledde to townes and serched theire sores. And after, [the Kynge Arthur] made take the body of the emperour and sente it to Rome on a beere and sente worde to the Romains that it was the trewage of Bretaigne that he sent to Rome; and yef thei wolde aske eny more, he wolde hem sende soche another in the same wise. And whan he hadde don thus, he toke counseile wheder he sholde holde forth his wey or turne agein into Gaule; and the princes seide he sholde take counseile of Merlin. Than the kynge called Merlin and seide, "Dere frende, how pleseth it you that I shall do?" "Sir," seide Merlin, "ye shull not come at Rome ne ye shull not yet returne, but holde forth youre wey, for ther be peple that have grete nede of youre helpe." "How so?" seide the kynge. "Is ther werre in this contrey?" "Sir," seide Merlin, "ye, beyonde the Lak de Losane, for ther repeireth a devell, an enmy so that ther dar nother abide man ne woman, for he distroieth the contrey and sleth all that he may gete." "How so?" seide the kynge. "May ther no man hym endure, than is he no man as other ben?" "No," quod Merlin, "it is a catte full of the devell that is so grete and ougly that it is an horible sight on to loke." "Jhesu mercy!" seide the kynge to Merlin, "whens myght soche a beeste come?" "Sir," seide Merlin, "that can I welle telle you. "Hit befill at the Assencion hens a foure yere that a fissher of the contrey com to the Lak de Losane with his nettes and his engynes. And whan he was redy to caste his nette into the water, he promysed to oure Lorde the firste fissh that he sholde take. And whan he drough up his nette, he toke a fissh that was worth thirty shillings. And whan he saugh the fissh so feire and grete, he seide to hymself softly betwene his teth, "God shall not have this, but He shall have the next that I take." Than he threwe his nett agein into the water and toke another fissh that was better than the firste. And whan he saugh it was so good and so feire, he seide that yet oure Lorde God myght wele abide of this, but the thridde sholde He have, withoute eny doute. And than he caste his nett into the water and drough oute a litill kyton as blakke as eny cool. And whan the fissher it saugh, he seide that he hadde nede therof in his house for rattes and mees. And he it norisshed and kept up in his house till it strangeled hym and his wif and his children, and after fledde into a mountayn that is beyonde the lak that I have to you of spoken. And [he] hath be ther into this tyme, and distroieth and sleth all that he may se and areche. And he is grete and horible that it is merveile hym to se; and we shull go that wey, for it is the right wey toward Rome. And yef God will, ye shull sette the peple in reste that be fledde into straunge londes. "Whan the barons undirstode these wordes, thei gonne to blesse hem for the grete merveile that thei hadden, and seiden that it was vengeaunce of oure Lorde, and a tokne that he was wroth for the synne that the fissher hadde broken his promys. And therfore thei trowed oure Lorde were wroth with hym for that he hadde falsed his covenaunt. Than the kynge comaunded to trusse and to make hem redy to ride. And thei dide his comaundement and toke theire wey toward the Lak de Losane, and fonde the contrei wasted and voide of peple that nother man ne woman durste therynne enhabite. And thei laboured so till that thei com under the mounte whereas this devell dide abide, and loiged hem in a valey a myle fro the mountein. And the Kynge Looth toke his armes, and Sir Gawein and Gaheries and the Kynge Ban and Mer -lin for to go withe the Kynge Arthur, and seide thei wolde go se this feende that so grete damage and harme hadde don in the contrey. And thei clymbe upon the mountein as Merlin hem ledde that well knewe the wey for the grete witte that was in hym. And whan thei were come up, than seide Merlin to Arthur, "Sir, in that roche ther is the catte," and shewed hym a grete cave in a medowe that was right large and depe. "And how shall the catte come oute?" seide the kynge. "That shull ye se hastely," quod Merlin. "But loke ye be redy you to diffende, for anoon he will yow assaile." "Than drawe yow alle abakke," seide the Kynge Arthur, "for I will preve his power." And thei dide his comaundement; and anoon as thei were withdrawen, Merlin whistelid lowde. And whan the catte that herde, anoon he lept oute of the cave, for he wende that it had be som wilde beste, and he was hungry and fastinge and ran woodly astraye toward the Kynge Arthur. And as soone as the kynge saugh hym comynge, he bar agein hym a short spere and wende to smyte hym thourgh the body. But the feend caught the steill heed in his teth so harde that he made it bende; and in the turnynge that the kynge made, the shaft tobrake faste by the heed that was in [the] cattes mowthe. And he began to make a grym noyse as he were wood. And the kynge caste down the tronchon of the spere and drough his suerde and caste his shelde hym before. And the catte lepte to hym anoon, and wende to sese hym by the throte; and the kynge lifte the shelde agein hym so fiercely that the catte fill to grounde. But soone he lepte upon his feet and ran upon the kynge full fiercely, and the kynge lifte up the suerde and smote the catte on the heed that he cutte the skyn. But the heed was so harde that he myght not entre; and nevertheles, he was so astonyed that he fill to the erthe upright. But er the kynge myght his shelde recover, the catte sesed hym at disco vert be the sholdres so harde that his clawes griped thourgh his hauberke into the flesshe, and plukked so hard that he brast moo than four hundred mayles that the reade blode folowed his clawes. And ther failed but litill that the kynge hadde falle to the erthe. And whan the kynge saugh his blode, he was wonder wroth. Than he caste his shelde before his breste and hilde his swerde in his right hande and ran to the catte vigerously, that likked his clawes that were weet of blode. And whan he saugh the kynge come toward hym, he lepe hym ageins and wende to sese hym as he hadde do beforn. But the kynge launched his shelde hym before, and the catte smote therin his two feet before with so grete fiersnesse thourgh the shelde, and breied so harde that the kynge enclyned to the erthe so that the gige of the shelde fly from his nekke. But he griped the shelde so faste by the enarmynge that the catte myght it not hym bereve ne pulle oute his clawes, but henge in the shelde be the two feet before. And whan the kynge saugh this, he griped faste the shelde and smote hym with his swerde upon bothe legges that he cutte hem asonder by the knees, and the catte fill to grounde. And the kynge caste awey his shelde and ran to hym with swerde drawen; and the catte sterte upon the hynder feet and grenned with his teth and coveited the throte of the kynge. And the kynge launched at hym and wende to smyte hym on the heed. And therwith the catte strayned hys hynder feet and lept in his visage and griped hym with her hynder feet and with hir teth into the flesshe, that the blode stremed out in many places of breste and sholdres on high. And whan the kynge felte hym holde so harde, he sette the point of his swerde to the bely for to launche hym thourgh; and whan the catte felte the suerde, she lefte hir bitinge and wolde have falle to grounde. But the two hynder feet were so depe ficched in the hauberke that the heed of the catte hanged downwarde; and than the kynge smote asonder the two hynder feet, and the body fill to grounde. And as soone as the catte was fallen, she began to whowle and to braye so lowde that it was herde thourgh the hoste. And whan she hadde caste this cry, she began to crepe faste down the foreste by the grete strengthe that was in hir, and drough toward the cave whereas she com oute. But the kynge wente betwene hir and the cave and ran upon the catte; and the catte launched toward hym and wende to cacche hym with hir teth. But in the launchinge, the kynge smote of hir two legges before. And than Merlin and the other ronne to hym and asked how it was with hym. "Well," seide the kynge, "blessed be oure Lorde, for I have slain this devell that grete harm hath don in this contrey. And wite it verily that I hadde never so grete doute of mysilf as I hadde now agein this catte, saf only of the geaunte that I slough this other day on the mountein; and therfore I thanke oure Lorde." "Sir," seide the barouns, "ye have grete cause." Than thei loked on the feet that were lefte in the shelde and in the hauberk, and thei seide that never soche feet hadde thei sein before. And Gaheries toke the shelde and wente to the host makinge grete joye. And whan the princes saugh the feet and the clawes that were so longe, thei were abaisshed, and ledde the kynge to his tente and unarmed hym, and loked on the cracchinges and the bitinge of the catte. And the leches waisshed softly his woundes and leide therto salve and oynementes to clense the venym, and dight hym in soche maner that he letted nothinge to ride. And that day thei sojourned till on the morowe that thei returned toward Gaule. And the kynge lete bere the shelde with the cattes feet; and the feet that were in the hauberk lete put in a cofer and comaunded to be well kept. And the kynge asked Merlin how this mountein was cleped; and Merlin seide that peple of the contrey cleped it the Mountein de Lak, for the lak that was in the valey. "Certes," seide the kynge, "I will that this name be taken awey; and I will it be cleped the Mountein of the Catte, for the catte hadde ther his repeire and was ther slain." And after that the name of that hill never chaunged, ne never shall while the worlde dureth. And now awhile cesseth the tale and returneth to hem that ledde the pris- oners.